12
Ayuba na Sofar zaabi
1 Ayuba zaabi ka nee:
2 «Nda cimi, boro kul si too war,
nda war buu, lakkal buu!
3 Agay mo, ay goo nda lakkal sanda war,
war mana bisa agay nda haya kul.
May ka si wey cine bay?
4 Ay tee ay cerey se haarayhaya,
agay kaŋ ga Irkoy ŋaaray hala a mʼay zaabi,
boro šerrantaa, laadirantaa ti ngi haarayhayaa!
5 Borey kaŋ goo gomni ra
mma gurzugantey kaynandi,
woo ti borey kaŋ cewey ga tanši bagaa.
6 Goy futu teekey gorodogey goo baani ra,
borey kaŋ ga Irkoy futandi goo lakkalkanay ra,
kaŋyaŋ si koy bay kala ngi boŋ.
7 Ay gʼa wiri ni ga, ma adabbawey hãa, i ga ni cawandi,
beenaa cirawey hãa, i gʼa har ma ne.
8 Šelaŋ laboo se, a ga ni cawandi;
teekoo hamiisawey ga filla ma ne.
9 May ka si bay i ra
kaŋ Abadantaa kaboo ka woo kul tee?
10 Adamizey kul hunaroo sii kala kaboo ra,
nga no ma gaaham kul noo hundi.
11 Haŋa si šenney kaa cere ra,
takaa kaŋ nda deene ga ŋaayan tenbaa bay wala?
12 Aru žeeney bara nda lakkal,
aloomur kuku ga fahamay noo.
13 Irkoy kone lakkal nda hini goo,
nga wane hoyray nda fahamay.
14 Nda a kayra, boro si hin ka cina,
nda a na boro daabu, a si hin ka feerandi.
15 Nda a na haroo dii, nongoo ga kogu,
nda a nʼa taŋ, laboo ga gumandi.
16 Nga kone gaabi nda lakkal goo,
borey kaŋ dere nda borey kaŋ ga borey derandi,
i kul ti nga wane.
17 A ga kokoy hoyraykey dirandi cee koonu,
ka ciitikey lakkaley ɲaami.
18 A ga kokoyey hinoo taa i kone,
a ga gamahaw daŋ centey ga.
19 A ga sargari juwalkey naŋ cee koonu,
a ga hini gaabantey say.
20 A ga šennoo taa šenni bayraykey kone,
a ga lakkal taa aru žeeney kone.
21 A ga boŋkoyney kaynandi,
a ga hinikoyey gamahawey dunbu.
22 A ga kubay komantey cebe,
a ga buuyan biyoo daŋ gaayoo ra.
23 A ga gandawey noo gaabi, a gʼi derandi,
a ga gandawey yulwandi, a gʼi moorandi.
24 A ga cimoo taa gandawey boŋkoyney kone,
a ga fondo kul derandi i ga,
25 i ga dadaba kubaa ra bila gaay,
a gʼi ka bere-bere sanda boroyaŋ kaŋ suu.»