53
(Ma-arì ikompara ha Kanta 14)
(Kanta ni Dabid ya pakapowotan aral)
Hay kala-etan nin tawtawo
1 Hay tawoy maghalità ha sarili na nin, “Ayin Diyos!” ay talagan tangah. Hay tawtawoy ombayro ay talagan mala-et, boy hay gawgawà la ay poro kala-etan; ayin ana konla nin ampanggawà kahampatan.
2 Hay Diyos ya anti ha katatag-ayan ha kama-inan na ay ampanlonglong ha tawtawo ta an-imatonan na no ma-in et nin tawtawoy ampaka-intindi nin kaptegan, boy no ma-in nin ampag-apeh nin makabalay kona.
3 Kaganawan ay ampakarayò ha Diyos ta ampagpakala-et hila. Ayin ampanggawà nin kahampatan; ayin ni miha.
4 Hay pastang nin Diyos ay ombayri: “Kaganawan nayì nin ampipanggawà kala-etan ay ayin tinandà? Hay tawtawo ko ay anggaw-an lan mala-et ta ombayro ya natoral la, boy aghila ampakirawat kongko.”
5 Hay mangala-et ay masyadon nikalimo maski ayin dapat kalimowan. Hay Diyos ay nangikakatak nin bawbot-o nin nipangalaban komoyo; impareng-ey moyo hila, ta hila ay ahè tinanggap nin Diyos.
6 Dayi, hay kalibriyan nin Aw-israylita ay mangibat ha dogal ya an-ingaten Siyon ya kama-inan nin Diyos. No mambin oman ya Diyos nin ka-inomayan ha tawtawo nay Aw-israylita ya inalalak ni Hakob, dayi, hila bayti ay mipagtowà.