30
1 «Amma sohõ, boroyaŋ kaŋ ay žen ey ga haaru ay ra,
ngi kaŋ ay cindi ka donda baabey
kʼi daŋ ay alman kurey hanšey ra.
2 Macin no ngi kabey gaaboo gʼa hanse ya ne?
Ngi albarkaa koy.
3 Jaŋay nda heray gʼi yalaafandi,
i ga ŋaayan ceeci labu kogaa ra
kaŋ ti nongu kogaa kaŋ ra hari sii kaŋ naŋandi za gayyan.
4 I ga saajoo fita ciiri-ciirante kaa tuuri kaccey ra kʼa ŋaa,
de mo ŋaayan sii no nda manʼti saabawey linjey.
5 I gʼi gaaray kʼi kaa adamizey ra,
i ga kaati i ga sanda zay.
6 I ga koy goro goorey tondey ra,
labu guusey nda tondi guusey ra.
7 I ga hẽe tuuri kaccey gamey ra,
i ga marga karjiɲaŋey cire.
8 Boro yaada izeyaŋ no,
boroyaŋ no kaŋ sii nda beeray.
I nʼi kar kʼi gaaray gandaa ra.
9 Sohõ, agay ti ngi doonoo,
i nʼay tee hoorayhaya.
10 I ga konna agay, i ga hibi ay ga,
i si fay nda ka tufa agay ndumoo ga.
11 Zama Irkoy kʼay biraa yorkandi,
haya kul si borey wey dii.
12 Boro laaley wey tun ka kay ya ne kʼay cewey tuti,
i ga guusuyaŋ fanši ay jine hala ya kaŋ i ra,
13 I ga fondo dunbu ay ga kʼay halaciroo ceeci,
ngi kaŋ boro kul sʼi faaba.
14 I na fun beeri kaa cetaa ra ka kaa ay ga,
i ga koy, i ga kaa sanda nongu kaŋ say ra.
15 Hunburay beeri kaŋ ay ga,
ay beeraa koy sanda subu kaŋ hewoo nʼa zaa.
Faaba kul dere ya ne sanda duula kaŋ bisa.
16 Sohõ, agay aloomuroo goo ma ben,
binekankamay zaariyaŋ nʼay dii.
17 Cijin here, farayanoo ga too hala ay birey do,
dorey kaŋ gʼay ŋaa si hunanzam.
18 Irkoy nʼay bankaaraa cendi kʼa dii nda gaabi,
a nʼay šiita nda ay burmusoo.
19 A nʼay warra batakaraa ra,
ay ga hima nda labu nda boosu.
20 Ay ga kaati ka faaba ceeci ni ga, amma nʼsi tuuru ya ne,
ay ga kay ay boŋ ga hala ma lakkal daŋ ya ne.
21 Ni bere ka binebibay ay ga,
nʼgʼay tangam nda ni kaboo gaaboo.
22 Nʼga hewoo kʼay zaa, kʼay bere,
nʼnʼay derandi hewkuroo ra.
23 Ay ga bay, ni mma mʼay ka koy buuyan ga
kaŋ ti nongoo kaŋ ra hundikoyney kul ga koy.
24 Boro kaŋ goo ma halaci si nga kabey šerre wala?
Boro kaŋ goo bone ra si kaati ka faabayan ceeci wala?
25 Ya na hẽe borey se kaŋ goo waati šenda ra wala?
Ay binoo mana maray talkaa se wala?
26 Ay ga gomni tammahã,
amma laalay ka kaa,
ay ga gaay batu,
amma kubay ka kaa.
27 Ay binoo si fay nda hẽeni,
binemarayyan zaarey gum ay ga.
28 Ay gaahamoo bibi, amma manʼti waynaa no,
ay ga tun borey margaroo ra ka faabayan ceeci.
29 Ay tee nzoŋawey armaa,
taatagawey hangasinoo.
30 Ay kuuroo ga bibi ay ga,
gaaham konnoo gʼay birey ton.
31 Ay kuntijoo si hẽe de kala buuyan dooney se,
ay laatoo si kara de kala hẽeni donkey se.»