111
Poriyen ya Pangino-on nin banà ha kahampatan na
1 Poriyen moyoy Pangino-on.
Hay Pangino-on ay pasalamatan ko nin lobos ha nakem ko ha pamititipon nin tawtawoy ma-in kahampatan.
2 Hay gawgawà nin Pangino-on ay ahè mapantayan. Habayti ay labay ma-intindiyan nin kaganawan ampangonsowilo bayri.
3 Ponò karangalan boy kagandawan ya gawgawà na boy ayin anggay kahampatan na.
4 Hay kawkapapa-ispantay gawgawà nin Pangino-on ay pirmi nan an-ipapanemteman. Hiya ay mahampat boy ma-ingangalowen.
5 Ambiyan nan pamamangan ya ampipanggomalang kona, boy hay ayin anggay kasondo-an na ay agna anliwawan.
6 Impakit nay kapangyariyan nin gawgawà na ha Aw-israylita ya tawtawo na ha pangigwà na konla nin dogal ya an-ingaten Kana-an nin pag-ikon la ya ampag-ikonen pon nin kanayon ya tawtawo.
7 Hay gawgawà nin Pangino-on ay ma-in kaptegan boy matoynong; kaganawan an-ipanogò na ay mapahimala-an.
8 Habayti ya an-ipanogò na ay manatili nin ayin angga ta habayti ay ginawà nin ma-in kaptegan boy kahampatan.
9 Inlibri nay tawtawo na, boy nanggawà yan ayin anggay kasondo-an konla. Hiya ay ayin kapintasan boy dapat igalang.
10 Hay ona nin gaw-en emen domonong ay igalang ya Pangino-on; kaganawan anhomonol ha an-ipanogò na ay ampagkama-in pangingintindi. Hiya ay dapat poriyen nin ayin angga.