17
Ɗaasoh na kos na ini ñaam joy haɓiɗ
1 Yeesu woosa taalubeeciŋ ɗe ne : « In ci na hee kome ɓo' bakaaɗ ñakanɗi, waaye mas ɓoyi na hee ca ɓeke.
2 Ɓoyeem tokseen atoh ɓitiɗ ŋ mbooh, a njafu ŋ cookma ɗah weɗ ngisoh nga ɗe, a bakaaɗɗukoh yino ŋ ɓooɓi ƴin cii.
3 Mbaa markaat in ci ɗu na haɓɗe.
Morom fu bakaaɗ nga ɗa ɗah, woytohaa ɗe, inwaaso amb ɗe nga ɗah, ɗaasaa ɗe.
4 Ali a ɗal ɗa waas yasna-kanak ŋ mbehi yinoori, te waa nu nga ɗa a ɗaasnuk ɗa ɗah, ɗaasaa ɗe. »
5 Apootar ci woosa ɗe ne : « Kilifaani, ɓaatɗa ɓoo kosi ɓoo kos. »
6 Heɗ ɓoo Yeesu woosa ɓa ne : « Ali ɗu raak kos hend na kuɓu mutarda ƴissuut, ɗu woo kidgii ne : “ Ɗofka, fu kaɗ yipa niir ciŋ ɗa ŋ cookma ” ɗah, wa hey ɗu kerhiɗe.
7 Ɓo' nga ɗu raak ñaam, yeem guurɗee ɗa wala a niiɗɗee ɗa, a puloh yohon ca ɗah, fu heyɗi ɗe jaare woo ne : “ Haya fu ñam. ”
8 Waaye fu na hee ɗe woye ne : “ Tikiɗ to, fu ɓekuk kulɓa wiiriis, ne fu deƴiɗ to. Ŋ ñam, ŋ an po ŋ ƴut ɗah, fu han ñam, fu an. ”
9 Tum ini fu nak ɗe, wa tahanɗi po fu corkiɗ ñaamiŋ ɗa.
10 Wa mand ɗaa nga ɗu, ɗu haɓiɗ ini ɗu naku po ƴut ɗah, woyaat ne : “ Ɓoo ñaam dong, ɓoo haɓiɗ ini ɓoo joy haɓiɗ. ” »
Yeesu wirɗiɗ ƴaaɓa faan caŋ ɓa oɓsuke
11 Yeesu nikee ŋ waas Yerusalem, a taambeeɗa ŋ harmban Samari na Galile,
12 a aaseeɗa ŋ kur, weɗ ƴaar ndaŋkiyaah hayoh cohe na ɗe, ɓa raakee kosaay ki na oɓse faan ; ɓa tufukka ɗisik usiɗ,
13 ɓa woosa ŋ ɗafka ne : « Yeesu Kilifaani, ɓoo miskaat ɗa ! »
14 A hotta ɓa, a woosa ɓa ne : « Kaɗaat, ɗu teeɓa haf ɗu seeƴkiɗoh ca. » Ɓa kaɗeeɗa, ɓa wirra.
15 Yino nga ɓa, wa a hot ne a wiriɗ, a guridda ŋ Yeesu, a yakɗeeɗa Kooh ŋ ɗafka.
16 A ƴekka ŋ kot ciŋ Yeesu po pukiŋ ɗe reesa kehƴi, a corkiɗta ɗe. Ƴaareem ɓaahee nga ɓi Samari.
17 Wa Yeesu hot ɗe, a woosa ne : « Ɓa ndaŋkiyaah ɓeɗ wirɗu haa e ? Moo ɓa nde yasna-nikiis ca tas ?
18 A yinoori dong hay ne a yakiɗ Kooh, te a Yawuut haa sah ! »
19 A woosa ƴaara ne : « Kurka, fu miniɗ coot, ƴaari ; kosi fu kos wirɗiɗ ɗa. »
Nguuriŋ-Kooh
20 Wa raakka mbeh, Farisen ca meekissa Yeesu ne : « Nguuriŋ-Kooh na hee haye kiɗa ? » A woosa ɓa ne : « Nguuriŋ-Kooh hayee ɗah, wa nikanɗi ini ɓo' min hot,
21 te ɓo' woyanɗi ne : “ Wa ɗii ŋ ndii ! ” wala “ Wa ɗaa ŋ nden ! ” Laam Nguuriŋ-Kooh wa ɗii ŋ ndii na ɗu. »
22 Ƴutta, a woosa taalubeeciŋ ɗe ne : « Jamano hey haye, ɗu hey waaɗe hot Kuɓkiŋ ɓoyi, ali nik ne wa nikan mbeh yino dong, waaye ɗu minanɗi wa.
23 Te ɓa hey ɗu woye ne : “ A yii ŋ ndii ! ” wala “ A yaa ŋ nden ! ” Kanaat kaɗ nga, kanaat ɓa ñaakiɗ.
24 Findi meleñ na pulohe, wa ñiiniɗ ɓak po ɓak, Kuɓkiŋ ɓoyi na hee mande ɗaa ŋ mbehiŋ ɗe,
25 waaye bala ineem, a joyiɗ raak miskiɗ laayiɗ te ɓooɓiŋ jamanooni woti-woti sang ɗe.
26 Bala Kuɓkiŋ ɓoyi hayissan ɗah, wa mandan findi wa mandee ŋ jamanoonaŋ Noohin.
27 Ɓooɓa nikee ñameeɗa, aneeɗa, ɓa kilookeeɗa, ɓa kilookseeɗa po mbeha Noohin aasoh ŋ gaala, masuɓ laayiɗ riiffa kehƴi, wa ɗummba ɓa jen.
28 Na findi jamanoonaŋ Loot, ɓooɓa nikee ñameeɗa, ɓa aneeɗa, ɓa romeeɗa, ɓa tooneeɗa, ɓa guureeɗa, ɓa taɓaheeɗa
29 po mbeha Loot pul Sodom, yongkaah na suufar toɓuusa ŋ ɗafuk ɓa, wa ɗummba ɓa jen.
30 Mbehi Kuɓkiŋ ɓoyi na hee hotkohe, wa mandan ɗaa.
31 Mbeheem, ɓoyi wa na hee raake ŋ ɗafuk teeraasiŋ ɗe, a ruhsee ɗah, a kinaat aas ne a ɓay in ciŋ ɗe nik ŋ ɗooƴi. Te ɓoyi wa naman raak ŋ yohon ca, a kinaat gurid ;
32 naandsukaat ina rahsee ɓiti Loot.
33 Ɓo' nu waaɗ muciɗ kiñin kiŋ ɗe ɗah, a heya ñake, te ɓo' nu teyɗuk ñak kiñin kiŋ ɗe ɗah, a hey rise naa.
34 Ñam na woyee ɗu wa, ŋ wekeem ɓo' kanak hey ɓaahe fiƴaang, yinni ɓayu, yi tas faɗu.
35 Ɓitiɓ kanak hey nike ɓa oɗe, yinni ɓayu, yi tas faɗu. » [
36 ]
37 Wa Yeesu ƴut ŋ woo kaŋ ɗe, taalubeeciŋ ɗe meekseeɗa ɗe ne : « Kilifaani, ineem waa hee nike ŋ nde ? » A loffa ɓa ne : « Ɓa woo ne : “ Ɗiski fiɗaaf nik, suur ci na cohe nga. ” »