22
Ɓooɓi ɓeeɗku ŋ kilook
1 Yeesu kooɗissa woo ka, a woyisseeɗa na ɓa ŋ andiin an :
2 « Nguuriŋ-Ɗafki mand na inii : A nikee buur, a haɓɗiɗeeɗa kuɓkiŋ ɗe ƴaari ceeke yakak ŋ kilookiŋ ɗe.
3 A woossa ñaam ciŋ ɗe ne ɓa kaɗ ɓeeɗka hanheeci joy hay ŋ kilooki ; waaye ɓooɓa ɓeeɗkassee waaɗɗi hay.
4 A tuuƴissa ɓi ñaam wiiriis, a woosa ɓa ne : “ Kaɗaat, ɗu woo ɓa ne ŋ haɓɗiɗ kañam ki po ƴutiɗ, ŋ apiɗ inoh ciŋ ngo na ɗoopaat ci ŋ yafale, in ci jen ƴutiɗ, ɓa hayaat kilooki ! ”
5 Waaye ineem yoondiɗɗi ɓooɓa ɓeeɗkasse, yaa nu nga ɗah, cootta waas ce, ɓum kaɗta ŋ yohon caŋ ɓa, ɓum ŋ toontukaŋ ɓa ;
6 ɓinooɓa ammba ñaam ca woosse, mbugalla ɓa, appa ɓa.
7 Weɗi buura ayrukoh, tuuƴca soldaar caŋ ɗe ne ɓa ap ɓooɓi ap ñaam ceem, ɓa doh kur ka.
8 Ŋ ineem buura woosa ñaam caŋ ɗe ɓinooɓa ne : “ In ci joy ceeke'ohu ƴutiɗ waaye hanheeci ɓeeɗkasse yeyyooɗi ca.
9 Kaɗaat ŋ ɗisik ci ɓooɓi na cohe, ɓo' nu ɗu hot ɗah, ɗu ɓeeɗuk ɗe ŋ kañam ki. ”
10 Ñaam ca kaɗta ŋ waas ca, ɓa ɓeeɗukka ɓooɓa ɓa cohee na ɓa jen, baahiɗ na baahaaɗi po kahna riiffa na hanhe.
11 Buura aassa ne a marak ɓooɓi hay ŋ kañam ki, a hotta ɓo' nga ɓekkaaɗi kulɓa ceeke'oha.
12 A woosa ɗe ne : “ Ƴaariŋ ngo, fu tumoh na po fu aassa ndii te fu raakɗi kulɓa ceeke'oha ? ” Ƴaara lofɗi ali in.
13 Weɗ a woyoh surgaaca ne ɓa tokaat kot caŋ ƴaara na yaah caŋ ɗe, ɓa njaf ɗe ŋ hara, ŋ ñuusa, ɗiska fuɗ na ɗoɓɗoh sis raakan. »
14 Yeesu degga nga ne : « Laayiɗ ɓeeɗkuuɗ waaye ɓi kooɗu laayɗi. »
Lempooniŋ Sesaar
15 Ŋ ineem, Farisen ca kaɗta coha ne ɓa marak findi ɓa jaɗɗohan Yeesu fiir po ɓa amb ɗe ŋ woo ciŋ ɗe.
16 Ɓa tuuƴca nga ɗe ɓi taalube ɓaah nga ɓa na ɓi ɓo' ɓaah ŋ langtoh caŋ Herod, ɓeem woosa ɗe ne : « Jangɗohohi, ɓoo inhiɗ ne fu woyoh keeh te fu na jangɗohe waasiŋ Kooh ŋ keeh. Fu nupɗi ali ɓo', laam fu na markeeɗi ŋ yaki ɓoyi yak.
17 Kon woya ɓoo ini fu liiɓ ŋ inii : Wa waas ne Sesaar, buura yakkaŋ Rom, wirndasse lempo wala ? »
18 Waaye Yeesu inheen baahaaɗiikaŋ ɓa ; a loffa ɓa ne : « Naafeehaaci, wa ye tah ɗu waaɗee so ɓek ?
19 Teeɓaat to kopori na ambohse lempo. » Ɓa eɗta ɗe dinaar yino.
20 A meekissa ɓa ne : « Ya ɓa raak nataalii, na tiiki nik nga ? »
21 Ɓa loffa ɗe ne : « A Sesaar. » Ŋ ineem, a woosa ɓa ne : « Eɗaat Sesaar ini Sesaar raak, te ɗu eɗ Kooh ini Kooh raak. »
22 Ŋ woo ceem, ɓa feyuusa jen, ɓa faɗta ɗe, ɓa cootta.
