47
(Kantan aw-inalalak ni Kori)
Diyos ya Pinakamakapangyariyan ya ampamo-on
1 Kaganawan tawo ay magtimpà! Mipambo-angaw kawon ma-in katowa-an ha pamomori moyo ha Diyos!
2 Hay Pangino-on ya Pinakamakapangyariyan ay dapat igalang; hiya ya Arì ya ahè mapantayan ya ampamo-on ha intiron babon lotà.
3 Hitamo ya papanalowen na ha tawtawo, boy hay nawnasyon ay igwà na ha pamama-alà tamo.
4 Hiya ya namilì nin dogal ya ampa-iriyan tamo, boy habayti ay ikapori ni Hakob ya ka-apo-apowan tamo ya nilabi na.
5 Ha pagbira nin Pangino-on Diyos ha katatag-ayan, hay tawtawo ay mipambo-angaw, boy ma-in kasabay ya tonoy nin tamboyok ha katowa-an la banà ha pananalo la.
6 Magkanta tamon maganday kanta ya pamomori ha Diyos; magkanta tamon pamomori kona ya Arì tamo!
7 Hay Diyos ay Arì ha intiron babon lotà; magkanta tamon maganday kanta ya pamomori kona.
8 Hay Diyos ya ayin kapintasan ay ampiknò ha trono na nin ampamo-on ha nawnasyon.
9 Hay tawtawoy ampipamo-on ha nawnasyon ay ampakitipon ha tawtawo nin Diyos ya pinahimala-an ni Abraham; hay hawhalanggà ya anggamiten nin mawmamakigira ay ikon nin Diyos. Hiya ya dapat itag-ay.