12
Andiiniŋ guuroh ca añaandiɗ ca
1 Yeesu woyeeɗa na kilifaacaŋ Yawuut ca ŋ andiin an : « A nikee ƴaar, a yippa yohon reseñ, a ɗinngaa po wa willa. A acca nung pooƴoha masmiŋ reseñi nga, a haɓiɗta paraang niiɗohaa wa. Ƴutta, a hanndaa deg ŋ yaah ɓi guuroh reseñ ne wa ruund ɗah ɓa paysoh ; a ɓaaɓpa.
2 Wi yohni ruund, a tuuƴca ñaam ŋ guuroh ci ne a rahas ɓakiŋ ɗe ŋ reseñi.
3 Guuroh ca ammba ñaama, ɓa laɓpa ɗe, ɓa aannja ɗe yaah ɓarang.
4 A tuuƴissa ñaam wiiriis nga ɓa, ɓa laɓpa ñaama ŋ haf, ɓa ɓassohha ɗe.
5 A tuuƴissa ya kaahayɗoh, ɓa appa ɗe. Ɓa laɓpa ñaam laayiɗ ɓi fu inah ne a namee ɓa nam tuuƴ, ɓa appa ɓum.
6 A tasɗee kuɓkiŋ ɗe a keeñkoh dong. Ŋ mirndaani, a woossa ɗe nga ɓa, a woosa ŋ haf ce ne : “ Ɓa hey supke kuɓkiŋ ngo. ”
7 Waaye wi pangkoh ci hot ɗe, ɓa woosa ŋ harmban ɓa ne : “ Lamohiŋ yohni a yi ! Hayaat ɓoo ap ɗe, lamaahi nik wiŋ ɓoo kotii. ”
8 Ɓa ammba ɗe, ɓa appa ɗe, ɓa mbetta ɗe ŋ finho yohni. »
9 Yeesu woosa ne : « Moo, ɗu liiɓ ne heɗ yohniŋ reseñi tuman na ? A hey haye, a ap guuroh ci, a deg yohni ŋ yaah ɓi ɓo' wiiriis.
10 Hanaa ɗu jangɗi ini Fiis ci Hooliɗ ci woo wii :
“ Atoh fi taɓahoh ci mbete,
mirndohiɗ nik atoh fi amb taɓahi.
11 Ineem puloh ŋ Heɗ ɓoo,
wa in feyohiɗ ŋ has ciŋ ɓoo. ” »
12 Ŋ ineem, kilifaacaŋ Yawuut ca inheen ne Yeesu woyee na ɓa ŋ andiina, ɓa waakeeɗa findi ɓaa hee ɗe ambohe. Waaye ɓa neƴƴoheen mboolnda, tahha po ɓa faɗta ɗe, ɓa cootta.
Lempooniŋ buur Sesaar
13 Ŋ finho ineem, ɓa tuuƴca ɓi Farisen na ɓi ɓo' ɓaah ŋ langtoh caŋ Herod ne ɓa kaɗ ŋ Yeesu, ɓa woyɗukoh ɗe woo ki min ɗe ɓek.
14 Ɓeem hayya woosa ɗe ne : « Jangɗohohi, ɓoo inhiɗ ne fu woyoh keeh te fu nupɗi ali ɓo' ; laam, fu na markeeɗi ŋ yaki ɓoyi yak, waaye fu na jangɗohe waasiŋ Kooh ŋ keeh ; woya ɓoo andi wa waas ne Sesaar, buura yakkaŋ Rom, wirndasse lempo wala ? Ɓoo wirind, wala ɓoo wirnduu ? »
15 Waaye Yeesu inahha ne woo ciŋ ɓa keeh nga ɓa haa, a woosa ɓa ne : « Wa ye tah ɗu waaɗee so ɓek ? Komaat to hanjar dinaar ndii ŋ marak. »
16 Ɓa eɗta ɗe hanjar yino, a meekissa ɓa ne : « Ya ɓa raak nataalii, na tiiki nik nga ? » Ɓa loffa ɗe ne : « A Sesaar. »
17 A woosa ɓa ne : « Eɗaat Sesaar ini Sesaar raak, te ɗu eɗ Kooh ini Kooh raak. » Ɓa feyuusa keeh-keeh nga ɗe.
Sadusen ci na ini kaɗ ŋ hulti
18 Ŋ ineem, ɓooɓi na woyse Sadusen hayya ŋ Yeesu. Ɓeɗ ɓi na woye ne kaaniɗ ci hultanɗi. Ɓa hayya ŋ Yeesu, ɓa woosa ɗe ne :
19 « Jangɗohohi, nakohii weɗ Musaa fiisiɗ ɓoo : “ Ƴaar kaan te a raakɗi kuɓu na ɓitiice ɗah, a taambɗoh ce joy tok ɓitɓi, a raakiɗ ƴaari kaanɗi kuɓu. ”
20 Waaye wa raakeen taambɗoh yasna-kanak. Saawi tokka ɓitiɓ, a faɗɗi kuɓu a kaannda.
21 Yi taamb nga ɗe lammba ɓitɓa, a nammba kaan raakaaɗi kuɓu, yi kaahayɗoh nammba tum ɗaa.
22 Ɓa kaɗeeɗa po yasna-kanak ci jen kaannda te ali ɓo' raakɗi kuɓu nga ɓa ; ƴutta, ɓitɓa nammba kaan.
23 Ɓooɓi hulit ɗah, a nikan ɓiti ya ɓa nga ɓa ? Laam, ɓeɗ ɓi yasna-kanak ci jen ɓa tokiɗ ɗe findi ɓitiɓ ! »
24 Yeesu loffa ɓa ne : « Ini muuƴiɗ ɗu, weɗ ne, ɗu inahɗi ini Fiis ci woo, ɗu inahɗi hatiliŋ Kooh.
25 Ɓooɓi hulit ɗah, ƴaar ci heyɗi toke ɓitiɓ, ɓitiɓ ci heyɗi tokse, ɓa mandan na malaakaaciŋ Eel ci.
