9
Nanxintu Shentulade Ogiku
1 Shentulade banman gieku shiqinyi kieliese bi tande xin huaiku biyo uwo.
2 Tande gou zhughe bikui bi mejiene. Bi Maqidun kunlade Yagaiya kunla udai honse zhunbei giezho giezhi tai kuaizho. Tai rexin olon kunlai zhughei gojiolughazho.
3 Ede bi hhe giedun gaijiulai peizhi echighakushi zhao mii kielienzhe tai zhunbei gie goudaghane giezho. Pse bijien ene shiqin jiere tai kuaisan belienni gholune.
4 Babuchu Maqidun kunla mare hhantu echizhi ta ese zhunbei giesei chanlase ta shizhekui pse bu kielieye, bijien tai xianxin giesan shizhekui gholune.
5 Ingiese bi sumulase hhe giedun gaijiui xien peizhi tai hhende echighazhi ta dain giesan olon mureni zhunbei gie goudagha giezhi goude kielieku biyo wine. Ingiezhi giese ta khireighasanshi biisan pusho, duranzhe giesan wo.
6 Eneshijiu choghon tareisan choghon ghurane, olon tareisan olon ghurane giesan wo.
7 Jien kun zhughedene jiejin giesan mutun ogikuni wo. Chijia bu tei, ye bu bii. Duranzhe khireighasan kunlade Huda xiqi wo.
8 Huda yanyanji nenjienlai tande olon ogizhi yandeliuzhe chan kurughazhi yanyanji gou shiqinni tai olon gieghane.
9 Jinwun jiere jilasan mutun, "Hhe dafande nanxin kunlade ogizho, hhei gundan chanqi wine."
10 Tareisan kunde fure ogisan, kunde ijiuni ogisan Huda tareiku fureni tande ogizhi olodoghane, ta giesan gundan wiliede jiego olon khizheghane.
11 Tai gofanmiende bayazheghazhi suishisui dafande kunlade ogighane. Ingiezhi bijien giesan wiliei tungo giezhi Hudade mafan kielieghane.
12 Ene banman gieku shiqinyi giezhi zinie shentulade chaisei buisan pusho, olon kunlai Hudade mafan kielieku tebie olodoghazho.
13 Ta Mexihai gouxioxii chenren giezhi shunjizhi hhelade, pse olon kunlade dafande ogiku wiliei hhela kaoyen giedene Hudai kuaizho.
14 Huda tande tebieji fugie nenjien ogizho. Ingiese hhela tande oluzhi onxian giezhi tai sanazho.
15 Nenjienyini kieliezhi baragha daku Hudade mafan kielieye!