21
Eel as na keheƴ as
1 Wi atteeneem coot, ŋ hotta eel as na keheƴ as. Kehƴi na eel ci maañiɗ ci sooƴeen, cookom raakisseeɗi.
2 Ŋ hotta kur-taahi hooliɗi, Yerusalemi asi puloh ŋ Kooh. Wa ruhsohha Eel ci, wa hayeeɗa, haɓɗukiɗ po haa kilooki na tokse.
3 Weɗ ŋ kerhoh hooso meeɓuuɗ puloh ŋ ɓoofoha-buuri woyiɗ ne :
« Genohaaniŋ Kooh
weɗi ŋ harmban ɓooɓi kotii !
A genan na ɓa
te ɓa hey nike cuuɓ ciŋ ɗe.
Kooh ŋ haf ce
hey nike na ɓa [a nik Koohiŋ ɓa].
4 A hey moose muhun nu nik
ŋ has ciŋ ɓa ;
kaan raakissanɗi,
ruy raakissanɗi,
rooy raakissanɗi,
miskiɗ raakissanɗi,
in ci ɗeɓgaan maayiɗ. »
5 Yi ɓoof ŋ ɓoofoha-buuri woosa ne : « Marka, mi yii tum in ci jen as kotii. » A woyissa so ne : « Fiisa woo ceem, ca wooriɗ te ca keeh. »
6 A ɓaatta nga ne : « Ca mitiɗ sik ! Ñam Alfa na Omega, cambohaani na reehɗohaani. Ŋ hey one yi sifaɗuk a an ŋ culiŋ masmiŋ kipes ki, wa raakɗi wirind.
7 Yi saahan rahsohan in ceem jen ɗaa. Ñam nikan Koohiŋ ɗe, a nik kuɓkiŋ ngo.
8 Waaye ini kaɗ ŋ neek ci na kosaaɗiici na tumoh sepƴiɗ ci na apoh ɓo' ci na ɓi na faankohe faankoh sangohuuɗ na naah ci na ɓi na taambɗe kooh ci nikaaɗiici, na leyoh nu nik ; ɓak ɓa weɗ ne ɓa mbetu ŋ kalaŋ suufara kaɓɗuuɗa. Weem, weɗ kakaan ki kanakɗoh. »
Yerusalemi asi
9 Wi a reehiɗ woo, malaaka yino hayya. Malaakaaneem ɓaah ŋ malaakaaci yasna-kanak ci ambee kaas ci yasna-kanak ci riifee na naamooci yasna-kanak ci mirndoh. A woo so ne : « Haya ŋ teeɓ ɗa kilooki, kilook Kuyiŋ Mbaali ƴini. »
10 Fuuɗsi Hoolohngaani ammba so, malaakaani coottohha so ŋ tango njooloh na njooloh. A teeɓpa so kur-taahi hooliɗi, Yerusalemi asi puloh ŋ Kooh, wa ruhsohha Eel ci, wa hayeeɗa.
11 Wa siñaarɗeeɗa sagu yaki Kooh yak, wa melciɗeeɗa findi peme, peme yaspis findi weer.
12 Wa raakee miir nguusiɗ, njooliɗ na yahndeer ndaŋkiyaah na kanak (12), malaaka ndaŋkiyaah na kanak tufukka niiɗeeɗa ca. Tiik ciŋ cuuɓ ciŋ Israayel ndaŋkiyaah na kanak ci fiisuusa ŋ buntaaci.
13 Ɓak nu nga raakee yahndeer kaahay : kaahay ŋ pulohaaɗ-noh, kaahay ŋ muyohaaɗ-noh, kaahay ŋ yaah-sing, kaahay ŋ yaah-ñaahum.
14 Atoh ndaŋkiyaah na atoh kanak (12) ceɗ raanee miiri wila ; atoh nu nga ɗah, tiik yino ŋ tiik ciŋ Apootar ci ndaŋkiyaah na kanak ciŋ Kuyiŋ Mbaali ƴini fiisuusa nga.
15 Malaakaani woyee na so ambee ndooɗ urus ɓeesoha ne a ɓees kur-taahi na yahndeer ciŋ wa na miiriŋ wa.
16 Ɓak ciŋ wa nikiis ci ceɗ hend, hutiini na angiini ceɗ hend. Malaakaani ɓeessa kur ki na ndooɗiŋ ɗe, wa nikka kilomeet junni-kanak na kilomeet teemet-kanak (2200) ; hutiini na angiini na njooliini hennda hend.
17 A ɓeessa miiri, wa nikka suung teemet na suung ndaŋkiyaah-nikiis na suung nikiis (144) ŋ suung ɓo', weɗ malaakaani ɓeesohe.
18 Miiri haɓɗohsee yaspis, kur ki ŋ haf wa nikka urus koceet ñiiniɗ findi seetu hooliɗ.
19 Atoh ci raan miiriŋ kur ki moɗsinuusa na atoh nu nik ne wa atoh peme ɗah. Rangi koc ŋ fondamaani nikka atoh yaspis, wi kanakɗoh nikka safiir, kaahayɗohi halkedoon, nikiisɗohi esmaragdos,
20 yatuusɗohi sardoniksa, yasna-yino'ɗohi sardiyon, yasna-kanakɗohi hirisolitos, yasna-kaahayɗohi beerillos, yasna-nikiisɗohi topaas, ndaŋkiyaahɗohi hirsoparasos, ndaŋkiyaah na yino'ɗohi hiyakintos, ndaŋkiyaah na kanakɗohi ametistos.
21 Yahndeer ci ndaŋkiyaah na kanak ci (12) nikee per, waa nu nga haɓɗohsee per yino kut. Mbeeddaani yakki ŋ kur ki nikka urus koceet ñiiniɗ findi seetu.
22 Ŋ hotɗi ɗisik nga findi Kahan Kooh. Heɗ-hatili, Heɗ ɓoo Kooh na Kuyiŋ Mbaali ƴini, a yi Ɗiska Hooliɗa ndaam.
23 Kur ki etoheeɗi noh wala caɓin ne wa ñiinɗu, laam yaki Kooh yak siñaarɗee nga te Kuyiŋ Mbaali ƴini a yi laampaaniŋ wa.
24 Cuuɓ ci hey tiinde ŋ siñaariŋ wa te buur ciŋ kehƴi hey wa kome in ci baahiɗ ci ɓa raak.
25 Yahndeer ciŋ wa genan rangsukiɗ laam wek raakanɗi nga.
26 Cuuɓ ci jen hey wa kome in ci tah ca eɗu cir na raak tiik.
27 Waaye ali usuɓ aasanɗi nga, ɓoyi na pese ŋ in sepƴiɗ na yi na pese ŋ lee namanɗi aas nga. Ɓi tiik ciŋ ɓa fiisu ŋ teerndiŋ kipes ki, wiŋ Kuyiŋ Mbaali ƴini, ɓeɗ dong aasan nga.