2
Kilooka nikee ŋ Kanaa
1 Wa ineem deg neeh kanak, kilook raakka ŋ kur ka na woyse Kanaa ngaŋ Galile. Yaay ɓi Yeesu nikee nga.
2 Yeesu nameen ɓeeɗku nga, a yi na taalubeeciŋ ɗe.
3 Ɓa nikka ŋ kilooka po biiña reehha, yaay ɓi Yeesu woosa ɗe ne : « Ɓa raakisɗi biiñ. »
4 A loffa ɗe ne : « Ɓit, fu waaɗ ye nga so ? Wahtuuniŋ ngo reeɗi paaɗ. »
5 Yaay ɓa woosa surgaaca ne : « In nu a woo ɗu ɗah, tumaata. »
6 Ndaam raakeen kiro yasna-yino haɓɗohu atoh, ceɗ Yawuut ca meeɗ njirñiɗkoh ne ɓa farsukee ɗah ; waa nu nga ɗah ɗaleen ree liitar teemet wala ini uupa.
7 Yeesu woosa surgaaca ne : « Neyaat kiroocii po ca riif. » Ɓa neyya ca po ca riiffa tem.
8 A woosa ɓa ne : « Hafaat nga, ɗu kom ƴaari adgoh kañam ki. » Ɓa tummba ɗaa.
9 Wa ƴaara ƴooha, raak wa ɓoƴsuuɗ biiñ. Surgaaca neyee masma inheen ɗiska wa puloh, waaye a inheeɗaa. A ɓeeɗukka ƴaara kilookee,
10 a woosa ɗe ne : « Ɓooɓi jen na adge eɗoh biiñi uup neɓ, wa kaɗta po ɓooɓi dohrohha ɗah, wi tas neɓ han eɗohu. Waaye fu nak, fu ɗaak ɗaak wi uup neɓ po wahtuunii. »
11 Wa nikka firndeeni Yeesu koc teeɓoh, wa raakoh kur kaŋ Kanaa ngaŋ Galile. Ɗaa, a teeɓohha yaki a yak, taalubeeciŋ ɗe kossa ɗe.
12 Wa ineem coot, Yeesu hunnda na yaay ɓa, na taambɗoh ciŋ ɗe ƴaar ci, na taalubeeciŋ ɗe, ɓa kaɗta kur ka na woyse Kapernawum. Ɓa nikka nga ɓi neeh.
Yeesu aañiɗ toonoh ca ŋ Kahnaŋ Kooh
13 Waam raak feetiŋ Paakiŋ Yawuut ci heeɗa ree, Yeesu kaɗta Yerusalem.
14 A raakka ɓi toonoh inoh na mbaal na banuut ngaŋ ɗooƴ Kahan Kooh ; a nammba raak ɓi wecce'oh kopor ɓoofiɗ na taaɓul caŋ ɓa.
15 A tokiɗta leraw, a aannja ɓa jen po ɓa pulla Kahan Kooh na mbaal caŋ ɓa na inoh ca. A pasarsohha kopor caŋ wecce'oh ca, a folla taaɓul caŋ ɓa.
16 A woosa toonoh banuut ca ne : « Nihsaat in cii jen ndii, kinaat tum kahan Baabiŋ ngo ɗisik toonoha ! »
17 Taalubeeciŋ ɗe naandsukka ini Fiis ci Hooliɗ ci woo wii :
« Kooh ! Sawri ŋ sawar ŋ kahan fu,
wa ɗii ap po. »
18 Kilifaacaŋ Yawuut ca woosa ɗe ne : « Fu eɗan ɓoo winde firnde, wi min teeɓoh ne ini fu tum wa waas ? »
19 A loffa ɓa ne : « Pooksohaat Kahniŋ Kooh wii, ŋ kurkiɗisa ŋ neeh kaahay. »
20 Ɓa woosa ɗe ne : « Taɓahuukiŋ Kahniŋ Kooh wii tumiɗ kiis ndaŋkiyaah-nikiis na kiis yasna-yino (46), an fu heya kurkiɗisse ŋ neeh kaahay i ? »
21 Waaye Kahniŋ Kooh Yeesu woye, a faaniŋ ɗe.
22 Weɗ tah wa a hultiɗu, taalubeeciŋ ɗe naandsukka ne a meeɗeena woo. Ɓa kossa Fiis ci, ɓa kossa ina Yeesu woye.
23 Yeesu nikee ŋ Yerusalem ŋ feetaŋ Paaka. Wa ɓooɓa hot firndeeca a haɓɗe, laayiɗ kossa ɗe.
24 Waaye a inheen ɓa jen, tahha po a oolkeeɗi ɓa.
25 Yeesu ŋ haf ce, a inhiɗ ini nik ŋ keeñ ɓo', tahha po a etohɗi ne ɓo' teeɓ ɗe in ngaŋ ɓo'.