Yeesu lofiɗ Sadusen ci ŋ ini kaɗ ŋ hulti
23 Mbaɗi, ɓi ɓo' ɓaah ŋ Sadusen ca hayya nga ɗe, ɓeɗ ɓi na woye ne kaaniɗ ci hultanɗi. Ɓa meekissa ɗe
24 an : « Jangɗohohi, Musaa woo ne ƴaar nu kaan te a raawɗi raak kuɓu ɗah, e taambɗoh ce tokan ɓitɓi a faɗ ne a raakiɗ kaaniɗi kuɓu.
25 Laam nga ɓoo, wa raakeen taambɗoh yasna-kanak, saawi tokka ɓitiɓ, a kaannda raakaaɗi kuɓu, taambɗoh ce ɗaakka ɓitiice.
26 Yeem nammba kaan raakaaɗi kuɓu na ɗe, yi kaahayɗoh nammba tum ɗaa po yi yasna-kanakɗoh.
27 Wa ɓa kaan jen, ŋ mirndaani, ɓitɓi kaannda.
28 Ɗiski wa nik, ɓooɓi hulit ɗah, a nikan ɓiti ya ɓa ŋ ƴaaɓi yasna-kanak ci, laam ɓa jen, ɓa tokiɗ ɗe ? »
29 Yeesu woosa ɓa ne : « Ɗu inahɗi ini Fiis ci woo, ɗu inahɗi hatiliŋ Kooh, weɗ tah ɗu muuƴ.
30 Ɓooɓi hulit ɗah, ƴaar ci heyɗi toke ɓitiɓ, ɓitiɓ ci heyɗi tokse, ɓa mandan na malaakaaciŋ Eel ci.
31 Te ini kaɗ ŋ hultiŋ kaaniɗ ci, mand haa ɗu jangɗi ini Kooh woo ɗu nga wii :
32 “ Ñam Koohiŋ Ibrahiima na Isaahha na Yaŋhooɓa. ” Kooh, a Koohiŋ kaaniɗ ci haa, waaye a Koohiŋ pesiɗ ci. »
33 Wa mboolnda kerah jangɗohiŋ ɗe weem, ɓa yeemuusa.
Nakohi uup yak
34 Wa Farisen ca yeg ne Yeesu rangiɗ nguɓ caŋ Sadusen ca, ɓa cohha.
35 Yino nga ɓa, jangɗohoh yakak ŋ waasiŋ Musaa, waaɗta ɗe markis ; a meekissa ɗe ne :
36 « Jangɗohohi, a winde nakoh uup yak ŋ nakoh ciŋ waasi ? »
37 Yeesu loffa ɗe ne : « “ Waaɗa Heɗ ɓoo Koohiŋ ɗa na keeñiŋ ɗa jen, na ruuhiŋ ɗa jen, na liiɓiŋ ɗa jen. ”
38 Weɗ nakohi uup yak te weɗ koc ŋ nakoh ci.
39 Wi kanakɗoh te wa raakiɗ njiriñ findi wi koc, weɗ ne : “ Waaɗa morom fu findi fu waaɗoh haf fu. ”
40 Waasiŋ Musaa na jangɗoh ciŋ woosuuɗ ci jen gaƴuk ŋ nakoh ci kanak cii. »
Mucɗohi Gapohse ye ŋ Dawuuda ?
41 Waam raak Farisen ca ris ŋ ɗiska, Yeesu meekissa ɓa ne :
42 « Ɗu liiɓ ye ŋ ini kaɗ ŋ Mucɗohi Gapohse ? A setiŋ ɓa ? » Ɓa loffa ɗe ne : « A setiŋ Dawuuda. »
43-44 Yeesu woosa ɓa ne : « Dawuuda woo ŋ Fiis ci ne : “ Heɗ ɓoo woyiɗ Heɗ to ne : ‘Ɓoofa ŋ ñaahmiŋ ngo po mbaɗna ŋ folan ɓi sang ɗa, fu tum ɓa degoha kot.’ ” Kon Dawuuda ɓeeɗkohee Mucɗohi Gapohse Heɗ ce, haa e ? Te raak Dawuuda riifiɗ na Fuuɗsi Hoolohngaani, Fuuɗsiŋ Kooh, kon wa min na nikoh ?
45 Mbaa nik ne Dawuuda ɓeeɗkohee ɗe Heɗ ce ɗah, a min na nikoh setiŋ ɗe ? »
46 Jaarra ali ɓo' minɗi ɗe lof ali in, ina kooɗoh waam, ɓo' kaañisɗi ɗe meekis ne a markisuk ɗe.