20
Cee hinkantoo kaŋ Sofar na šenni zaa
1 Sofar, Naama boraa zaabi ka nee:
2 «Woo se ay lakkaloo gʼay tuti ya šelaŋ,
hayey kaŋ goo ay do maaganda.
3 Ay ga maa citey kaŋ gʼay wow,
ay lakkaloo gʼay noo zaabi ka tuuru war se.
4 Nʼsi bay kaŋ za waati kul,
za adamize gorandi laboo ga,
5 boro futawey ɲaali kaatoo si kuu,
boro kaŋ si hunbur Irkoy ɲaaloo si gay.
6 Nda a kuu ka too hala beenaa,
nda boŋoo jer hala duulawey ra,
7 a ga dere hala abada sanda nga žiiboo,
borey kaŋ cindi ka dii a ga nee: ‹Man ra a goo?›
8 A ga dere sanda handiri,
boro si yee koyne ka dii a,
i gʼa gaaray sanda bangayyan kaŋ teendi cijin here.
9 Moɲey kaŋ ga dii a si yee koyne ka dii a,
nongoo kaŋ ra a ga goro si yee ka dii a.
10 Nga izʼarey ga hima ka talkey bana,
nga hunday ka hima ka nga almanoo willi.
11 Gaahamoo saabu sanda zanka,
amma a huru a bande laboo cire.
12 Nda ifutu ga kan miɲoo ra,
nda a gʼa tugu deenoo cire,
13 nda a nʼa dii, a manʼa naŋ,
nda a nʼa dii nga dankaa ra,
14 nga ŋaahayaa ga barmay teeley ra,
a ga tee gundoo ra firsaw naaji.
15 Almanoo kaŋ a nʼa gon, a gʼa yeeri,
Irkoy gʼa kaa gundoo ra.
16 A ga firsaw naajoo sunsum,
gandakarfu deene gʼa wii.
17 A si yee ka dii gooruyaŋ kaŋ ra hari goo,
nda yuu, nda waahoonu isawey.
18 A ga hayaa willi kaŋ a duu a, a sʼa dii,
a si yee koyne ka nga maamalaa albahaa ŋaa.
19 Zama a na talkey motti kʼi naŋ,
a na hugu kayri kaŋ a si yee kʼa cin.
20 A mana wasa nga haya bajoo ra,
nga almaney si hallasi.
21 Haya kul si hallasi nga ŋaayan bajoo ra,
woo se nga gomnoo si kuu.
22 Nga alman boobaa game binemarayyan ga duu a,
bonawey kul gʼa kar.
23 Ka gar a goo ma nga boŋ kungandi,
Irkoy ga nga futuroo warra a ga,
a gʼa doori nga hamoo ga.
24 Nda a zuru ka hun guuru wongu jinayyaŋ cire,
alhan biraw gʼa hay.
25 Nda a gʼa hoobu kʼa kaa nga dumaa ga,
ka guuru mee kaanaa kaa nga tasaa ra,
binedunbay ga zunbu a boŋ.
26 Kubawey kul margandi nga almanoo se,
nuune kaŋ boro manʼa diinandi gʼa wii,
woo kaŋ ga cindi nga gorodogoo ra ga ton.
27 Beenaa ga nga layboo cebe kaaray,
laboo ga tun a se.
28 Nga hugoo hayey ga tuusandi,
i ga dere Irkoy futuroo hane.
29 Woo ti bagaa kaŋ Irkoy gʼa kayandi boro futu se,
woo no Irkoy gʼa kayandi a se sanda tubuhaya.»