3
Findi kanak ci kilookoh joy pesoh
1 Ɓitiɓ ci, namaat teyɗukiɗ ƴaar ciŋ ɗu. Wa raak ŋ ƴaar ceem ɓi sang kos woo kiŋ Kooh ɗah, mandohaaɗiŋ ɗu miniɗ tah po ɓa kos, te wa etohanɗi sah, ɗu woyee na ɓa nga.
2 Ŋ ineem, ɓa hey hote findi ɗu eɗoh ɓa cir, na findi ɗu na pesohe pes hooliɗ.
3 Kimoɗ kiŋ ɗu kinaat nik ŋ ini min hotuk dong, maanaam ŋ maaruk, wala tokkaah urus, wala ɓekuk kulɓa moɗiɗ.
4 Waaye wa joy nik ŋ ɗooƴi, ŋ ɗooƴ keeñi ; wa nik wiŋ keeñ moɗiɗ, yeeɓkiɗ. Kimoɗ mand ɗaa, weɗ raak candoom keeh-keeh ŋ fiki Kooh te wa na yahkeeɗi.
5 Ɗeɓgaan, ɓitiɓ ci hooliɗ ci oolkee Kooh ŋ in ci a gapohee, meeɗ haɓɗukoh ɗaa, ɓa teyɗukɗeen ƴaar ciŋ ɓa,
6 findi Saarata kerhiɗohee Ibrahiima te a ɓeeɗkohee ɗe heɗ ce. Ɗu kuɓuuciŋ ɗe ne ɗu tumee baahiɗ te ɗu neƴƴohɗi ali in nga ɗah.
7 Ɗu ɓi ƴaar ci, yaa nu nga ɗu ɗah namaat liiɓ baahiɗ ŋ findi a na pesohe na ɓitiice, fu inah ne hatiliŋ ɓitiifu hendɗi na wiŋ ɗa. Eɗa ɗe cir laam a hey name ɓaah ŋ findiifu ŋ kipes ki ɓoo baahohsan. Tumohaat ɗaa ne kiim ciŋ ɗu Kooh nikuu teyɗuksaaɗi.
Tum baahiɗ
8 Kon book, ɗu jen ɓaahaat liiɓohaaɗ, ɗu ɓaahee ini neɓ ɗu na wi misik ɗu, ɗu waaɗtiɗoh findi ɓooɓi ɓaah yaay na baab, ɓooɓi miskaat ɗu, te ɗu ruhsiɗ haf ciŋ ɗu.
9 Ɓo' tum ɗu miskiɗ wala ɓa ɓas ɗu ɗah, kinaat wirnduk. Kiimɗaat ɓa barke, laam, Kooh ɓeeɗuk ɗu ne ɗu tumohee ɗaa, ɗu rahsee barke.
10 Laam, Fiis ci woo ne :
« Ɓo' nu waaɗ raak kipes mitiɗ
na mbeh neɓiɗ ɗah,
a niiɗaat nguɓiŋ ɗe ŋ woo moɗaaɗi,
po ali lee taambuu ŋ njootoot ciŋ ɗe.
11 A us baahaaɗi, a tumee baahiɗ ;
a waakaat jam te a tiindee jam.
12 Laam has ciŋ Heɗi ca ɗii ŋ yurhiɗ ci,
te a naar nof ŋ kiim ciŋ ɓa.
Waaye tumoh moɗaaɗiici,
Heɗi na ñuusɗukee ɓa ñuusɗuk. »
Tufuk ne seede ini fu oolkoh
13 Te sah, yaa tuman ɗu miskiɗ ne ɗu sawar ŋ tum baahiɗ ɗah ?
14 Ali nik ne ɗu raak miskiɗ sagu yurhi ɗu yurah sah, ɗu neɓɗiɗ. Kinaat ɓa neƴƴoh, te kinaat jaahiɗ.
15 Waaye ambaat ŋ keeñ ciŋ ɗu ne Kiristaani a yi hool wuu Kooh, te a yi Heɗi ; te ɓooɓi meekis ɗu ŋ oolki ɗu ooluk in ciŋ Kooh na haye ɗah, tufkaat ne ɗu lof ɓa.
16 Waaye lofaat ɓa na eɗef, wa hun na cir, hunaat na hel daliɗ po ɗu yambsee tumoh moɗaaɗi ɗah, ɓooɓi na yambee ɗu hot tumohaaɗ ciŋ ɗu baahiɗ ci ɗu raak ŋ Kiristaani, ɓa kaci.
17 Laam, kooɗoh miskiɗ ngaŋ tum in baahiɗ, nik ne weɗ waaɗ-waaɗiŋ Kooh ɗah, weɗ ngisoh kooɗoh miskiɗ ŋ tum in baahaaɗi.
Ndamiŋ Kiristaani
18 Kiristaani namiɗ raak miskiɗ waas yino po faw wuu ɗaasuukiŋ bakaaɗ ci. A Yurhiɗi kaan wuu yurhaaɗiici, ne a ɓay ɗu ŋ Kooh. A apuuɗ ŋ kipes kiŋ faaniŋ ɗe waaye a pesɗuuɗ ŋ kipes ki hun na Fuuɗsi Hoolohngaani.
19 Weɗ a kaɗoh yegɗoha ŋ ruuh ca taƴu ŋ kaso.
20 Maanaam, ɓi sangee kerhiɗ Kooh ɗeɓgaan, wa a muñɗee ɓa ŋ jamanoona Noohin haɓɗohee gaala. Ɓooɓa aasee ŋ gaala laayeeɗi, ɓa nikee yasna-kaahay dong, ɓeɗ mucɗassee ŋ masma.
21 Wa nikee ñaamaariŋ ɓoktuki woti, wi ɓoo na rahse, ɓoo muc, wa na nihse riiɓ faan haa, waaye wa teyɗuk ɓeeɗkohiŋ Kooh na hel daliɗ. Wa muciɗ ɗu taamboh ŋ hultiŋ Yeesu Kiristaa.
22 A rapiɗ Asamaan, a yaa ŋ ñaahmaŋ Kooh, malaakaaci na nguurkoh ci na heɗ hatil ci jen degu ŋ yaah ce.