13
Andiiniŋ sokohi
1 Mbaɗi, Yeesu pulohha kahna, a kaɗta, a ɓooffa ŋ sereendaŋ cookma ne a jangɗoh.
2 Mboolo yakiɗ hayya ndeerra ɗe, po a mirndohha rap ŋ gaal, a ɓooffa nga. Mboolnda jen tufukka ŋ sereendaŋ masma.
3 A woosa na ɓa, ŋ andiin, ŋ ini kaɗ ŋ in laayiɗ ; a woo ɓa ne :
« A nikee guuroh, a kaɗta soka.
4 Wi a soke, a saaweeɗa tisohi, in nga hennda ŋ waasi ŋ ɗooƴ yohni, sel ci hayya ñammba ca.
5 Raakka ci keen ŋ ɗisik laayaaɗi merhey, raakiɗ atoh, tahha po ca arra paar,
6 waaye wi nohi dam, in ca paaree leeɓpa po ca onnja sagu ini ca raakeeɗi niir nooɗiɗ.
7 In ŋ tisohi nammba keen ŋ ɗisik raakiɗ ñaaɓaaɓ ; ca paarandoosa na ñaaɓaaɓ ca, ceem ndooƴca ca.
8 Waaye raakka ca keen ŋ keheƴ baahiɗ, ca rimmba cum kuɓu teemet (100), cum ndaŋkiyaah-yasna-yino (60), cum ndaŋkiyaah-kaahay (30). »
9 Ƴutta, Yeesu woosa ɓa ne : « Ɓo' nu raak nof ɗah, a kerhaat ! »
10 Taalubeeca reɓpa nga ɗe, ɓa meekissa ɗe ne : « Wa ye tah fu woyee na ɓa ŋ andiin ? »
11 A loffa ɓa ne : « Ɗu onuuɗ ne ɗu inah in ci ɗasɗukiɗ ciŋ Nguuriŋ-Ɗafki waaye ɓeɗ, ɓa rahasɗi ca.
12 Ɓoyi raak hey ɓaatse po a laayiɗ lool, waaye ɓoyi raakɗi, ini ƴissuuti a amb sah hey naafse nga ɗe.
13 Ineem weɗ tah po ŋ woyee na ɓa ŋ andiin. Laam ɓa ɗii marak te ɓa hotɗi ; ɓa ɗii sikɗuk, waaye ɓa kerahɗi, ɓa inahɗi.
14 Ini ɓa tum, weɗ ini Kooh woyee taamboh ŋ woosuuɗi Esayi an :
“ Ɗu hey sikɗuke baahiɗ waaye ɗu inhanɗi muk ;
ɗu hey marke baahiɗ, waaye ɗu hotanɗi muk.
15 Keeñ ciŋ ɓooɓii
raakisɗi yeg yeg ;
ɓa rangiɗ nof ciŋ ɓa,
ɓa ɗuungiɗ has ciŋ ɓa
ne ɓa hotuu na has ciŋ ɓa,
ɓa kerhuu na nof ciŋ ɓa,
te ɓa inhuu ngaŋ keeñ ciŋ ɓa ;
te ŋ ineem,
ɓa minuu wiiruk nga so
ne ŋ wiriɗ ɓa. ” »
16 Yeesu woyissa taalubeeciŋ ɗe ne : « Waaye ɗu, ɗu neɓɗiɗ, has ciŋ ɗu ca ɗii hot te nof ciŋ ɗu ca ɗii kerah.
17 Ñam na woyee ɗu wa te wa keeh, woosuuɗ laayiɗ na ɓo' yurhiɗ laayiɗ maɗeen hot ini ɗu na hote te ɓa hotɗaa, ɓa maɗeen kerah ini ɗu na kerhe te ɓa kerahɗaa.
18 Mbaa sikɗukaat ini andiiniŋ sokohi tokis.
19 Ɓooɓi kerah woo ki kaɗ ŋ Nguuriŋ-Ɗafki, te ɓa inahɗi ini wa tokis, Seytaani na haye nga ɓa, a kooɗ ini soku ŋ keeñ ciŋ ɓa. Ɓeem, ɓeɗ ini saawu ŋ sereendaŋ waasa.
20 Ɓinooɓi ɓeɗ paaroh ŋ ini saawu ŋ kehƴi raak atoh ci ; ɓeɗ ɓooɓi na kerhe Woo ki, ɓa jaara teyɗuk na keeñ soosiɗ,
21 waaye ɓa na raakeeɗi niir ŋ haf ɓa, ɓa na maañeeɗi nga. Ɓa raak miskiɗ wala ɓa tolfiɗassee sagu Woo ki ɗah, ɓa ar faɗ.
