2
Almasihu ti ir faabakaa
1 Ay zankey, ya nka hayey wey hantum war se hala war masi duu ka zunubu tee. Amma nda boro na zunubu tee, faabakaw goo ir se Baaba Irkoy jeroo ga kaŋ ti Isa Almasihu kaŋ ti Boro Šerrantaa.
2 Nga no ka nga boŋ noo kʼir zunubey tuusu, manʼti ir hinne zunubey, amma aduɲɲa kul waney.
3 Hayaa kaŋ ga kate ir ma bay kaŋ ir gʼa bay manʼti kala nda ir ga nga yaamarey dii.
4 Boro kaŋ nee nga gʼa bay, ka gar a si nga yaamarey dii, boraa manʼti kala taariharkaw, cimoo sii a kone.
5 Amma boro kaŋ ga nga šennoo dii, nda cimi Irkoy bajoo tabati boraa ra. Woo no ma kate ir ma bay kaŋ ir goo a ra.
6 Boro kaŋ nee nga ga duumi a ra ga hima ka dira nda takaa kaŋ nda a dira.
Yaamar taaga
7 Ay baakey, manʼti yaamar taaga no ay gʼa hantum war se, yaamar žeena no kaŋ war duu a za sintinoo ga. Yaamar žeenaa woo manʼti kala šennoo kaŋ war maarʼa.
8 Nongu foo ra yaamar taaga no kaŋ ay gʼa hantum war se, cimi no war nda nga here, zama kubaa ga koy, de gaay cimoo bangay ka ben.
9 Boro kaŋ nee nga goo gaayoo ra, ka gar a ga konna nga armaa, boraa goo kubaa ra hala sohõ.
10 Boro kaŋ ga baa nga armaa ga duumi gaayoo ra, haya kul sii a ra kaŋ gʼa kaŋandi.
11 Boro kaŋ ga konna nga armaa sii kala kubaa ra, a si dira kala kubaa ra, a si bay nongu kaŋ ra nga ga koy, zama kubaa nka moɲey danandi.
12 Ay zankey, ay ga hantum war se,
zama war zunubey yaafandi Isa maaɲoo albarkaa ra.
13 Baabey, ay ga hantum war se,
zama war ga boraa bay kaŋ ga bara za sintinoo ga.
Arusoogey, ay ga hantum war se,
zama war hin boro laalaa kaŋ ti Ibilisi.
14 Zanka kaccey, ay hantum war se,
zama war ga Baaba Irkoy bay.
Baabey, ay hantum war se,
zama war ga Boraa bay kaŋ ga bara za sintinoo ga.
Arusoogey, ay hantum war se,
zama war ga gaabi,
Irkoy meešennoo ga duumi war ra,
de mo war hin boro laalaa kaŋ ti Ibilisi.
15 War masi baa aduɲɲa, war masi baa hayey kaŋ goo aduɲɲa ra. Nda boro ga baa aduɲɲa, Baaba Irkoy bajoo sii boraa ra.
16 Zama hayey kul kaŋ goo aduɲɲa ra, maanaa gaaham boonay futaa, nda moo boonay futaa, nda aduɲɲa bolsaa, si hun Baaba Irkoy do, amma aduɲɲa ra i ga hun.
17 Ka gar aduɲɲa ga bisa, nga nda nga boonay futaa, amma boro kaŋ ga Irkoy ibaayoo tee ga duumi hala abada.
Almasihu iberoo
18 Zanka kaccey, waati koraa no, war maa kaŋ Almasihu iberoo ga kaa, ka gar sohõ da Almasihu iberi booboyaŋ ga bara, woo no mʼir ka bay kaŋ waati koraa no.
19 Ir ra i hun, amma nda cimi, i sii ir ra. Zama nda a gar i mma bara ir ra, i ga duumi ir bande. Amma woo teendi hala a ma henan kaŋ ngi affoo kul sii ir ra.
20 War, war duu Irkoy Boro Henanantaa yonyanoo, war kul goo nda bayray.
21 Manʼti ya nka hantum war se, zama war si cimoo bay, amma ya nka hantum war se, zama war ga cimoo bay, de mo taari kul si hun cimi ra.
22 May ti taariharkaw nda manʼti boro kaŋ ga Isa almasihutaraa yankar? Boraa din ti Almasihu iberi, a ga Baaba Irkoy nda Izʼaroo yankar.
23 Boro kul kaŋ na Izʼaroo yankar, boraa sii Baaba Irkoy bande. Boro kaŋ yadda Izʼaroo ga goo Baaba Irkoy mo bande.
24 War, hayaa kaŋ war maarʼa za sintinoo ga ma duumi war ra. Nda hayaa kaŋ war maarʼa za sintinoo ga, ga duumi war ra, war mo, war ga duumi Izʼaroo nda Baaba Irkoy ra.
25 Allaahidoo kaŋ a nʼa zaa ir se manʼti kala hunayan abadantaa.
26 Borey kaŋ ga baa ngi ma war derandi sabbu se ay na hayey wey hantum war se.
27 War, yonyanoo kaŋ war duu a a ga, ga duumi war ga, a si too boro ma war cawandi. Zama yonyanoo ga haya kul cawandi war se, cimi no, a si taari, takaa kaŋ nda a na war cawandi, war ga duumi Almasihu ra.
28 Sohõ, zankey, wa duumi Almasihu ra, nga kaayanoo ga, waati kaŋ a ga kaa ka bangay, ir lakkaley ma kani, ir masi haw a jine.
29 Nda war ga bay kaŋ Almasihu ga šerre, war ma bay nga ka boro kaŋ ga goy nda šerretaray hay.