146
Poriyen ya Pangino-on ya mapangilibri
1 Poriyen moyoy Pangino-on.
Poriyen koy Pangino-on.
2 Leleg kon angkabiyay ay mamori ko ha Pangino-on. Hiya ya Diyos ko ay kantawan kon pamomori anggan ma-in akon biyay.
3 Agkawo pahimalà ha ampipamo-on, o ha hinoman ya ahè makapilibri komoyo.
4 Pangati la, hay nawini la ay morong mag-in lotà; ha allon habayto, hay pawplano la ay ma-anggawan ana.
5 Makalmà ya tawoy antambayan nin Diyos ya pinahimala-an nin aw-inalalak ni Hakob; makalmà ya ta an-omasa ya ha Pangino-on ya Diyos na.
6 Habayti ya Diyos ya namalsa nin langit, lotà, dagat, boy kaganawan nin anti bayro, boy hiya ya Pangino-on ya tapat ha pawpangakò na.
7 Kahampatan ya an-ihosga na ha ampika-apih boy ambiyan nan pamamangan ya ampikabitil.
Hay Pangino-on ay ampamalayà nin pawpiriso.
8 Hay bawbowag ay ampakahampaten na emen makakit, antambayan nay mangama-in problima, boy anlabiyen nay mangahampat ya tawtawo.
9 Amprotiksyonan nay dawdayowan, antambayan nay aw-olila boy bawbawoy babayi, boy anhira-en nay pawplano nin mangala-et.
10 Hay Pangino-on ay ayin anggay pamomo-on. Hiya ya Diyos ya ampamo-on ha tawtawo na ha dogal ya an-ingaten Siyon boy ha mipanhomono ya lawlahì.
Poriyen moyoy Pangino-on.