14
Kina atte, kina heef morom fu
1 Teyɗukaat yi kosiŋ ɗe ndengɗi, te kinaat lahtuk ŋ liiɓohaaɗiŋ ɗe.
2 Ɓum kos ne ɓa miniɗ ñam kañam ci jen ; ɓinooɓi kosiŋ ɓa ndengɗi, ɓa na ñame kidig na paangi dong.
3 Yi na ñame kañam ci jen kinaat heef yi na ñameeɗi, te yi na ñameeɗi kinaat atte yi na ñame, laam Kooh teyɗukiɗ ɗe.
4 A fu ɓa po fu atte'ee surga jaambur ? A tufuk ŋ pangkiŋ ɗe wala a keen nga, waas fu nguu nga, a yi inah na heɗ ce. Te a risan tufkiɗ, laam Heɗi miniɗ ɗe ndengiɗ.
5 Wa nam mand ɗaa, raakiɗ ɓi amb ne mbeh ci uupsiɗohiɗ yak, ɓum amb ne caɗ hend. Kon yaa nu nga liiɓiŋ ɗe doyaat ɗe !
6 Yi eɗ mbeh cum cir ŋ ɗafuk cinooci, a na tumee wa ne a yakiɗ Heɗi. Yi na ñame kañam ci jen, a na namee wa tum ne a yakiɗ Heɗi, laam, a ñamee ɗah, a na corkiɗe corkiɗ Kooh. Yi na ñameeɗi sepet, a na ñamaaɗi'e ne a yakiɗ Heɗi, te a na name nam corkiɗ Kooh ŋ in ci a na ñame.
7 Ali ɓo' nga ɓoo pesɗi wuu haf ce, te ali ɓo' kaanɗi wuu haf ce.
8 Ɓoo pes ɗah, ɓoo na pese wuu Heɗi ; te ɓoo kaan ɗah, ɓoo na kaane wuu Heɗi. Ɓoo pes, ɓoo kaan, ɓoo wuu Heɗi.
9 Laam Kiristaani kaaniɗ, a hulitta, ne a nik Heɗ kaaniɗ ci na pesiɗ ci.
10 Mbaa fu yii, wa ye tah fu atte'ee ɓaah fu ? Wala fu yen, wa ye tah fu heefee ɓaah fu ? Inhaat ne ɓoo jen, ɓoo hey tufke ŋ fiki atte'ohaariŋ Kooh.
11 Laam wa fiisuuɗ ne :
« Heɗi woo ne : “ Ŋ giñiɗ ŋ kipes kiŋ ngo,
ne ɓooɓi jen hey yo ƴekɗe
te cuuɓ ci jen hey teyɗuke ne a ñam Kooh ! ” »
12 Ŋ ineem, ya nu nga hey woye ŋ fiki Kooh findi a meeɗ tumoh na kipes kiŋ ɗe.
Kina kafind morom fu sagu kañam
13 Mbaa ali ɓo' kinaat atte'is morom ce nga ɓoo ; ini ngisoh weɗ ne ɗu marak baahiɗ, ɗu sang degiɗ morom ɗu ini kafndan ɗe po wa kee ɗe hondoha kos.
14 Niki ŋ nik ŋ Yeesu Heɗi tahiɗ po wa wooriɗ to ne, ali kañam nikɗi hoolaaɗi ŋ haf wa ; waaye ɓo' amb ne inii usɓiɗ ɗah, wa usɓiɗ nga ɗe.
15 Nik ne kañam ki fu na ñame weɗ na ɓeke morom fu keeñ neɓaaɗi ɗah, fu pesisɗi ŋ waaɗoh. Ɓoyi fu inah ne Kiristaani kaaniɗ wuu ce, kinaat ɗe muuƴiɗ sagu kañam.
16 Ali ɗu amb ne inii baahiɗ nga ɗu, wa kinaat tah po ɓo' wiiriis kee raaka woyaah nga ɗu.
17 Nguuriŋ-Kooh, wa ñam na an haa, wa kiyurah na jam na sum, taamboh ŋ Fuuɗsi Hoolohngaani.
18 Laam ɓo' nu na pangkiɗe Kiristaani ŋ ineem ɗah, Kooh hey neɓse nga ɗe, ɓooɓi naw ɗe.
19 Mbaa, ɓoo waakaat ini na ɓaye jam te yaa nu nga ɗah waakee ini kaɗɗan morom ce fiki.
20 Kañam kinaat tah po ɗu yah pangki Kooh panguk. Wa keeh ne kañam ci jen hooliɗ ; waaye kañam ki fu na ñame tum po ɓo' keen ŋ bakaaɗ ɗah, wa baahɗi.
21 Ini ngisoh weɗ ne fu muñ ñam sepet wala an sangara, fu faɗ in ci min kafind ɓaah fu jen.
22 Kosi fu kos ŋ ini kaɗ ŋ in ceem, wa nikaat ŋ harmban fu na Kooh. Ɓoyii, a neɓɗiɗ, yi raak hel daliɗ ŋ in ci a amb ne ceɗ baah !
23 Waaye ɓoyi na ñame inaa, te a liiɓsiɗohee nga, a atte'uuɗ tooñ, laam ini a na tume hunɗi na kos, te tumohaaɗ nu hunɗi na kos ɗah, wa bakaaɗ.