33
Musa gaara Izirayel alkabiila woy cindi hinkaa (12) se
1 Gaararoo ne kaŋ nda Musa, Irkoy boraa, gaara Izirayel se za a mana buu.
2 A nee:
«Abadantaa hun Sinay tondi hondoo do ka kaa,
a tun Seyir ka koy i do.
Paraŋ tondi hondoo boŋ a bangay nga daržaa ra,
a fatta boro henanante zenber woy woyyaŋ ra.
Nga kabe hennaa ga a na ašariyaa kaŋ ga dii ma nee nuune sanba i se.
3 Abadantaa ga baa jamawey,
nga boro henanantey kul goo ni kaboo ra.
I kay ni cewey cire,
i ga ni šenney taa.
4 Musa na ašariyaa noo ir se,
Yakuba jamaa mayraa no.
5 A mana cindi ka tee kokoy kala Yešurun
waatoo kaŋ jamaa boŋkoyney nda Izirayel alkabiilawey ga marga.»
6 Yala Rubeŋ ma huna, yala a masi buu,
ba nda nga borey hinnaa ga kacca.
7 Hayaa ne kaŋ a nʼa har Žuda ga, a nee:
«Abadantaa, haŋajer Žuda jindoo se,
ma kate a nga dumoo do.
Yala nga kabey ma kay a se,
yala ma kaa kʼa faaba kʼa kaa nga iberey kone.»
8 Lewi ga, a nee:
«Abadantaa, ni alkurraa goy jinawey kaŋ ti Tumim nda Urim mana talfandi kala boraa ga kaŋ laadir ni here,
boraa no kaŋ nʼnʼa sii Masa (maanaa ‹siiyan›),
boraa kaŋ ga nʼna yenje wiri Meriba (maanaa ‹yenje›) haroo do.
9 Boraa no kaŋ ga šelaŋ nga ɲaa nda nga baaba ga ka nee: ‹Ay sʼi guna!›
Boraa no kaŋ si nga armey bay, a si nga izey bay.
Zama i na ni šenney dii, i na ni amaanaa dii.
10 I ma ni fondawey cawandi Yakuba se
ka Izirayel cawandi ni ašariyaa.
Yala i ma dugu daŋ ni niinoo cire,
i ma sargari kaŋ tonandi hala a ma ben daŋ ni sargari tonadogoo ga.
11 Albarka ma huru nga gaaboo ra, Abadantaa,
yadda nga kabe goyoo ga.
Ma borey kaŋ ga kay a se nda wey kaŋ ga konna a centey kayri,
yala i masi yee ka tun.»
12 Benžameŋ ga, a nee:
«Abadantaa baakaa no,
a ga goro jeroo ga nda baani,
waati kul Abadantaa gʼa hawgay,
Abadantaa jesey ra a ga goro.»
13 Isufi ga, a nee:
«Abadantaa na albarka daŋ nga gandaa ra nda beenaa gomnoo,
nda harandaŋoo nda gandaa guusoo haroo,
14 nda waynaa gomney,
nda hayaa kaŋ ga zay ka nin handu kul ra gomney,
15 nda cee jinaa tondi hondey haya henney,
nda hondey kaŋ ga bara waati kul gomney,
16 nda laboo nda haya kul kaŋ goo a ra gomney.
Yala Irkoy kaŋ ga goro saabayɲaŋoo ra alhormaa ma bara Isufi boŋoo ga,
nga armey boŋkoynoo teɲaa ga!
17 Nga haw yaaroo ize jinaa no, darža ma bara a ga.
Nga hilley si hima nda kala ganjihaw hilliyaŋ.
Ngi nda a ga dumey kar, laboo kanjey kul.
Woo ti Efrayim boro zenber woy woyyaŋ,
woo ti Manase boro zenberyaŋ.»
18 Zabuloŋ ga, a nee:
«Ɲaali Zabuloŋ, ni naarumawey ra,
ni mo Isakar, ma ɲaali ni hukkumey ra.
19 I ga ciya jamayaŋ se tondi hondoo boŋ.
No din ra i ga šerretaray sargariyaŋ kaa,
zama i ga teekoo gomni beeroo nda almaney kaŋ ga tugu labutaasoo ra ka huna.»
20 Gad ga, a nee:
«Albarka ma bara boraa se kaŋ ga Gad feeri!
A ga kani sanda ganjihayla woy,
a ga nga hamoo kaboo nda boŋkurunboo kottu.
21 A ga haya jina-jinawey suuba nga boŋ se,
zama no din ra boŋkoynoo hayey ga tugu,
a ga dira jamaa jine,
a goy nda Abadantaa šerretaraa,
a goy nda woo kaŋ ga hima Izirayel here.»
22 Dan ga, a nee:
«Dan manʼti kala ganjihayla-ize
kaŋ ga sar ka fatta Bašaŋ.»
23 Neftali ga, a nee:
«Neftali kungu nda alhormo nda Abadantaa albarkaa,
ma waynakaŋay nda gurma mayray.»
24 Ašer ga, a nee:
«Albarka ma huru Ašer ra Yakuba izey game.
A ma duu gaakuri nga armey ra, cewoo ma miti jiyoo ra.
25 Ni hugu mee daabuhayey ma tee guuru nda alhan.
Ni gaaboo ma duu aloomur.»
26 «He Yešurun, boro kul si hima nda Irkoy.
A ga zunbu ka hun beenaa ra duula ga
ka kaa ka ni faaba nga daržaa ra.
27 Irkoy kaŋ gay a ga bara manʼti kala tugudoo,
waati kul a goo goyoo ga,
a na iberoo gaaray ni jine
ka nee ma ne: ‹Mʼa halaci!›
28 Izirayel ga goro nda lakkalkanay.
Yakuba hariɲaŋoo sii kala jere ga alkama nda alaneb hari ganda ra,
nga beenaa ga harandaŋ zumandi.
29 Nʼduu gomni, Izirayel!
May no ma hima ni,
jama kaŋ Abadantaa nʼa hallasi nda nga koraa nda nga takuba daržantaa?
Ni iberey ga kaa ka ngi boŋ yeeti ganda ma ne,
nʼga ngi hodaddawey taama-taama.»