6
Kuyiŋ Mbaali ƴini na ndaɗ ciŋ teerndi
1 Ŋ ineem, ŋ hotta Kuyaŋ Mbaala ƴina nihsiɗ ndaɗa koc ŋ ca yasna-kanak ca, ŋ kerahha pesiɗ yino ŋ ca nikiis ca leehkeeɗa findi inding an : « Haya ! »
2 Ƴutta ŋ hotta panis yaanow puliɗ, yi rapee ɗe ammba ɓis ciŋ ɗe ; a eɗuusa mbahne-buur, a cootta ne a saahisa, laam a yi min.
3 Wa Kuya nihis ndaɗa kanakɗoh, ŋ kerahha pesiɗi kanakɗoh woyiɗ ne « Haya ! »
4 Panis wiiriis, ruumind coy, pulla ; yi rapee ɗe eɗuusa hatil nihsoha jamiŋ kehƴi, a eɗu wa ne ɓooɓi aptiɗohee ŋ ɗooƴ ɓa. A eɗuusa ndang yakak.
5 Wa Kuya nihis ndaɗa kaahayɗoh, ŋ kerahha pesiɗi kaahayɗoh woyiɗ ne : « Haya ! » Jaarra ŋ hotta panis suusus, yi rapee ɗe ammba balaas ŋ yaah.
6 Ŋ kerahha in mand na hooso ŋ leero pesiɗ ca nikiis ca woyeeɗa ne : « Andaar bele na care hooɓuk panguk, andaar lorso kaahay na care hooɓuk panguk ! Waaye diwliini na biiñi kanaa ca laal ! »
7 Wa Kuya nihis ndaɗa nikiisɗoh, ŋ kerahha hoosooriŋ pesiɗi nikiisɗoh woyiɗ ne : « Haya ! »
8 Jaarra ŋ hotta panis sam hiliir. Yi rapee ɗe teeksee "Kakaan ki", Jaanim taammba nga ɗe. Ɓa eɗuusa hatil ŋ haaƴiŋ haaƴiŋ kehƴi ne ɓa ap ɓa na ndang, ɓum na aɗ, ɓinooɓi na kosaay ki na kaɓkohe, ɓi tas nga, ɓa apoh ɓa ɗoopaat-nduuf.
9 Wa Kuya nihis ndaɗa yatuusɗoh, ŋ hotta ŋ ooɓ seeƴkohaani ruuh ciŋ ɓooɓi apu sagu ñaakiɗ woo kiŋ Kooh na seedeeni ɓa seede'ee wa.
10 Ɓa leehkeeɗa ŋ ɗafka an : « Heɗ ɓoo yi hool te fu keeh, cooy fu na hee atte'e ɓi gen kehƴa kiɗa, fu wirndukiɗ ɓoo ñif miŋ ɓoo aamu ? »
11 Ŋ ndeem, yaa nu nga ɗah eɗuusa kulɓa yaanow hutiɗ, ɓa woyuusa ne ɓa ɓaataat iɗsiɗuk ƴissuut po ɓi joy apu jen findiiɓa, apu ; ɓeɗ ɓi ɓaah na ɓa pangki wuu Kooh na kos.
12 Ƴutta ŋ hotissa Kuya nihsiɗ ndaɗa yasna-yino'ɗoh, weɗ kehƴi yoondɗukoh yoondɗuk keeh-keeh, nohi nikka suusus findi kulɓa ruy, caɓni findi wa hend jen wa nikka ruumind haa ñif.
13 Hor ciŋ eel ci keeneeɗa ŋ kehƴi. Ca keeneeɗa findi rim ndun ruundaaɗi, ci puuɗis laayiɗ na yookɗe.
14 Eel ci cooteeɗa findi basngi na lemse, tangooci jen na ɗisik ci masuɓ wil jen kurkiɗasseeɗa ŋ ɗisik ci ca nik.
15 Buur ciŋ kehƴi na kilifaaci na heɗ garat ci na heɗ alal ci na heɗ hatil ci na ɓinooɓi jen, ñaam na nikaaɗi ñaam, ɓa kaɗta, ɓa ɗasɗukeeɗa ŋ hur ca, na atoh caŋ tangooca.
16 Ɓa woyeeɗa tangooca na atoh ca ne : « Keenaat ŋ ɗafuk ɓoo, ɗu ɗasiɗ ɓoo ne Yi ɓoof ŋ ɓoofoha-buuri hotuu ɓoo, ɗu ɗasiɗ ɓoo ŋ ayruki Kuyiŋ Mbaali ƴini ayruk,
17 laam mbehi yakkiŋ ayrukiŋ ɓa hayiɗ, te ya ɓa min tufkiɗoh naa ? »