Nehemi citaaboo
Citaaboo fahamandiroo
Nehemi citaaboo woo mma denja Ezra citaaboo ga, cee jinaa i manʼti kala citaaboo folloku. Nehemi ka citaaboo woo kaŋ ga maaɲoo goo hantum.
Nehemi manʼti kala sargari juwalkaa Ezra waatoo boro. Nehemi manʼti kala Artaserses, Pers kokoyoo goykaw beeri, kokoyoo nʼa noo fondo a ma koy Žerizalem koyraa ra ka miseyaŋ hanse. Kaŋ a too no din, ba kaŋ a mana kan boroyaŋ se, boro booboyaŋ yadda a ga kʼa faaba ka Žerizalem cetaa hanse. A goo Ezra jeroo ga waatoo kaŋ Ezra ga Irkoy ašariyaa tiiraa caw.
Citaaboo woo ga jamaa bine šendaa cebe ir se. A ga Irkoy booriyanoo nda nga hinnaroo nga jamaa se cebe ir se.
Nehemi citaaboo woo ga hin ka zamnandi kanje taaci:
1. Nehemi kaa ka Žerizalem koyraa guna (zamna 1na—2to).
2. Koyraa cetaa cinayanoo (zamna 3to—7to).
3. Ezra na Irkoy ašariyaa tiiraa caw jamaa se (zamna 8to—10to).
4. Nehemi na jamaa cawandi kʼi daŋ fondo henna ga (zamna 11to—13to).
1
Nehemi duu Žerizalem koyraa alhabar
1 Hakaliya izʼaroo Nehemi šenney fillaa ti woo. Artaserses laamaa jiiri warankantoo (20to), Kislewu handoo ra, a gar kaŋ ay goo koyra kaŋ kuubandi nda cete ra kaŋ ti Sus.
2 Agay armey affoo kaŋ ti Hanani, nga nda boroyaŋ hun Žuda gandaa ra ka kaa. Alyahuudey kaŋ mana buu tamtaraa ra, ay nʼi hãa nda ngi alhabar, nda Žerizalem alhabar.
3 I nee ya ne: «Borey kaŋ mana buu tamtaraa ra kaŋyaŋ goo ma huna gandaa zamnaroo ra kaŋ ti Žuda ra goo binemarayyaŋ beeri ra nda kaynayan ra, kayriyaŋ goo Žerizalem cetaa ra, i na nuune ka nga ganbey ton.»
Nehemi na Irkoy ŋaaray Alyahuudey se
4 Waatoo kaŋ ay maa šenney wey, ay goro ka hẽe. Ay na jirbiyaŋ tee ay binoo ga maray, ay ga meehaw, ay ga beenaa Koyoo ŋaaray.
5 Ay nee: «Ay gʼa wiri ni ga, Abadantaa, nʼga beeri, hunburhaya ti ni, ni kaŋ ga amaana too, nʼga laadir borey se kaŋ ga baa ni, wey kaŋ ga ni yaamarey dii.
6 Ay ga ni suurandi, ma haŋajer ya ne, ma lakkal daŋ ya ne ka maa ŋaarayroo kaŋ ay gʼa tee ma ne, agay, ni tamoo. Ay goo ma ŋaaray ni jine hõ, cijin nda zaari, Izirayel borey se, ni tamey, ka Izirayel borey zunubey har kaaray, zunubey kaŋ ir nʼi tee ma ne. Agay mo nda agay alaayaney, ir na zunubu tee.
7 Ir na goy futu-futu tee ma ne, ir mana hanga yaamarey, nda hantumey, nda hantumey kaŋ kayandi kaŋ nʼnʼi noo ni tamoo Musa se.
8 Ay gʼa wiri ni ga, ma hongu šennoo kaŋ nʼnʼa noo Musa, ni tamoo se, ni nee: ‹Waati kaŋ war na fondaa naŋ, ay ga war say-say jamawey ra.
9 Amma nda war yee kate ay ga, nda war nʼay yaamarey dii, war nʼi ka dira, woo ga, ba nda war ga mooru, war goo aduɲɲa boŋ faa ga, ay ga war marga, ay ga kate war nongoo ra kaŋ ay nʼa suuba kʼay maaɲoo gorandi a ra.›
10 Ni tamey no, ni jamaa kaŋ nʼnʼa feeri nda ni hini beeroo nda ni kabe gaabantaa.
11 Ay Koyoo, ay gʼa wiri ni ga, ma haŋajer agay, ni tamoo ŋaarayroo se nda ni tamey kaŋ ga baa ngi ma hunbur ni maaɲoo ŋaarayroo se. Ay noo hõ ya hayaa tee kaŋ agay, ni tamoo ga baa yʼa tee, daŋ aroo woo binoo ra a ma tamalla ya ne.»
Alwaatoo woo gar kaŋ ay si huga nda kala kokoyoo haŋhayey.