8
In ci Fuuɗsi Hoolohngaani on ɓoo
1 Kon ɗiski wa nik, ɓi nik ŋ Kiristaani Yeesu, minisɗi atte'u kaan.
2 Laam, waasiŋ Fuuɗsi Hoolohngaani na onohe onoh kipes ŋ Kiristaani Yeesu, wa pulɗiɗ ɓa ŋ waasiŋ bakaaɗ na kakaan.
3 WaasiŋMusaa mineeɗi ineem, laam faaniŋ ɓoo na waaɗ-waaɗ ciŋ wa ceɗ tah po waasiŋ Musaa raakɗi hatil. Waaye Kooh tumiɗa ŋ woosi a woos Kuɓkiŋ ɗe nga ɓoo na faan findi faan ciŋ bakaaɗoh ci ne a nihis bakaaɗ. Ŋ ineem, ŋ ɗooƴ faan, a atteesa bakaaɗ kaan.
4 A tum ineem ne kiyurhi waasi nakoh min raak nga ɓoo, ɓoo ɓi taambiɗɗi kiñin ciŋ ɓoo waaye Fuuɗsi Hoolohngaani.
5 Laam, ɓi na taambɗe kiñin ciŋ ɓa, liiɓohaaɗiŋ ɓa hun na Adina. Waaye ɓi na taambɗe Fuuɗsi Hoolohngaani, liiɓohaaɗiŋ ɓa hun na Fuuɗsi Hoolohngaani.
6 Liiɓohaaɗi hun na Adina na ɓayohe ŋ kakaan, waaye wi hun na Fuuɗsi Hoolohngaani na ɓayohe ŋ kipes na jam.
7 Ɓooɓi liiɓohaaɗ ciŋ ɓa hun na Adina, ɓa sangiɗ ciŋ Kooh, ɓa na taambɗeeɗi nakoh ciŋ ɗe, ɓa minɗaa sah.
8 Ɓi na pese ŋ taambiɗ kiñin ciŋ ɓa, ɓa minɗi neɓ Kooh.
9 Waaye ɗu, ŋ liiɓ ne Fuuɗsiŋ Kooh geniɗ nga ɗu. Kon, ɗu pesɗi ŋ taambiɗ kiñin ciŋ ɗu, ɗu na pese ŋ Fuuɗsi. Laam yaa nu rahasɗi Fuuɗsiŋ Kiristaani ɗah, a ɓaahɗi nga ɗe.
10 Kiristaani nik nga ɗu ɗah, wa keeh ne faan ciŋ ɗu hey kaane sagu bakaaɗ, waaye liiɓohaaciŋ ɗu hey pese sagu kiyurhi ɗu onu taamboh ŋ Fuuɗsi yi na pesɗee ɗu.
11 Te Fuuɗsiŋ Kooh yi hultiɗ Yeesu Kiristaa gen nga ɗu ɗah, Kooh yi hultiɗ ɗe hey name pesiɗ faan ciŋ ɗu kaanan, taamboh ŋ Fuuɗsiŋ ɗe gen nga ɗu.
12 Mbaa ɓaah ciŋ ngo, wa keeh ne raakiɗ in ci ɓoo joy haɓiɗ, waaye taambiɗ kiñin ɓaahɗi nga.
13 Ɗu pesee ŋ taambiɗ kiñin ciŋ ɗu ɗah, ɗu hey kaane, waaye Fuuɗsi ɓaatɗohee ɗu po ɗu ap taambiɗ kiñin ciŋ ɗu ɗah, ɗu hey pese.
14 Laam ɓi Fuuɗsi adgoh jen, ɓa kuɓuuciŋ Kooh.
15 Te ɗu rahasɗi Fuuɗsi amban ɗu ñaam, ne a dokin ɗu neƴƴoh, waaye ɗu rahas Fuuɗsi tum ɗu kuɓu Kooh, Fuuɗsi tah ɓoo ɓeeɗkee ɗe an : « Abba ! » Weɗ "Baab".
16 Fuuɗseem hun na liiɓ ciŋ ɓoo seede'ee ne ɓoo kuɓuuciŋ Kooh.
17 Nik ne ɓoo kuɓu ɗah, ɓoo hey rahse in ci Kooh gap kuɓuuciŋ ɗe, te ɓoo ɓaahan ca na Kiristaani ; nik ne ɓoo ɓaahiɗ na ɗe miskiɗ ɗah, ɓoo ɓaahan na ɗe yaki a yak.
Findi feruuɗi mand woti, na findi wa mandan kim
18 Wa wooriɗ to ne miskiɗ ciŋ ɓoo ŋ jamanoonii minɗi hendtiɗkohu na kiyak ki Kooh teeɓohan nga ɓoo kim.
19 Ini Kooh fer jen wa ɗii sek na seesuk keeh-keeh mbehi kuɓuuciŋ Kooh teeɓohsan.
20-21 Laam ini Kooh fer jen, ɗiski wa nik, wa na tiinde ŋ ɓarang ɓarang. Wa tiiɗaa, e Kooh yi dega ineem, a yi tah. In ci jen ca ɗii yahrukoh. Waaye yaakaar raakiɗ poyi. Laam ca hey name pulɗu sah ŋ kiñaam kiŋ yahrukoheem ne ca raak haf ca, ca min ɓaah ŋ yaki kuɓuuciŋ Kooh yakan.
