5
Ɓooɓi neɓɗiɗ ci
1 Wa Yeesu hot mboolnda, a rappa ŋ tangoora, a ɓooffa nga. Taalubeeciŋ ɗe reɓpa nga ɗe,
2 a jangɗeeɗa ɓa in cii an :
3 « Ɓa neɓɗiɗ, ɓooɓi ruhsiɗ haf ciŋ ɓa,
ɓa inahha ne ɓa etohiɗ Kooh,
laam Nguuriŋ-Ɗafki wa wuu ɓa.
4 Ɓa neɓɗiɗ, ɓooɓi na fuɗe,
laam ɓa hey giifɗasse.
5 Ɓa neɓɗiɗ, ɓooɓi soosiɗ ci,
laam ɓeɗ eɗsan kehƴi.
6 Ɓa neɓɗiɗ, ɓooɓi aɗuk, sifaɗukka kipes yurhiɗ,
laam ɓa hey hiƴe, ɓa kap nding.
7 Ɓa neɓɗiɗ, ɓooɓi na yirmohe,
laam Kooh hey ɓa yirme.
8 Ɓa neɓɗiɗ, ɓooɓi raak keeñ hooliɗ,
laam ɓa hey hote Kooh.
9 Ɓa neɓɗiɗ, ɓooɓi na waake jam ŋ harmban ɓooɓi,
laam ɓa hey ɓeeɗkohse kuɓu Kooh.
10 Ɓa neɓɗiɗ, ɓooɓi na mbugalse sagu yurhi ɓa yurah,
laam Nguuriŋ-Ɗafki wa wuu ɓa.
11 Ɗu neɓɗiɗ, ne ɓooɓi ɓasee ɗu, ɓa mbugalee ɗu, ɓa leyɗohee ɗu na woo moɗaaɗi'iɗ nu nik saguuso ɗah.
12 Sumaat keeh-keeh, laam aafi na sekee ɗu ŋ ɗafka yakiɗ, te ɗu inah ne ɓa mbugalohee woosuuɗ ci adug ɗu ɗaa.
Meɗaami na siñaari
13 E ɗu meɗaamiŋ Adina. Waaye meɗa kaɗ po wa jemisɗi ɗah, wa min jemɗohissu na ye ? Wa na raakisseeɗi etoh ɗal, wa mbetu, ɓooɓi dakee nga.
14 E ɗu siñaariŋ adinaani, kur ki nik ŋ jol tango, wa minɗi ɗembɗu.
15 Te ali ɓo' na fuuɗeeɗi laampa ne a kuna na kanoh, a degana kay ŋ degohaaniŋ wa ne wa ñiiniɗ ɓi tuuƴi jen.
16 Siñaariŋ ɗu joy ñiinoh ɗaa ŋ fiki ɓooɓi, ne ɓa hot tumohaaɗ ciŋ ɗu baahiɗ ci, ɓa yakiɗ Kooh Baabiŋ ɗu yi nik ŋ Eel ci.
Ini kaɗ ŋ waasiŋ Musaa
17 Kinaat liiɓ ne ŋ hay ne ŋ nihis waasiŋMusaa wala woo ciŋ woosuuɗ ci, ŋ hayɗi ne ŋ nihis ca, waaye ŋ hay ne ŋ tum in ci ɓa woo po ca mit.
18 Ñam na woyee ɗu wa te wa keeh. Feeh kehƴi na eel ci kurukɗi nga ɗah, ali in nihsukanɗi ŋ waasi po mbaɗna wa mitan. Wa fiisi uup ƴissuut nga haa, wa tap haa.
19 Weɗ tah po ɓo' nu taambiɗɗi wi uup ƴissuut ŋ nakoh ci te a woyee ɓooɓi ne ɓa joyɗaa taambiɗ ɗah, a hey nike yi uup ƴissuut ŋ Nguuriŋ-Ɗafki. Waaye ɓo' nu taambiɗ ca te a jangɗee ɓooɓi ne ɓa taambiɗ ca ɗah, a hey yake ngaŋ Nguuriŋ-Ɗafki.
20 Ñam na woyee ɗu wa, ɗu uupɗi yurah jangɗohoh ciŋ waasi na Farisen ci ɗah, ɗu aasanɗi ŋ Nguuriŋ-Ɗafki.
Ini kaɗ ŋ ayrukoh
21 Ɗu kerhiɗ ne ɓooɓa ɗeɓgaan woysee ne : “ Kina ap ɓo' ; ɓo' nu apoh ɗah, a hey atte'se. ”
22 Waaye mi na woyee ɗu ne, ɓo' nu ayruk ɓaah ce ɗah, a hey atte'se. Te ɓo' nu woo ɓaah ce ne : “ Hafiŋ ɗa riifɗi ” ɗah, a hey ɓayse ŋ atte'oh ciŋ waasi. Te ɓo' nu woo ɓaah ce ne : “ Fu dof ” ɗah, a hey ɓekse ŋ yongkaaha yakka.
23 Ŋ ineem, fu ɓayee ini fu eɗoh wuu Kooh ŋ seeƴkohaana, fu naandsuk ne ɓaah fu ambɗiɗ ɗa in ɗah,
24 faɗaa ŋ fiki seeƴkohaana, fu kaɗ kerhiɗoha na ɗe po ƴut, fu hana hay dege.
