6
Ayuba na Elifaz zaabi
1 Ayuba zaabi ka nee:
2 «He, nda a gar ay binemaraa mma hin ka neešandi,
nda a gar ay albalaawoo mma hin ka huru neeši jinay ra,
3 nʼga gar kaŋ a tiŋ nda teekoo labutaasoo,
woo se ay šenney si ben.
4 Zama Hini-kul-koyoo biraw-izey nʼay hay,
ay hundoo ga ngi naajoo haŋ,
Irkoy gaabi hunburantey kaa ay ga.
5 Ganjifarka ga hẽe, ka gar a goo dumari firzoo game?
Haw ga booro, ka gar nga suboo goo a jine?
6 Boro ga ŋaayan tara ŋaa bila ciiri?
Tenbe goo guuri baali kaaraa ra?
7 Hayaa kaŋ ay si bagʼa,
nga ka tee ay ŋaahayaa, ba nda a si boori!
8 He! Nda ay ŋaarayroo nka yakubar,
nda a gar Irkoy nkʼay naataa too!
9 Nda Irkoy ga kayandi kʼay motti,
a ma nga kaboo šerre ka tuku ay ga kʼay benandi!
10 Woo ra ay ga duu bineyaynay,
ay ga sar nda ɲaali, ba nda ay ga dor nda nongoo kul here,
zama ya na Boro Henanantaa šenney yankar.
11 Man ay gaaboo hala ya batu?
Macin no ay hunaroo benantaa ga tiya hala ya suuri?
12 Ay gaaboo, tondi gaabi no wala?
Ay gaahamoo, alhan no wala?
13 Ya mma bara nda gaakasine wala?
Faabari mma bara ya ne koyne wala?
14 Boro kaŋ zarabi ga hima ka duu nga ceroo borohennataraa,
ba nda a nka fay nda Hini-kul-koyoo hunburaa.
15 Ay armey nʼay zanba sanda gooru,
sanda gooru kaŋ kogu.
16 Ngi harey ga ɲaami nda garey,
garoo ga haroo boobandi.
17 Amma konnoo waati i ga kogu,
konnoo gʼi kogandi ngi dogey ra.
18 Yoowey šetteyaŋ ga ngi fondaa naŋ,
i ga žigi saajoo ra ka dere.
19 Tema gandaa yoowey šettewey na ngi moɲey kanji i ga,
Šeba gandaa naarumaykey ga tammahã i ga.
20 Amma i haw kaŋ i naanay ey,
waatoo kaŋ i too kate, biney hasara.
21 Woo ti haya kaŋ war ga tiya ya ne sohõ,
war dii bonaa, war hunbur!
22 Ya nka nee kaŋ war ma zaa war almanoo ra
kʼa noo ya ne wala?
23 Ya nka nee kaŋ war mʼay kaa torrokaa kaboo ra,
kʼay kaa ay boro binekogawey kabey ra wala?
24 Wa war lakkaloo har ya ne, ay ga dangay,
wa hayaa fahamandi ya ne kaŋ ra ay firka!
25 Šenni šerrantey si boro kul maray!
Macin nda war šenney ga hima?
26 Ay šenney ga war ga šelaŋ,
boro kaŋ tammahãa hun šenney wala?
27 War ga yadda ka alkurra kar alyatim ga,
war ga war ceroo neere!
28 Sohõ, agay no war mʼay tenje kʼay guna!
Ya mma taari war se wala?
29 Ay gʼa wiri war ga, wa yee kate banda,
war masi šerretaray jaŋay tee,
wa yee kate, ay laadirtaraa goo no hala sohõ.
30 Šerretaray jaŋay goo ay deenoo ga wala?
Ay miɲoo nka si hin ka ifutu bay?»