22 Ɓoo inhiɗ ne po woti, in ci Kooh fer, findi ca hend jen, ceɗi iineeɗa sagu miskiɗ findi ɓitɓi na ɓasle.
23 Te ceɗ dong raak miskiɗ haa, na ɓoo, ɓoo ɓi rahas Fuuɗsi Hoolohngaani findi waɗi koc, ɓoo ɓii nam iin ŋ ɗooƴ ɓoo, ɓoo ɓii sek ne ɓoo nik kuɓu Kooh keeh-keeh, ɓoo naafu po ɓoo raak haf ɓoo jameet.
24 Laam raak yaakaar, ooluk in ci na haye, weɗ muciɗ ɓoo, waaye in ci fu yaakaar nik na ɗa, fu hotee ca ɗah, wa nikisɗi yaakaar.
25 Waaye ɓoo ooluk ne ini ɓoo hotɗi hey haye ɗah, ɓoo heya seke na seesuk na muñ.
26 Fuuɗsi na ɓaatɗohe ɓoo ŋ ñaki ɓoo ñak hatil, laam ɓoo inahɗi ini ɓoo joy kiim. Waaye Fuuɗsi na haf ce na kiimɗe ɓoo na iin ci fu inah ne, ɓo' minɗi ca woo.
27 Te Yi na hote ini nik ŋ keeñ ci inhiɗ ini Fuuɗsi waaɗ kiim, laam Fuuɗsi na kiimɗe kosiɗ ciŋ Kooh findi Kooh waaɗoh.
28 Ɓoo inhiɗ ne Kooh na tume po in ci jen ambsukoh nik in baahiɗ ngaŋ ɓi waaɗ ɗe. Ɓooɓeem, e ɓooɓi Kooh ɓeeɗuk ŋ findi a kooɗkiɗohee wa.
29 Laam ɓi a inah ŋ ɗeɓgaana, a tufkiɗta ŋ ɗeɓgaana ne ɓa mandan na Kuɓkiŋ ɗe, ne Kuɓki nik saawi raak taambɗoh laayiɗ.
30 Te ɓi a kooɗ ŋ ɗeɓgaana, a namiɗ ɓa ɓeeɗuk ; ɓi a ɓeeɗuk, a namiɗ ɓa on kiyurah ; te ɓi a on kiyurah, a namiɗ ɓa yakiɗ.
Saahi ɓoo saah, wi taamboh ŋ waaɗohiŋ Kooh
31 Ɓoo woyissan ye ? Kooh yii na ɓoo, te nik ne a yii na ɓoo ɗah, ya ɓa miniɗ ɓoo in ?
32 Kooh, yi teyɗuk ne Kuɓkiŋ ɗe raak miskiɗ, a eɗohha ɗe wuu ɓoo jen, a eɗiɗ ɓoo Kuɓkiŋ ɗe ! Wa wooriɗ ne a hey baahohe ɓoo in ci jen findi a eɗoh ɓoo Kuɓkiŋ ɗe !
33 Ɓi Kooh kooɗ, a ya ɓa yamban ɓa ? A Kooh na attee ɓoo te a yi woo ne ɓoo yurhiɗ !
34 Kon ali ɓo' minɗi attee ɓoo ne ɓoo tooñiɗ. Laam Kiristaani Yeesu kaaniɗ ! Ɓaatta nga a hultiɗuusa, ɓaatissa nga a nik ŋ ñaahmaŋ Kooh, te a yaa kiimiɗ ɓoo !
35 Wa ye saɓsohan ɓoo na waaɗi Kiristaani waaɗ ɓoo ? Wa miskiɗ haa. Wa jaahiɗ haa. Wa tolfiɗ wala aɗuk haa. Wa ñak ɓekkaah haa. Te wa in wooraaɗi wala ndang haa !
36 Ini Fiis ci woo weɗ rahas ɓoo, an :
« Saguufu, ɓoo na hooɓke dabgiɗu apu.
Ɓa amb ɓoo findi mbaal ci na hoosse. »
37 Waaye ŋ in ceem jen, a ɓoo saah po ɗiska saah top taamboh ŋ Yi waaɗ ɓoo.
38-39 Laam wa wooriɗ to ne raakɗi ini min ɓoo saɓsoh na waaɗi a waaɗ ɓoo, wa kakaan haa, wa kipes haa, ca malaaka haa, ca safaal haa, wa woti wala kim haa, ca heɗ hatil haa, wa ɗafkiɗ wala nooɗiɗ haa, ca feruuɗ wiiriis haa, ali in minɗi ɓoo saɓsoh na waaɗi Kooh waaɗ ɓoo taamboh ŋ Kiristaani Yeesu, Heɗ ɓoo.