11
Yahya woosiɗ ɓi ɓo' ŋ Yeesu
1 Wa Yeesu ƴut eɗ taalubeeciŋ ɗe ndaŋkiyaah na kanak ci (12) dengkoh ciŋ ɗe, a kurkohha ndaam, a kaɗta kur caŋ ɓak caam ne a jangɗoha nga, a woyeeɗa Yegɗohiŋ Muci nga.
2 Wa raak Yahya Ɓoktohi taƴuuɗ ŋ kasoona, a kerahha in ci Mucɗohi Gapohse haɓɗe. A woossa ɓi ɓo' ŋ taalubeeciŋ ɗe
3 ne ɓa meekis ɗe andi a yi Mucɗohi Gapohse joy hay wala ɓa joy sek ɓo' wiiriis.
4 Wa ɓa ree ŋ Yeesu, a loffa ɓa ne : « Kaɗaat, ɗu woya Yahya ini ɗu hot te ɗu kerahhaa :
5 Fuuliɗ ci ɓii hot, lafañ ci ɓii tiind moɗoɗ, ɓi raak kosaay ki na oɓse faan ɓii wir, ɗikiɗ ci ɓii kerah, kaaniɗ ci ɓii hulit te ñakiɗ ci ɓii woyu Yegɗohiŋ Muci.
6 A sumaat, ɓoyi moosanɗi kurkoh ŋ kosi a kos sagu tumohaaɗ ciŋ ngo. »
Yeesu woyiɗ ŋ Yahya
7 Wa taalubeeca woossee coote, Yeesu woyeeɗa na mboolnda ŋ ini kaɗ ŋ Yahya. A woosa ɓa ne : « Ɗu kee ye marka ŋ nduufa, caaɓsi yino-kongi puuɗsi na giyaange e ?
8 Ŋ liiɓɗaa ! Kon, ɗu kee ɓa marka, ɓo' ɓekkiɗ kulɓa moɗiɗ e ? Ŋ hot ɓooɓi na ɓekke kulɓa moɗiɗ na nike ŋ kahan ciŋ buur ci.
9 Moo, ɗu kee ɓa marka ? Woosuuɗ e ? Ee, ñam na woyee ɗu wa, a yi uup sah woosuuɗ,
10 laam a yi Fiis ci Hooliɗ ci woyee an :
“ Ŋ hey woose ɓo' a adug ɗa,
ne a haɓɗiɗ ɗa waasi. ”
11 Ñam na woyee ɗu wa te wa keeh, ŋ ɓooɓi rimuk jen ali ɓo' uupɗi Yahya Ɓoktohi nga. Waaye ɓoyi uup ƴissuut ŋ Nguuriŋ-Ɗafki a yi uup ɗe yak.
12 Ina amboh ŋ jamanoonaŋ Yahya Ɓoktohi poyi, Nguuriŋ-Ɗafki wii hay na hatil te ɓi na aasohee wa hatil ɓeɗ raaka.
13 Laam, woosuuɗ ci na waasiŋMusaa nikee woyeeɗa woo-woosuuɗ po findi Yahya hayoh ;
14 te ɗu waaɗa teyɗuk ɗah, a yi Ilyas yi joyee hay.
15 Ɓo' nu raak nof ɗah, a kerhaat !
16 Moo, ŋ min mandtiɗkoh ɓooɓi woti na ye ? Ɓa mand na komaakci ɓoof ŋ ɗiski na toonohse ŋ kur ki, ɓum woyee ɓinooɓi
17 ne :
“ Ɓoo tipɗiɗ ɗu,
ɗu mbecɗi.
Ɓoo ƴeekɗiɗ ɗu ƴeek ruy,
ɗu fuɗɗi. ”
18 Laam Yahya hiiɗ, a nikeeɗi ñamoh, a nikeeɗi anoh ; ɓa na woye ne a raak jiini !
19 Kuɓkiŋ ɓoyi hayya, a ñameeɗa, a aneeɗa, ɓa na woye ne : “ A ñamoh, a anoh biiñ, te a nawle juuti'oh ci na bakaaɗoh ci ! ” Waaye liiɓohaaɗi moɗiɗi puloh ŋ Kooh na teeɓohe yurhiŋ wa, ŋ tumohaaɗ ciŋ wa. »
Kur ci sang kos
20 Ŋ ineem, Yeesu cammba ngas ɓi kur ci a uupee tumoh keemaan, laam ɓa ɓoƴsoheeɗi pesohaaɗ, a woosa ne :
21 « Mas, ɗu ɓi gen Korasin na Betsayda ! Keemaan ci tumu ŋ kur ciŋ ɗu, ca tumseen ŋ Tiir na Sidoon ɗah, ɓa heen ɓoƴsohe tumohaaɗ ciŋ ɓa maañ, ɓa ɓekuk daah ɓa ɓoof ŋ wet ne ɓa teeɓoha !
22 Weɗ tah ñam na woyee ɗu wa, ŋ mbehaŋ atteena, e mbugali ɗu rahsan uupan misik wiŋ ɓi Tiir na ɓi Sidoon.
23 Te ɗu ɓi gen Kapernawum, ɗu liiɓiɗ ne Kooh hey ɗu rapɗe po ŋ Eel ci e ? Muk ! A hey ɗu ruhsiɗe po ŋ kaaniɗ ca ; laam keemaan ci tumu ŋ kur kiŋ ɗu, ca tumseen ŋ Sodom ɗah, wa heen rise poyi.
24 Weɗ tah ñam na woyee ɗu ne, ŋ mbehaŋ atteena e mbugali ɗu rahsan uupan misik wiŋ ɓi Sodom. »
E Yeesu na inhiɗohe Baabi
25 Ŋ jamanoocaam, Yeesu woosa ne : « Mi yii corkiɗ ɗa Baab, fu yi Heɗ Eel ci na kehƴi, ŋ ini fu ɗasɗoh heɗ haf ci na ñaañiɗ ci in cii, fu teeɓpa ca komaakci.
26 Ee Baab, mi yii corkiɗ ɗa. A fu waaɗoha ɗaa ŋ baah kiŋ ɗa. »
27 Yeesu woosa ɓooɓa ne : « Baabiŋ ngo degiɗ in ci jen ŋ yaah ho te ali ɓo' inahɗi Kuɓki ɗal Baabi, te ɓo' inahɗi Baabi, ɗal Kuɓki, na ɓooɓi a waaɗ ɓa ɗe teeɓ.
28 Hayaat nga so, ɗu ɓi yaaɓiɗ ci jen na raankiɗ ci, ŋ hey ɗu one, ɗu iɗsiɗuk.
29 Teyɗukaat ini ŋ degan ɗu, jangaat nga so, ŋ ɓo' soosiɗ, ŋ ɓo' eɗfiɗ te ɗu hey iɗsiɗe keeñ ciŋ ɗu.
30 Ini ŋ degan ɗu yooɓiɗ ɓayu, te ini mi na raanohe eɗfiɗ. »