3
Ayuba na nga hayandiroo hanoo danga
1 Woo banda ga, Ayuba na šennoo zaa ka nga hayandiroo hanoo danga.
2 Ayuba na šennoo zaa ka nee:
3 «Zaaroo ma halaci kaŋ ra ay hayandi,
cijinoo ma halaci kaŋ ra i nee: ‹Zankaaru gunde zandi!›
4 Hanoo din ma tee kubay!
Irkoy kaŋ goo beenaa ra masi fuuni a ga!
Gaay masi dii a ra!
5 Kubay biboo nda buuyan biyoo mʼa tee nga wane,
duula ma bara a boŋ kʼa daabu,
zaaroo ma tee kubay kʼa hunburandi!
6 Kubaa ma koy nda cijinoo din!
Yala a masi ɲaali jiiroo zaarey jerey bande,
yala a masi kabandi handey zaarey ra!
7 Nhuu, cijinoo din ma tee cijin gun,
yala ɲaali hoolo masi teendi a ra!
8 Yala zaarey dangakey mʼa danga,
ngi kaŋ ga soolu ka hari dragoŋoo tunandi!
9 Yala nga alfazaroo handarawey ma tee kubay!
Yala a ma gaay tammahã, amma a si kaa!
Yala a masi dii moo booyan!
10 Zama a mana gundoo daabu kaŋ ra ay hun,
hala ya si dii bonaa woo.
11 Macin se ya na buu ay ɲaa gundoo ra?
Macin se ay hundoo mana hun waatoo kaŋ ay ga fatta gundoo ra?
12 Macin se kanjeyaŋ duwandi kʼay zaa
macin se fafayaŋ duwandi kʼay naanandi?
13 Nda manʼti woo, hõ gar ay kani, ay ga lakkalkanay,
ay ga jirbi, ay ga hunanzam,
14 agay, nda kokoyey, nda aduɲɲa hoyraykey
kaŋyaŋ ga cinari kayranteyaŋ cin taaga ngi boŋ se,
15 nda boŋkoyney kaŋyaŋ goo nda wura,
de mo i ga ngi hugey too nda nzorfu kaaray.
16 Wala ya tee boro kaŋ si bara
sanda zanka kaŋ mana hayandi nda hundi kaŋ goo laboo cire,
sanda zanka kaŋ mana bay ka dii gaayoo.
17 No din ra boro laala ga fay nda boro farandiyan,
no din ra borey ga hunanzam kaŋ fara i sii nda gaabi.
18 Kasa-izey kul goo lakkalkanay ra,
i si yee ka maa ngi torrokaa jindoo.
19 Boro beerey nda ikaccey goo no din,
baɲɲaa feeri ka hun nga koyoo hinoo cire.
20 Macin se Irkoy ga naŋ boro zarabante ma hayandi?
Macin se a ga naŋ boro kaŋ ga dor ma huru aduɲɲa ra?
21 I ga buuyan batu, amma a si kaa,
i gʼa ceeci ka bisa alman.
22 I ga ɲaali ka yafarhã
nda a gar i nka huru saaraa ra!
23 Macin se boro kaŋ si bay nongu kaŋ ra a ga koy,
Irkoy gʼa šiita nongu kul here?
24 Ay gurzugaa huru ay ŋaayanoo dogoo ra,
ay kaatoo ga doo sanda hari.
25 Hayaa kaŋ ay ga hanse ka hunbur a, nga no ma duu agay,
hayaa kaŋ se ay jijiri no ma duu agay.
26 Lakkalkanay, nda alaafiya, nda hunanzamay sii ya ne,
zarabiyan no mʼay zaa ka kay.»