101
(Kanta ni Dabid)
Hay pawpangakò nin arì ya pag-ogali-en na
1 Pangino-on, hay kantawen ko ay tongkol ha ingangalo moy ma-in panlalabi boy tongkol ha katoynongan mo. Magkanta kon pamomori komo.
2 Ogali-en kon mamiyay nin ahè mapintasan. Makano mo ko pakaraniyan?
Ipakit ko ha pamilya ko ya hiko ay mamiyay nin ma-in kalinisan nakem.
3 Agko konsintiyen ya kala-etan.
Hay gawgawà nin tawtawoy alwan tapat ay angka-inakitan ko. Agko ma-arì nin makilamo konla.
4 Pakatapat ako boy agko mangihip o manggawà nin kala-etan.
5 Hay tawoy sikriton ampanirà nin kapara na ay agko konsintiyen; agko simpri konsintiyen ya tawoy mapagmalhay boy mahambog.
6 Hay tawtawo balè ya mapahimala-an ay payagan kon pa-iri ha dogal ya habayti, boy hay talagan tapat ay payagan kon magsirbi kongko.
7 Hay tawtawoy alwan tapat ay agko payagan pa-iri ha bali ko; ombayro simpri ha mangabongkok.
8 Allo-allo, alihen koy kaganawan mangala-et ha dogal ya habayti. Hay ampipanggawà kala-etan ay pa-alihen ko bayri ha siyodad nin Pangino-on.