3
Juwau Bhatixta Asasasanyira Njira
(Mt 3:1-12; Mk 1:2-8)
1 Pa caka ca cikhumi na pixanu ca umambo wa Tibheryo Sezari, Ponsyo Pilato mbali ntongi wa Djudeya, Herodhi mbali ntongi wa Galileya, m'bale wace Herodhi anacemerwa Filipi mbali ntongi wa Itureya na Tarakonite, Lizanya mbali ntongi wa Abhileni,
2 Anasi na Kaifasi mbali akulu aanyantsembe. Ndi caka ceneco cidalonga Mbuya n'thando kuna Juwau mwana Zakariya.
3 Juwau afamba cisa consene dhuzi na nyanza ya Djorodani, mbakhamwaza mphangwa izi: “Tambirani batixmu, ninga cidzindikiro ca kuchunyuka toera kulekererwa kudawa.”
4 Ipi pyacitika ninga mudapilembera mporofeta Izaiya m'bukhu mwace mbalonga tenepa:
“Alipo anakhuwa n'thando kuti:
‘Sasanyirani njira
toera Mbuya apite nayo.
Nfungulireni
miseu ya kulungama.
5 Magowa onsene anatutirwa.
Mapiri na nthunda zonsene
zinazerezwa.
Miseu ya magurayi inalungamiswa,
njira za makolong'ondo
zinazerezwa.
6 Anthu onsene
anati aone kupulumusa kwa Mulungu.’ ”
7 Juwau akhapanga mwinji wa anthu ukhabwera katambira Batixmu kuna iye, mbalonga tenepa: “Dzindza ya nyoka! Mbani akupangani kuti muthawe nyatwa zinafuna kudza?
8 Citani pinthu pinapangiza kuti imwe mwachunyukadi. Lekani kunyerezera mbamulonga mwekhene m'bodzi na m'bodzi kuti: ‘Ife ndife ana a dzindza ya Abharaamu.’ Thangwi ine ndisakupangani kuti Mulungu ana mphambvu za kusanduza myala iyi, kuti ikhale ana a dzindza ya Abharaamu!
9 Mbadzo yamala kusasanyirwa toera kugwanda nayo miti na michici ene. Na tenepo, muti onsene unakhonda kubala misapu yadidi, unagwandiwa mbuponyiwa pa moto.”
10 Penepo mbumba ikhabvundzisa Juwau Bhatixta mbilonga kuti: “Mphapo tisatongwa ticitenji?”
11 Apo Juwau aatawira tenepa: “Ana nguwo ziwiri, mbapasembo ibodzi ndzace adaisowa. Pontho ule ana ca kudya mbagawirane na ule adasowa ca kudya.”
12 Penepo, anango anyakukumbusa misonkho afikambo kuna Juwau toera kutambira batixmu, mbambvundza kuti: “Mpfundzisi, ndi ninji pinatongwa ife kucita?”
13 Juwau aatawira tenepa: “Kumbusani ntengo unalonga mwambo basi.”
14 Na tenepo, anyakhondo anango akhabvundzisambo kuti: “Kodi ife, tisatongwa ticitenji?”
Penepo Juwau aatawira kuti: “Lekani kukwatira munthu kobiri yace na mphambvu, peno kumulongera pya uthambi. Mbwenye komerwani na ntengo wanu unatambira imwe.”
Umboni wa Juwau Bhatixta
15 Na tenepo, mbumba yatoma kukhala na cidikhiro cikulu, mbakhanyerezera kuti panango Juwau Bhatixta ndiye Kirixtu.
16 Penepo Juwau aapanga anthu onsene kuti: “Ine ndisakutambirisani batixmu na madzi, mbwenye ali kubwera munthu wa mphambvu ya utongi kakamwe kupita ine. Pontho ine sine munthu kuti ndinakwanisa kunsudzula mithambo ya ntsapato zace. Unowu anakutambirisani batixmu na Nzimu wa Mulungu na moto.
17 Iye ana foxolo m'manja mwace toera kucenesa pa mbuwa, na kuikha tirigu n'cikwa. Mbwenye anapisa maudzu na moto wakukhonda kuthima.”
18 Juwau akhalanga mbumba na mafala anango mazinji, na kuapanga Mphangwa Zadidi.
19 Mbwenye iye asandika Herodhi na thangwi ya Herodhiya, nkazi wa m'bale wace Herodhi, pontho na thangwi ya pyonsene pya kuipa pikhacita iye.
