12
Mari yiifiɗ laackoloñ ŋ kot ciŋ Yeesu
1 Neeh yasna-yino bala feetiŋ Paakiŋ Yawuut ci reyan ɗah, Yeesu hayya Betani kur ka Lasaar yi a hultiɗee genohe.
2 A haɓɗiɗuusa kañam yakak nga, e Marta noɗohee kañam ka, Lasaar ɓaahee ŋ ɓi ñamee na Yeesu.
3 Mari ɓayya haaƴ liitar laackoloñ ye ɗoɓan, haɓɗohu narda koceet, a yiiffaa ŋ kot ciŋ Yeesu, a mooseeɗa ca na findiŋ ɗe. Kahna jen eeñeeɗa laackoloñ.
4 Yudaa Iskaryot, yino ŋ taalubeeciŋ Yeesu, yi eɗndohan ɗe, woosa ne :
5 « Wa ye tah laackoloñi toonuuɗi ? Wa heen eɗohe kopor laayoh na laayoh, ñakiɗ ci eɗuu wa. »
6 A woyeeɗi ineem sagu ñakiɗ ci, waaye a niki a nikee rokoh tahe. A yi ambohee kopori, te a meeɗ meeɗ ɓay nga.
7 Waaye Yeesu woosa ne : « Faɗa ɓitɓi yel, ini a tum weem, a na kooɗkiɗe mbehi ŋ ɓekohsan ŋ ruy-ruy.
8 Ñakiɗ ci risan na ɗu ; waaye mi, ŋ risanɗi na ɗu. »
Kilifaacaŋ seeƴkiɗoh ca tufkiɗ ne ɓa ap Lasaar
9 Wa ɓo' laayiɗ ŋ Yawuut ca kerah ne Yeesu yaa ŋ Betani, ɓa kaɗta nga. Ɓa kaɗee ne ɓa marak Yeesu dong haa, waaye ɓa namee waaɗ hotndoh Lasaar yi a hultiɗe.
10 Kilifaacaŋ seeƴkiɗoh ca tufukka ne ɓa hey name ap Lasaar,
11 laam saguuce, Yawuut laayiɗ faɗeen ɓa, kossa Yeesu.
Aasaŋ Yeesu Yerusalem
12 Wa Kooh wiis, mboolnda yakka hayee ŋ feetaŋ Paaka kerahha ne Yeesu yii hay Yerusalem.
13 Ɓooɓa ɓayya raang tandarma, ɓa kaɗta coha na ɗe, ɓa leehkeeɗa ŋ ɗafka ne :
« Hosaana !
Ɓoyi na haye ŋ tiikiŋ Heɗi,
a raakaat barke !
Buuriŋ Israayel barke'aat ! »
14 Yeesu ɓayya cumbur mbaam a rappa ɗe, findi Fiis ci woyoha an :
15 « Kur kiŋ Siyong,
fu na neƴƴohe ye ?
Buuriŋ ɗa yii hay,
rapiɗ ŋ cumbur mbaam. »
16 Taalubeeciŋ ɗe inheeɗi paaɗ ini in ceem tokis, waaye wi yaki Yeesu yak teeɓohu, ɓa naandsukka ne Fiis ci woyeen in ceem nga ɗe, te ca raakohha ɗaa nga ɗe findi ca woyohse.
17 Mboolnda maasoh wa Yeesu ɓeeɗuk Lasaar ŋ ɗooƴ ruy-ruya, hultiɗta ɗe, ɓa seede'eeɗa ini ɓa hot.
18 Weɗ tah mboolo keeh-keeh weɗ kaɗ ɗe taambka, sagu firndeena ɓa kerhee ne weɗ a tum.
19 Farisen ca woyeeɗa ŋ harmban ɓa ne : « Ɗu hot nga, ɓoo minɗi ali in nga ; markaat, ɓooɓi jen ɓa ɗii ñaakiɗ ɗe ! »
Yeesu woyiɗ ŋ kakaan kiŋ ɗe
20 Raakiɗ ɓi Gerek ɓi ɓaahee ŋ ɓooɓa hayee Yerusalem ne ɓa ñaamuk Kooh ŋ feetaŋ Yawuut ca.
21 Ɓa kaɗta ŋ Filip yi genee Betsayda ŋ Galile, ɓa woosa ɗe ne : « Kilifaani, ɓoo waaɗ hot Yeesu. »
22 Filip kaɗta woosa Andare wa, Andare hunnda na ɗe, ɓa kaɗta ɓa woosa Yeesu wa.
23 Yeesu loffa ɓa ne : « Jamanooni yaki Kuɓkiŋ ɓoyi yak joy teeɓohu reyiɗ kotii.
24 Ñam na woyee ɗu wa te ambaat ne wa keeh, feeh tisohiŋ tohri keenɗi ŋ kehƴi po wa mand na ini kaan ɗah, wa risan yino. Waaye wa eɗoh kipes kiŋ wa ɗah, wa hey rime laayiɗ.
25 Ɓo' nu waaɗ kipes kiŋ ɗe ɗah, a heya ñake. Waaye, ɓo' nu waaɗootɗi kipes kiŋ ɗe ŋ adinaanii ɗah, a heya ɗaake wuu kipes ki heyɗi reehe.
