14
(Ma-arì ikompara ha Kanta 53)
(Habayti ay hinolat ni Dabid)
Ayin tawoy mahampat
1 Hay tawoy maghalità ha sarili na nin, “Ayin Diyos!” ay talagan tangah. Hay gawgawà nin tawtawoy ombayro ay talagan mala-et boy poro kala-etan; ayin ana konla nin ampanggawà kahampatan.
2 Hay Pangino-on ya anti ha katatag-ayan ha kama-inan na ay ampanlonglong nin ampangimaton no ma-in et nin tawtawoy ampaka-intindi boy ampag-apeh nin makatandà nin tongkol ha Diyos.
3 Kaganawan ay ahè labay pakarani ha Diyos ta ampagpakala-et hila. Ayin ampanggawà nin kahampatan; ayin ni miha.
4 Hay pastang nin Pangino-on ay ombayri: “Kaganawan nayì nin ampanggawà kala-etan ay ayin tinandà? Hay tawtawo ko ay anggaw-an lan mala-et, boy aghila ampakirawat kongko.”
5 Hay mangala-et ay masyadon nikalimo ta hay Diyos ay anti ha tawtawoy ma-in kahampatan.
6 Ampagsistiyan nin mangala-et ya pawplano nin aw-apih, piro hay aw-apih ya ma-in pamahimalà ha Pangino-on ay an-i-atap na.
7 Dayi, hay Pangino-on ay mangilibri nin Aw-israylita. No mambin oman ya Pangino-on nin ka-inomayan ha tawtawo na, hay aw-inalalak ni Hakob ya ayin kanayon no alwan Aw-israylita ay mipagtowà.