22 Ɓinooɓi ɓeɗ paaroh ŋ ini saawu ŋ ñaaɓaaɓ ci ; ɓeɗ ɓooɓi na kerhe Woo ki, ɓa teyɗuka, waaye liiɓsiɗoh ciŋ Adina na raak-raak ci na njuyohe, amb ɓa po Woo ki minuu rim ali in.
23 Ɓinooɓi ɓeɗ paaroh ŋ ini saawu ŋ kehƴi baahiɗi ; ɓeɗ ɓi na kerhe Woo ki, ɓa inah ini wa tokis ; ɓa raak rim, ɓum teemet (100), ɓum ndaŋkiyaah-yasna-yino (60) ɓinooɓi ndaŋkiyaah-kaahay (30). »
Andiiniŋ gaacooh fi
24 Yeesu naandsukissa mboolnda andiin wiiriis, a woo ɓa ne : « Nguuriŋ-Ɗafki, wa mand na inii : A nikee ɓo', a sokka tisoh baahiɗ ŋ yohon ce,
25 waaye wa weka ree, ɓooɓa neeheeɗa, sangiɗaŋ ɗe ɓayya gaacooh, a sokka ca ŋ ɗooƴ tohooca, a cootta.
26 Tohra paarra, gaacooh fa paarra naa.
27 Ŋ ineem ñaam ciŋ heɗ yohni hayya nga ɗe, ɓa woosa ɗe ne : “ Kilifaani, fu sokee tisoh baahiɗ ŋ yohon fu haa e ? Moo gaacooh fa puloh nde ? ”
28 A loffa ɓa ne : “ A ɓoyi sang ngo tum ineem. ” Ɓa woosa ɗe ne : “ Kon ɓoo kaɗa ɗofa e ? ”
29 A loffa ɓa ne : “ A'aa ! Ŋ sang ne ɗu ɗofee wa ɗah, ɗu ɗofndoh tohri,
30 faɗaat, ca hun ca yak po ŋ nguɗa. Nguɗa ree ɗah, ŋ hey woye nguɗoh ci ne : ‘Kocaat weɗ nihis, ɗu toka ɗuf ɗuf, ɗu doh ca ; waaye ɗu ɓek tohri ŋ ndapiŋ ngo.’ ” »
Andiiniŋ tisohiŋ mutardaani
31 Yeesu naandsukissa ɓa andiin wiiriis, a woo ɓa ne : « Nguuriŋ-Ɗafki, wa mand na inii : A nikee ɓo', a ɓayya kuɓu mutarda, a sokkaa ŋ yohon ce.
32 Kuɓu mutarda weɗ uup ƴissuut ŋ tisoh ciŋ kidig ci ƴin ci na sokse ŋ nguuk jen. Waaye wa paarra ɗah, wa yak po wa uup ca, wa nik kidig po sel ci taar ŋ naak ciŋ wa. »
Andiiniŋ lawiiri
33 A naandsukissa ɓa andiin wiiriis an : « Nguuriŋ-Ɗafki, wa mand na findi ɓitiɓ na ɓayohee lawiir a siiɓa na kanoh mun kaahay ; ƴut ɗah, ini siiɓuuɗi jen guuf. »
Toksiŋ andiiniŋ gaacooh fi
34 In ceem jen Yeesu woyee mboolnda ca ŋ andiin, te a woyeeɗi na ɓa ŋ ini nikɗi andiin.
35 A woyohee ɗaa ne ini woosuuɗa woyee raak, a woyee ne :
« Ŋ hey woye ŋ andiin,
ŋ woo in ci ɗembiɗ ci,
ina amboh ŋ feraŋ Adina poyi. »
36 Weɗi Yeesu faɗoh mboolnda, a aassa ŋ kahna. Taalubeeciŋ ɗe hayya nga ɗe, ɓa woosa ɗe ne a toksiɗaat ɓa andiiniŋ gaacooh fi paar ŋ yohni.
37 A loffa ɓa ne : « Kuɓkiŋ ɓoyi a yi ɓoyi sok tisohi baahiɗi,
38 yohni weɗ adinaani, tisohi baahiɗi weɗ ɓooɓi ɓaah ŋ Nguuriŋ-Ɗafki, gaacooh fi weɗ ɓooɓi ɓaah ŋ Seytaani.
