6
Kosiɗ ci nik ñaam
1 Kosiɗ ci nik ñaam jen joyiɗ amb ne heɗ ciŋ ɓa eɗaah cir keeh-keeh po tiikiŋ Kooh na ini ɓoo jangɗoh woysuu moɗaaɗi.
2 Ɓi raak heɗ kosiɗ, eɗaat ɓa cir, ɓa sang ɓa heef ŋ ini ɓa nik ɓaah ciŋ ɓa kotii. Ɓa joy ɓa uup ñaamuk ŋ ini ɓa nik kosiɗ na waaɗuuɗ ciŋ Kooh ne heɗ ciŋ ɓa rahas njirñiŋ pangkiŋ ɓa.
Jangɗoh ci nikɗi keeh na alali keeh-keehi
In ceem jen ceɗ fu joy jangɗoh te fu nakoh ca.
3 Wa raak ɓoyi na jangɗohe in wiiriis te a taambiɗɗi woo ci wiriɗ ciŋ Heɗ ɓoo Yeesu Kiristaa na jangɗohi hun na yakiɗ Kooh ɗah,
4 ɓoyeem, a ɓo' riifiɗ na yeg haf ce. A ɓo' inhaaɗi, a raak kosaay woo, a na taastiɗohe ŋ ini kaɗ ŋ toksiŋ woo ci. Te ineem na rime siisoh na lahtoh na ɓasoh na liiɓ moɗaaɗi.
5 Wa ɓayee taasoh ci minɗi reeh ŋ harmban ɓo' ci fu inah ne liiɓohaaciŋ ɓa tiindisɗi. Ɓa hotisɗi keeh ki te ɓa liiɓ ne kos Kooh raakoha alal.
6 Wa keeh ne kos Kooh, wa raak-raak yakak, nik ne fu doyɗukiɗ ŋ ini fu raak ɗah.
7 Ɓoo hayɗi na ali in ŋ Adina te ɓoo minɗi coottoh ali in nga.
8 Kon ɓoo raak kañam na ɓekkaah na genoha ɗah, ineem joyiɗ ɓoo doy.
9 Waaye ɓi na waake raak-raak laayiɗ, ɓa na keene ŋ kafind ci na fiir ci, te waaɗ-waaɗ ciŋ ɓa naandtiɗohaaci laayiɗ ci, ca na yahrohe yahroh. Waaɗ-waaɗ ceem na ɓekee ɓooɓi ŋ sooƴ na boomu.
10 Findi ɓooɓa na woyohee wa, « Waaɗ kopor weɗ na rime moɗaaɗi nu nik. » Ɓum na waakee wa waak miskiɗ, tahha po ɓa muuƴiɗ po ɓa usiɗ kos te ɓa ɓekiɗ haf ɓa tiis laayiɗ.
Leberi baahiɗi
11 Waaye fu, ɓoyiŋ Kooh, nupa in ceem. Gena ndengɗuk ne fu nik ɓo' yurhiɗ, fu taambɗee Kooh, wa hun na kos na waaɗoh na muñ na soos.
12 Lebera leberi baahiɗi, leberi kosiŋ ɓoo meeksoh, fu raak kipes ki heyɗi reehe, weɗ tah Kooh ɓeeɗuk ɗa. Kipes keem, weɗ fu seede seede moɗiɗ ŋ fiki mboolo laayiɗ.
13 Ŋ fiki Kooh, yi na eɗe in ci jen kipes na fiki Kiristaani Yeesu yi seede seedeeni moɗiɗi ŋ fiki Ponse Pilaat, mi yii nak ɗa ne :
14 Amba nakohi fu rahas te fu ris hooliɗ, fu raakuu woyɗaah moɗaaɗi, po mbaɗna Heɗ ɓoo Yeesu Kiristaa teeɓkohan ;
15 te teeɓkoheem, a Kooh tumana ŋ jamanooni a amb.
A Kooh Heɗ Jam
te a yi dong Heɗ Hatil,
Buuriŋ buur ci,
Heɗiŋ heɗ ci.
16 Kaanaaɗi, a yi dong raaka.
A gen ŋ ɗooƴ siñaar
siñaari minɗi rahsu.
Ali ɓo' hotɗi ɗe,
ali ɓo' minɗi ɗe hot ;
cir na hatil wuu ce po faw !
Amiin !
In ci heɗ raak-raak ci naku
17 Naka heɗ raak-raak ciŋ adinaani woti ne ɓa yeguu haf ɓa te ɓa oolkohuu raak-raak ; raak-raak woorɗi. Ɓa oolkohaat Kooh, yi na one ɓoo on mitiɗ ne ɓoo min neɓsiɗuk nga.
18 Woyaa ɓa ne ɓa tumaat in baahiɗ, in baahiɗ laayiɗ. Ɓa minaat onoh te ɓa teyɗuk paysoh na ɓooɓi.
19 Ɓa tumoh ɗaa ɗah, ɓa hey nangɗohe raak-raak moɗiɗ wuu kim, jaar ɓa raak kipes ki keeh-keehi.
Dengkoh ci mirndoh
20 Kon Timoote, ɗaakkoha nof baahiɗ ini fu eɗu, fu nup woo ci naandohaaci, ci bugulɗi Kooh. Fu nup taasoh ciŋ ɓi na ndamkohe inhiŋ ɓa te wa inah haa.
21 Raakiɗ ɓi liiɓ ne ɓa inhiɗ laayiɗ ŋ ini ɓa inah weem, te ɓa muuƴ muuƴ po ɓa usiɗ kos.
Heɗ ɓoo baahohaat ɗu !