25 Ara kerhiɗoh na ɓoyi, ne a ɓayee ɗa waas ɗah. Fu tumɗaa ŋ waasi po ɗu ree ngelohaana ɗah, a hey ɗa ɓaye ŋ atte'ohi, yeem eɗ ɗa alkaateeni, fu ɗaaku ŋ kasoona.
26 Ñam na woyee ɗa wa te wa keeh, fu pulohanɗi ndaam feeh fu wirindɗi po ŋ darmi uup ƴissuut ɗah.
Ini kaɗ ŋ njaaloo
27 Ɗu kerhiɗ ne wa woyuuɗ ne : “ Fu njaaloo'anɗi. ”
28 Waaye mi na woyee ɗu ne, ɓo' nu marak ɓitiɓ, a hemem ɗe ɗah, a njaaloo'iɗ na ɗe ŋ ɗooƴ ce po ƴutiɗ.
29 Hasiŋ ɗa ñaahmi waaɗ ɗa ɓek ŋ bakaaɗ ɗah, nihsaa fu mbeta ; cir yino nihsuk ŋ faaniŋ ɗa, weɗ ngisoh wa jen, wa mbetu ŋ yongkaaha yakka.
30 Yaahiŋ ɗa ñaahmi waaɗ ɗa ɓek ŋ bakaaɗ ɗah, nguɗaa jameet fu mbeta ; cir yino nihsuk ŋ faaniŋ ɗa, weɗ ngisoh wa jen, wa kaɗ ŋ yongkaaha.
Ini kaɗ ŋ saɓsukoh na ɓitiɓ
31 Wa namiɗ woyuuɗ ne : “ Ɓo' nu faɗ ɓitiice ɗah, a eɗaat ɗe kayti teeɓoha. ”
32 Waaye e ñam na woyee ɗu ne, ƴaar nu saɓsukoh na ɓitiice te nikɗi ne yeem njaaloo njaaloo ɗah, a yi ɓek ɗe ŋ njaaloo. Te ɓo' nu ɓay ɓitiɓ faɗuuɗ ɗah, a njaaloo'iɗ.
Ini kaɗ ŋ giñ
33 Ɗu namiɗ kerah ne ɓooɓa ɗeɓgaan woysee ne : “ Fu giñ in ɗah, kinaa nik tumaaɗi. In nu fu giñiɗ Heɗ ɓoo ɗah, tumaa. ”
34 Waaye mi na woyee ɗu ne, kinaat giñ delem. Kinaat giñ ŋ ɗafki, laam ɓoofohaaniŋ Kooh, yi buur waa nga.
35 Kinaat giñ ŋ kehƴi, wa degoha kot ciŋ ɗe. Kinaat giñ ŋ Yerusalem, wa kur kiŋ Kooh, yi Buuri yakki.
36 Te hafiŋ ɗa, kina giñ nga laam fu minɗi yaanwiɗ, fu minɗi suussiɗ find yino nga.
37 Ɗu woo "ee" ɗah, wa nikaat "ee" ; ɗu woo "a'aa" ɗah, wa nikaat "a'aa". In nu ɗu deg nga ɗah, wa puloh Seytaani.
Ini kaɗ ŋ wirndiɗkoh
38 Ɗu kerhiɗ ne wa woyuuɗ ne : “ Has, e has na wirndee wa ; sis, e sis na wirndee wa. ”
39 Waaye mi na woyee ɗu ne, kinaat wirndiɗkoh na ɓoyi na tumee ɗu in miskiɗ. Ɓo' laɓ ɗa paɗ ŋ kaɓaaɓ ñaahum ɗah, eɗaa ɗe wi tas.
40 Te ɓo' waaɗ ɗa ɓay waas ne a naaf kulɓaakiŋ ɗa ƴini ɗah, nama ɗe eɗ paltooniŋ ɗa.
41 Ɓo' tiindɗukoh ɗa ŋ doole kilomeet yino ɗah, tiinda na ɗe kanak.
42 Ɓo' kiim ɗa ɗah, onaa ɗe te kina sang ɓand ɓoyi na ɓandukee ɗa.
Waaɗ ɓi sang ɗa
43 Ɗu kerhiɗ ne wa woyuuɗ ne : “ Waaɗa morom fu, fu sang ɓoyi sang ɗa. ”
44 Waaye mi na woyee ɗu ne, waaɗaat ɓooɓi sang ɗu, ɗu kiimɗee ɓooɓi na torhiɗee ɗu in baahiɗ.
45 Ŋ ndeem, ɗu hey teeɓohe ne ɗu kuɓuuciŋ Baabiŋ ɗu yi nik ŋ Eel ci, laam a na pulɗe puliɗ nohiŋ ɗe ŋ añaandiɗ ci na baahiɗ ci, a na toɓɗe toɓiɗ yurhiɗ ci na yurhaaɗiici.
46 Moo, ɗu waaɗ ɓooɓi waaɗ ɗu dong ɗah, ɗu car ye aafaah ŋ ineem ? Juuti'oh ci sah na tumohe ɗaa.
47 Te ɗu kañɗee ɓaah ciŋ ɗu dong ɗah, ɗu haɓiɗ ye ini haɓɗohuuɗi ? Ɓooɓi kosɗi Kooh sah na tumohee ɗaa.
48 Kon kinaat raak sikka findi Baabiŋ ɗu yi nik ŋ ɗafki raakohɗi sikka.