20 Pontho Herodhi adza kathimiza kucita pya kuipa pikulu kakamwe, pa kupitisa Juwau n'kaidi.
Batixmu ya Yezu
(Mt. 3:13-17; Mt. 1:1-17; Mk.1:9-11)
21 Pidamala mbumba yonsene kutambira batixmu, Yezu aendambo katambira batixmu. Apo penepo, Yezu pikhaphembera iye, thambo yafunguka.
22 Na tenepo, Nzimu wa Mulungu waoneka mbuchita buluka kudzulu ninga nkhangaiwa, mbumphamira. Penepo, kudzulu kwabuluka fala, mbilonga tenepa: “Iwe ndiwe Mwana wanga wakufunika, ananditsandzaisa.”
Dzindza ya Yezu
23 Yezu pidatoma Iye kuphata basa, akhatamangira pyaka makumatatu pya kubalwa. Iye akhali mwana wa Zuze, ninga mukhanyerezera anthu.
Zuze akhali mwana wa Eli,
24 Eli akhali mwana wa Matati,
Matati mwana wa Levi, Levi mwana wa Meliki,
Meliki mwana wa Djanai, Djanai mwana wa Zuze,
25 Zuze akhali mwana wa Matatiya,
Matatiya mwana wa Amosi,
Amosi mwana wa Naumi, Naumi mwana wa Esili,
Esili mwana wa Nagai,
26 Nagai akhali mwana wa Maate,
Maate mwana wa Matatiya,
Matatiya mwana wa Semeyi,
Semeyi mwana wa Zuze, Zuze mwana wa Djuda,
27 Djuda akhali mwana wa Juwanaa, Juwanaa mwana wa Resa,
Resa mwana wa Zorobhabheli,
Zorobhabheli mwana wa Salatiyeli,
Salatiyeli mwana wa Neri,
28 Neri akhali mwana wa Meliki,
Meliki mwana wa Adhi, Adhi mwana wa Koza,
Koza mwana wa Elimadha, Elimadha mwana wa Eri,
29 Eri akhali mwana wa Djoswee, Djoswee mwana wa Eliyezeri,
Eliyezeri mwana wa Djorimi, Djorimi mwana wa Matati,
Matati mwana wa Levi,
30 Levi akhali mwana wa Simiyau,
Simiyau mwana wa Djuda, Djuda mwana wa Zuze,
Zuze mwana wa Djonani,
Djonani mwana wa Eliakimu,
31 Eliakimu akhali mwana wa Meleya, Meleya mwana wa Mena,
Mena mwana wa Matata, Matata mwana wa Nata,
Nata mwana wa Dhavidhi,
32 Dhavidhi akhali mwana wa Djese,
Djese mwana wa Obhedhi, Obhedhi mwana wa Bhowazi,
Bhowazi mwana wa Salomau,
Salomau mwana wa Naasomi,
33 Naasomi akhali mwana wa Aminadhabhi,
Aminadhabhi mwana wa Adhimimi, Adhimimi mwana wa Arini,
Arini mwana wa Exzoromi, Exzoromi mwana wa Peresi,
Peresi mwana wa Djuda,
34 Djuda akhali mwana wa Djakobo,
Djakobo mwana wa Izaki,
Izaki mwana wa Abharaamu,
Abharaamu mwana wa Tera, Tera mwana wa Nakori,
35 Nakori akhali mwana wa Seruge,
Seruge mwana wa Ragauu,
Ragauu mwana wa Faleki, Faleki mwana wa Ebheri,
Ebheri mwana wa Sala,
36 Sala akhali mwana wa Kainaa,
Kainaa mwana wa Arifaxadhe, Arifaxadhe mwana wa Semi,
Semi mwana wa Nowa, Nowa mwana wa Lameki,
37 Lameki akhali mwana wa Metusalemi,
Metusalemi mwana wa Enoki,
Enoki mwana wa Jaredi,
Jaredi mwana wa Maalaleeli,
Maalaleeli mwana wa Kainaa,
38 Kainaa akhali mwana wa Enosi,
Enosi mwana wa Seti, Seti mwana wa Adhamu,
Adhamu mwana wa Mulungu.