39 Sangiɗi sok gaacooh fi a yi Seytaani, nguɗi weɗ reehiŋ Adina, nguɗoh ci ɓeɗ malaakaaci.
40 Findi gaacooh fi nihsohu, wa ɓekuusa ŋ yongkaah, wa kaɗohan ɗaa ne Adina reeh ɗah.
41 Kuɓkiŋ ɓoyi hey tuuƴe malaakaaciŋ ɗe, ca ɗof ɓi ɓaahɗi ŋ Nguuriŋ ɗe, ɓeɗ ɓooɓi na bakaaɗɗukohe jen na ɓi na tume ini nikɗi waas,
42 ca njaf ɓa ŋ yongkaaha yakka, ɗiska fuɗ na ɗoɓɗoh sis raak.
43 Weem weɗ ɓooɓi yurhiɗ ci siñaarɗohan findi nohi ŋ ɗooƴ Nguuriŋ Baabiŋ ɓa. Ɓo' nu raak nof ɗah, a kerhaat. »
Raak-raaki ɗembɗu
44 Ŋ ineem Yeesu woosa taalubeeciŋ ɗe ne : « Nguuriŋ-Ɗafki mand na inii : Wa nikee raak-raak, wa ɗembɗuusa ŋ ɗooƴ yohon, ƴaar hottaa, a ɗembɗissaa. Weɗi a kaɗoh sumoh na sumoh, a toonnda in ca a raakee jen, a rommba yohna. »
45 A woyissa ɓa ne : « Nguuriŋ-Ɗafki mand na inii : A nikee toontukoh. A waakeeɗa per moɗiɗ,
46 wi a waak po a hotta yino moɗoh na moɗoh, a kaɗta, a toonnda in ca a raakee jen, a rommbaa. »
47 A woyissa ɓa ne : « Nguuriŋ-Ɗafki mand na inii : Ɓa nikee seeɓoh, ɓa njaffa mbaal ŋ ɗooƴ cookmi, wa ammba cuurund nu cuurund
48 po wa riiffa, ɓa ɓayyaa ŋ sereendaŋ cookma, ɓa ɓooffa. Ɓa nihissa baahiɗ ca, ɓa ɓekka ca ŋ pañe, ɓa mbetta ca raakaaɗi etoh ca.
49 Wa mandan ɗaa ne Adina reehee ɗah ; malaakaaci hey haye ne ca saɓsoh ɓooɓi yurhiɗ ci na ɓi yurhaaɗiici.
50 Ca njaf yurhaaɗiici ŋ yongkaaha yakka, ɗiska fuɗ na ɗoɓɗoh sis raak. »
51 Wa Yeesu ƴut woo ineem, a meekissa taalubeeciŋ ɗe ne : « Andi ɗu inhiɗ in ceem jen ini ca tokis ? » Ɓa loffa ɗe ne : « Ee ! »
52 A woosa ɓa ne : « Ɓo' nu ɓaah ŋ jangɗohoh ciŋ waasi, kaɗ po a nik taalube Nguuriŋ-Ɗafki ɗah, a na mande na heɗ kahni na uuske as na kiisiɗ ŋ ɗaakkiŋ ɗe. »
Yeesu ŋ Nasareet
53 Wa Yeesu ƴut woo andiin ceem, a kurkohha ndaam,
54 a kaɗta kur ka a yakoh, a jangɗoheeɗa ŋ sinaagogaŋ ɓa, ɓooɓa nikee ŋ ɗiska feyuusa, woyeeɗa ne : « Ki'inhi na ɗe wii, a ɓayoha nde, na keemaan ci a na haɓɗe ?
55 A kuɓkiŋ miniseeni haa e ? A Maryaama yaay ɓa haa e ? Taambɗoh ciŋ ɗe ƴaar ci, e Saak, Suseef, Simong na Yuud, haa e ?
56 Te taambɗoh ciŋ ɗe ɓitiɓ ci ɓa ɗii na ɓoo ndii jen haa e ? Kon in cii jen a puloh na ca nde ? »
57 Ineem weɗ tahee po ɓa minɗi ɗe teyɗuk.
Waaye a woosa ɓa ne : « Woosuuɗ na kerhiɗasse ŋ ɗisik ci jen po tas ŋ harmban ɓaah ciŋ ɗe na kur ka a genoh. »
58 Ɓa koseeɗi ɗe, tahha po a tumɗi keemaan laayiɗ nga.