128
(Kanta ya angkantawen mintras ampako ha bali nin Diyos)
Hay anhomonol ha Pangino-on ay ampagkama-in kahampatan
1 Makalmà ya kaganawan tawoy anggomalang ha Pangino-on boy anhomonol ha an-ipanogò na.
2 Hika ay magkama-in nin ikabiyay ha pagtatarabaho mo; kayà lomiga ka boy magkama-in kan ka-inomayan.
3 Hay ahawa mo ya anti ha bali mo ay mag-in nin bilang ha mabongay obas, boy hay aw-anak mo ay bilang ha mangalagò ya kayoy olibo ya anti ha mamalibot nin lamisawan mo.
4 Ombayro ya kahampatan ya mangyari ha lalaki ya anggomalang ha Pangino-on.
5 Dayi, hay Pangino-on ya anti ha siyodad nin Siyon ay mambi komo nin kahampatan; boy dayi, habaytoy siyodad nin Siyon ya an-ingaten et Hirosalim ay makit moy ampag-inomay leleg mon angkabiyay.
6 Dayi ay lomawig ya biyay mo emen mo makit et ya aw-apò mo.
Dayi ay magkama-in katinekan ya aw-inalalak ni Israyil.