37
1 «Woo maaganda se ay binoo ga jijiri,
a ga sar ka hun nga dogoo ra.
2 Wa haŋajer, wa haŋajer nga jindoo kaatoo se,
kaatiroo kaŋ ga hun miɲoo ra!
3 A ga nga jiŋjiŋyanoo tee beenaa kul ra,
meley ga koy hala laboo kanjey ga.
4 Woo banda ga, jinde ga kaati.
A ga nga jinde beeri albarkantaa jer,
a si yee ka meloo dii za jindoo fatta.
5 Irkoy jinde kayfantaa ga jiŋjiŋ,
a ga haya beeriyaŋ tee kaŋ ir sʼi bay.
6 A ga nee neežoo se: ‹Kaŋ laboo ga!›
A ga ncirɲi yaamar, ba ncirɲi beerey.
7 Takaa woo nda a ga adamizey goyey kayandi,
hala borey kul ma yadda nga teegoyey ga.
8 Adabbawey huru ngi tugudogey ra,
i ga cindi ngi guusey ra.
9 Hew beeroo si hun kala gurma hugoo ra,
hargoo ga hun hawsa here hewey ra.
10 Irkoy hunsaroo ga hari tee galaši,
haroo beeneheroo ga cere dii.
11 A ga duulawey jeeje nda tayroo,
a ga duulawey kaŋ ga too nda meli say.
12 Nga no mʼi bere-bere nongoo kul here,
hala i ma haya tee kaŋ nga baa,
maanaa haya kul kaŋ nga nʼa yaamar
aduɲɲa ra laboo ga.
13 A ga hima nda gobu nda a ga laboo kar,
wala mo nga borohennataraa no a gʼa cebe i se.
14 Ayuba, haŋajer woo se!
Kay ka miile Irkoy teegoy kayfantey ga!
15 Nʼga takaa bay kaŋ nda Irkoy ga duulawey juwal,
nda takaa kaŋ nda a ga duulaa meloo nerandi?
16 Nʼga takaa bay kaŋ nda duulawey ga kay ngi dogey ra,
boraa kaŋ bayraa ga timme teegoy kayfantey wey?
17 Ni kaŋ ni bankaarawey ga koron,
ka gar laboo ga tee suk gurma hewoo cire,
18 ni mma hin ka Irkoy faaba ka duulawey daaru
kaŋ ga šendi sanda diji kaŋ mennandi guuru ra wala?
19 Hayaa har ir se kaŋ ir ga hima kʼa har a se,
Ir si yee ka šelaŋ, kubay ra ir goo.
20 Nda ay šelaŋ, a ga hima ka maarʼa wala?
I ga hima ka haya har a se ka alhabar daŋ a ra wala?
21 Sohõ da ir si dii gaayoo kaŋ ga nere duulawey dumaa ga,
amma hew foo bisa kʼi tuusu.
22 Gaay kaŋ ga hima wura ga nere ka hun hawsa here.
Irkoy daržaa ga hunburandi!
23 Ir si hin ka too hala Hini-kul-koyoo do,
nga hinoo ga beeri,
nga šerretaraa nda nga laadirtaraa ga beeri,
a si boro binoo maray.
24 Woo maaganda se adamizey ga hima ka hunbur a,
amma nga, a si lakkalkoyni kul daŋ assal.»