10
Malaakaani na teerndi ƴini
1 Ŋ markissa, ŋ hotta malaaka wiiriis raakiɗ hatil ruhsoheeɗa Asamaan, a ɓekkee eel, ñaangi-ñaangi willa hafiŋ ɗe, fikiiriŋ ɗe mandee na nohi, kot ciŋ ɗe mannda na yongkaah, tufkiɗ haa kumbin.
2 A ambee ŋ yaah ce teere ƴin rangsuuɗ. A degga kotiŋ ɗe ñaahmi ŋ ɗafuk cookmi, wi singi ŋ kehƴi.
3 A leehukka ŋ ɗafka findi gayndeeni na ŋaare. Wa a leehuk rek, inding ca yasna-kanak ca kerhukka.
4 Wa inding ca yasna-kanak ca laɓ, ŋ heeɗa fiise ini ca woo, ŋ kerahha hooso ŋ Eel ci, wa woosa so ne : « Ɗasɗa in ci inding ci yasna-kanak ci woo, ca nikaat kumpa, kinaa ca fiis. »
5 Ŋ ndeem, malaakaani meeɓpa yaahiŋ ɗe ñaahmi a yurhiɗtaa ŋ Eel ci.
6 A ginnja ŋ Kooh yi na pese po faw, yi fer Eel ci na ini nik nga jen, na kehƴi na ini nik nga jen, na cookmi na ini nik nga jen. A woosa ne : « Sekɗoh raakisɗi !
7 Waaye jamanooni malaakaani yasna-kanakɗoh kulɓan, ini Kooh kooɗuk tum te a ɗasɗohhaa hey raake, findi woo ki baahiɗi a woo ñaam ciŋ ɗe, woosuuɗ ci. »
8 Hoosoori woyee na so ŋ Eel ci woyissa so ne : « Kaɗa fu ɓay teerndi ƴini rangsu ŋ yaahiŋ malaakaani tufuk ŋ cookmi na kehƴi »
9 Ŋ kaɗta ŋ woosa malaakaani ne a eɗaat to teerndi ƴini. A woosa so ne : « Ɓayaa ! Te fu ñama ; wa hey aaye ŋ rookiŋ ɗa waaye wa hey celme ŋ nguɓiŋ ɗa findi kuum. »
10 Ŋ teyya teerndi ŋ yaah malaakaani, ŋ ñammbaa ; wa celemmba findi kuum ŋ nguɓiŋ ngo waaye wi ŋ ñama, wa aayya hak ŋ rookiŋ ngo.
11 Ŋ woyuusa ne : « Ŋ tiikiŋ Kooh fu joyiɗ woyis woo-woosuuɗ ŋ ini kaɗ ŋ cuuɓ laayiɗ, na kur laayiɗ, na peɗeem laayiɗ, na buur laayiɗ. »