Fiisi Saaŋ kanakɗoh kaɓɗoh
Rangsohaani
Saaŋ ɓaahee ŋ Apootar ciŋ Yeesu. Saaŋ na Saak na Piyeer ɓeɗ Apootar ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Saaŋ ŋ Limiŋ tiik ci.
Ŋ finho kakaan ki na hulti na rapɗuukiŋ Yeesu, a taambkohiɗ Maryaama, yaayiŋ Yeesu. Ŋ mirndaani a yi adgohee ɓi Jangu, ŋ ɗiska woysee Asi ŋ jamanoonaam (ɓak ngaŋ ɗiski Turki nik woti-woti). Ŋ jamanoonaam, weɗ a fiisoh "Yegɗohiŋ Muci Saaŋ fiis", na "Fiisi Saaŋ kanakɗoh kaɓɗoh" wii, na fiis kanak wiiriis ci a kaɓɗoh, na teerndiŋ "Teeɓ ki", wi na woye ŋ in ci na haye ŋ fikiiri.
Saaŋ fiisiɗ teerndii "ɓitɓi Kooh kooɗ na kuɓuuciŋ ɗe", waaye ɓo' laayiɗ amb ne ɓitɓi na woyse ndii na kuɓuuciŋ ɗe, wa Jangu, na ɓooɓi ɓaah ŋ Janguuneem. Wa mand haa ne Saaŋ liiɓ ne jangɗohoh ci baahaaɗiici a woyee ŋ kaɓɗohiŋ ɗe koc, ɓa hey haye ŋ Janguunii. Ŋ ineem, a waaