14
Kuyiŋ Mbaali ƴini na tosuuɗ ci
1 Ŋ markissa, ŋ hotta Kuyiŋ Mbaali ƴini tufkiɗ ŋ tangooriŋ Siyong, a nikka na ɓo' junni-teemet na junni-ndaŋkiyaah-nikiis na junni-nikiis (144.000) ɓi fu inah ne tiikiŋ ɗe na wiŋ Baabiŋ ɗe fiisseen ŋ puk ciŋ ɓa.
2 Ŋ kerahha hooso puloh Eel ci, wa ɗiiɗɗeeɗa findi ɗuuɗ masuɓ laayiɗ, findi inding raakiɗ hatil. Hoosoori ŋ kerhee mandee na koora'oh ci na koora'e.
3 Ɓooɓa junni-teemet na junni-ndaŋkiyaah-nikiis na junni-nikiis ca (144.000) jen ƴeekeeɗa ƴeek as ŋ fiki ɓoofoha-buura na pesiɗ ca nikiis ca na yakak ca. Ali ɓo' mineeɗi jang ƴeeka ɗal ɓooɓeem, ɓeɗ ɓi tossee ŋ kehƴi.
4 Ɓooɓeem ɓa soɓeeɗi na ɓitiɓ, ɓa hooliɗ les. Ɓa na ñaakɗe Kuyiŋ Mbaali ƴini ŋ ɗisik nu a kaɗ ɗah. Ɓa tosuuɗ ŋ ɗooƴ ɓooɓi ne ɓa eɗohu findi waɗi koc wuu Kooh na Kuyiŋ Mbaali ƴini.
5 Lee moosɗi puloh ŋ nguɓ ciŋ ɓa, ɓa raakɗi ali sikka.
Malaakaaci kaahay ci yegɗohiɗ atteena
6 Ŋ markissa, ŋ hotissa malaaka wiiriis pundeeɗa ŋ ɗafka ɗafka. A ɓayee Yegɗohiŋ Muci, wi genan gen, a joyyaa woo ɓooɓi gen kehƴi, weɗ kur ci jen, heet ci jen, peɗeem ci jen na cuuɓ ci jen.
7 A woyeeɗa ŋ ɗafka ne : « Nupaat Kooh te ɗu yakɗee ɗe. Laam wahtuuni a atte'ohan reyiɗ. Ñaamkaat Yi fer Eel ci na kehƴi na cookmi na cul ciŋ masuɓ ci. »
8 Malaaka wiiriis yi kanakɗoh taammba nga ɗe woyeeɗa ne : « Wa keeniɗ, wa keeniɗ, Babilon kur-taahi yakki, wi meeɗ laariɗ kur ci jen na biiñiŋ wa, weɗ faankohiŋ wa mbalayi. »
9 Malaaka wiiriis yi kaahayɗoh taammba ŋ ca kanak ca, a woyeeɗa ŋ ɗafka ne : « Ɓo' nu ñaamuk ɗoopti na nataaliŋ ɗe te a teyɗuk waakɗu mandarga ŋ puk wala ŋ yaah ɗah,
10 ɓoyeem hey ane ŋ biiñiŋ ayrukiŋ Kooh, biiñi kooƴsaaɗiini a yiifɗassan ŋ kaasiŋ ayrukiŋ Kooh. Te a hey mbugalse na yongkaah na suufar, ŋ fiki malaakaaci hooliɗ ci na Kuyiŋ Mbaali ƴini.
11 Ɗuukriŋ mbugaliŋ ɓa ɗuukan ɗuuk po faw. Ɓo' nu ñaamuk ɗoopti na nataaliŋ ɗe, na ɓo' nu raak mandargaaniŋ tiikiŋ ɗe ɗah, fu iɗsiɗkanɗi, wa noh haa, wa wek haa. »
12 Ndii, ɓo'-Kooh ci, ɓi na taambɗe nakoh ciŋ ɗe te ɓa kossa ŋ Yeesu, ɓa joyiɗ min muñ ɓa sek.
13 Ŋ kerhissa hooso ŋ Eel ci, wa woyeeɗa so ne : « Fiisa inii : Ini kooɗoh woti, ɓi ɓaahan ŋ Heɗi po ɓa kaanoh nga, ɓa neɓɗiɗ ! Fuuɗsi Hoolohngaani woo ne : “ Ee di' ! Tumohaaɗ ciŋ ɓa moɗiɗ ci hey ɓa ɓende, tahha po ɓa hey iɗsiɗke ŋ panguk ciŋ ɓa miskiɗ ci. ” »
Nguɗi
14 Ŋ markissa, ŋ hotta eel yaanow, Yi ɓoofee nga mandee na kuɓu ɓo'. A ɓekukka mbahne-buur, haɓɗohu urus, a ammba nguɗoha kaañiɗ ŋ yaah.
15 Malaaka wiiriis pulohha Kahan Kooh, a leehukka ŋ ɗafka, a woosa Yi ɓoofee ŋ eeli ne : « Nguɗ reyiɗ ; nguɗaahi ŋ kehƴi ruundiɗ. Amba nguɗohaaniŋ ɗa, fu nguɗ. »
16 Weɗ Yi ɓoofee ŋ eeli raɗsoh yaah, jaarra kehƴi nguɗuusa.
17 Malaaka wiiriis pulohha Kahan Kooh ŋ Eel ci, a namee amb nguɗoha kaañiɗ ŋ yaah.
18 Malaaka wiiriis, yi adgohee yongkaahi, pulohha seeƴkohaana, a leehukka ya ɓayee nguɗohaana kaañiɗa ne : « Ndung ciŋ reseñiŋ kehƴi ruundiɗ. Amba nguɗohaaniŋ ɗa kaañiɗi, fu nguɗ ndung ci. »
19 Malaakaana raɗissa yaah ŋ kehƴi, a nguɗta rim ciŋ reseñiŋ kehƴi, a tummba ca ŋ pooƴohaani yakkiŋ ayrukiŋ Kooh.
20 Reseñi pooƴuusa ŋ pooƴohaana, ngaŋ bilaf faŋ kur-taaha. Ñif pulohha nga, wa rapeeɗa po wa gannga panis ŋ lahaɓ, wa kaɗɗeeɗa po wa reesa kilomeet teemet-kaahay (300).