26 Ɓo' nu waaɗ to pangkiɗ ɗah, a ñaakɗaat to te ɗisik nu ŋ nik ɗah, surgaaniŋ ngo naman nik nga. Ɓooɓi na pangkiɗee so jen, e Baabiŋ ngo na hee ɓa yakɗe.
27 Ɗiski wa nik, ŋ jahaskohiɗ ! Moo ŋ woyan na ? Andi maa hee woye ne “ Baab, muciɗ to ŋ ini na hee raake ŋ neeh cii ? ” Waaye ini joy raak ŋ neeh cii weɗ tah ho hay !
28 Kon Baab yakɗa tiikiŋ ɗa ! » Teemb ndeem, hooso pulohha Eel ci an : « Ŋ yakɗiɗ tiikiŋ ngo te ŋ heya yakɗisse. »
29 Mboolnda nikee ŋ ndaam kerahha hoosoora, ɓum woyeeɗa ne wa inding, ɓinooɓi woyeeɗa ne a malaaka woo na ɗe.
30 Weɗ Yeesu woyoh ɓa ne : « A saguuso tah hoosooreem kerhuk haa, waaye e ɗu tah.
31 Adinaanii hey atte'se kotii ; yi dega yaah aañu ŋ hara.
32 Ini kaɗ nga so nak, ŋ meeɓu, ŋ tiimb kehƴi ɗah, ŋ hey nooke ɓooɓi jen nga so. »
33 Ŋ woo keem, Yeesu teeɓohee findi a na hee kaanohe.
34 Mboolnda loffa ɗe ne : « Ɓoo kerhiɗ ne waasiŋ ɓoo woo ne Mucɗohi Gapohse na hee hey pese po faw. Fu min na woyoh ne Kuɓkiŋ ɓoyi joyiɗ meeɓu, tiimb kehƴi ? Kon a ya ɓa Kuɓkiŋ ɓoyi ? »
35 Yeesu loffa ɓa ne : « Siñaari wa ɗii risohaahha na ɗu paaɗ ; kon tiindaat nga feeh ɗu ɓii raak siñaari ɗah, ŋ ineem ñuusi teluu ɗu ; laam ɓoyi na tiinde ŋ ñuus inahɗi ɗiski a na yurhe.
36 Mbaa feeh ɗu ɓii raak siñaari ɗah, kosaat siñaari, ne ɗu min nik kuɓu siñaar. » Wa a ƴut woo ineem, Yeesu kaɗta, a ɗasɗukka ɓa.
Yaa kos yegɗohiŋ ɓoo ?
37 Firndeeca laayiɗ ca Yeesu teeɓohee ŋ fiki ɓooɓa, tahɗi po ɓa kossa ɗe.
38 Ineem raakeen ne ina woosuuɗi Esayi woyee raak, an :
« Heɗi, yaa kos yegɗohiŋ ɓoo ?
Heɗi, fu teeɓ ya ɓa hatiliŋ ɗa ? »
39 Inii weɗ tah po ɓa mineeɗi kos, findi Esayi woyoha ne :
40 « Kooh fuulɗiɗ has ciŋ ɓa,
a ndengiɗta keeñ ciŋ ɓa,
ne ɓa hotuu na has ciŋ ɓa,
ɓa raakuu yeg-yeg ŋ keeñ ciŋ ɓa,
ɓa ɓoƴsohuu pesohaaɗ.
Ŋ ineem, ɓa sangiɗ ne
mi yi Kooh, ŋ wiriɗ ɓa. »
41 Ineem weɗ Esayi woo sagu ne a hotiɗ yaki Yeesu yak te a woyiɗ ini kaɗ nga ɗe.
42 Moona ŋ kilifaacaŋ ɓa yakak ca sah, laayiɗ koseen ɗe ; waaye Farisen ca taheen po ɓa kaañeeɗaa woo, ɓa neƴƴohee aañu ŋ sinaagog ca.
43 Laam yakɗa ɓooɓa yakɗee ɓa weɗ ngisohiɗ ɓa wi Kooh yakɗan ɓa.
A woo ciŋ Yeesu atte'an kosaaɗiici
44 Yeesu woosa ŋ ɗafka ne : « Yaa nu kos so ɗah, a kos so dong haa, waaye a namiɗ kos Yi woos so.
45 Te yaa nu hot to ɗah, a hotiɗ Yi woos so.
46 Mi, ŋ hayiɗ Adina ne ŋ nik siñaariŋ wa, ne yaa nu kos so ɗah, a risuu ŋ ñuus.
47 Ɓo' kerah woo kiŋ ngo te a taambiɗɗaa ɗah, a ñam atte'an ɗe haa ; laam ŋ hayɗi ne ŋ atte Adina waaye ŋ hay ne ŋ muciɗa.
48 Yaa nu heef fo, a teyɗukɗi woo ciŋ ngo ɗah, a raakiɗ atte'oh : Woo ciŋ ngo, ceɗ na hee ɗe atte'e ŋ mbeha mirndoh.
49 Laam mi, ŋ wooɗi ŋ njungiŋ ngo haf fo ; Baabi woos so, a yi ŋ haf ce, a yi nak ko ini ŋ joy woo na wi ŋ joy yegɗoh.
50 Te ŋ inhiɗ ne nakohiŋ ɗe na onohe kipes ki heyɗi reehe. Te ini mi na woye, mi na woyee wa findi Baabi woyoh ho wa. »