26 Ŋ ini kaɗ ŋ kakaan ki na hultiŋ ɓooɓi, andi ɗu jangɗi ŋ teerndiŋ Musaa, ŋ ɗiski na woye ŋ kidga ƴina jaale ? Ŋ ndeem, Kooh woo ɗe ne : “ Ñam Koohiŋ Ibrahiima, Isaahha, na Yaŋhooɓa. ”
27 Kooh, a Koohiŋ kaaniɗ ci haa, a Koohiŋ pesiɗ ci. Muuƴi ɗu muuƴ yakiɗ. »
Nakohi uup yak
28 Ƴaar ɓaah ŋ jangɗohoh caŋ waasiŋ Musaa kerahha woo caŋ ɓa. A hotta ne, findi Yeesu lofoh ƴaaɓa, wa ɗaa. A reɓpa, a meekissa ɗe ne : « A winde nakoh uupiɗ etoh ŋ nakoh ci jen ? »
29 Yeesu loffa ɗe ne : « Wii weɗ nakohi uupiɗ etoh : “ Sikɗuka Israayel, Kooh Heɗ ɓoo a yi dong Heɗi !
30 Waaɗa Heɗ ɓoo, yi Koohiŋ ɗa, na keeñiŋ ɗa jen, na ruuhiŋ ɗa jen, na liiɓiŋ ɗa jen, na hatiliŋ ɗa jen. ”
31 Wii taammba nga : “ Waaɗa morom fu findi fu waaɗoh haf fu. ” Raakɗi nakohi uup nakoh cii. »
32 Ƴaara woosa ɗe ne : « Ee Jangɗohohi, fu woo keeh ne a Kooh yino dong raak, wiiriis raakɗi ɗal a yi ;
33 te fu waaɗ ɗe na keeñiŋ ɗa jen, na liiɓiŋ ɗa jen, na hatiliŋ ɗa jen, fu nam waaɗ morom fu findi fu waaɗoh haf fu ɗah, weɗ uupiɗ njiriñ fu hoomɗiɗ Kooh ɗoopaat, wala seeƴuk nu min nik ɗah. »
34 Jaarra Yeesu hotta ne a lofiɗ na liiɓohaaɗ moɗiɗ, a woosa ɗe ne : « Fu usɗi Nguuriŋ-Kooh. » Ŋ finho ineem, ali ɓo' kaañisɗi ɗe meekis ne a markisuk ɗe.
Mucɗohi Gapohse na Dawuuda
35 Yeesu nikee jangɗoheeɗa ŋ ɗooƴ Kahan Kooh poyi. Ngaŋ jangɗoheem a meeksohha ne : « Jangɗohoh ciŋ waasi minoh woo na ne : “ Mucɗohi Gapohse, a setiŋ Dawuuda ? ”
36 Te ŋ hot Fuuɗsi Hoolohngaani, woyɗukohiɗ Dawuuda inii :
“ Heɗ ɓoo woyiɗ Heɗ to ne :
‘Ɓoofa ŋ ñaahmiŋ ngo
po mbaɗna ŋ folan ɓi sang ɗa,
fu tum ɓa degoha kot.’ ”
37 Dawuuda ŋ haf ce a yi ɓeeɗkoh Mucɗohi Gapohse Heɗ ce, kon a min na nikohis setiŋ ɗe ? »
Wa raak mboolo laayiɗ nga sikɗukeeɗa Yeesu, ɓa neɓuusa.
38 A woyeeɗa ɓa ŋ jangɗohaŋ ɗe ne : « Wortukaat mand na jangɗohoh ciŋ waasiŋ Musaa, ini neɓ ɓa weɗ ne ɓa ɓekuk kulɓa yakiɗ ɓa tiindsuke. Te ɓa kañɗassee yaah kanak ŋ ɗisik ci na toonohse ŋ kur.
39 Ɓa nam waaɗ ne, ɓa nikan ŋ fiki ɓooɓi ngaŋ sinaagog ci, te ɓa ɓeeɗku kañam yakak ɗah, ɓa na waaɗe ɓoof ŋ ɗisik ci uup eɗu cir.
40 Ɓeɗ na ñame raakuuɗiŋ ɓitiɓ ci ƴaar ciŋ ɓa kaan po kahan ciŋ ɓa sah ; te ɓa kiimee Kooh ɗah, wa minuu reeh, ɓa waakee hotaat to. Ambaat ne a mbugaliŋ ɓa uupan misik. »
Eɗohaŋ ɓitɓa ñakɗa
41 Wa Yeesu ƴut, a ɓooffa, a yurhiɗkohha na ɗiska na ɓekohse kopora ŋ Kahan Kooh, a markeeɗa mboolnda, ɓa ɓekeeɗa kopor nga, a hotta ɓi heɗ alal laayiɗ ɓekeeɗa kopor keeh-keeh nga.
42 A nammba hot ɓitiɓ ñakiɗ, yi ƴaar ce kaan, ɓekiɗ nga hanjar kanak ƴin findi pistiriñ.
43 Yeesu ɓeeɗukka taalubeeciŋ ɗe, a woosa ɓa ne : « Ñam woo ɗu wa te wa keeh, ini ɓitɓi ñakɗii eɗoh, weɗ uup ciŋ ɓinooɓi jen.
44 Laam findi ɓa hend jen, ɓa eɗoh ini ɓa etohɗi ŋ raak-raakiŋ ɓa, waaye a yi, ŋ ñaki a ñak a eɗoh ini a raakee pesoha jen. »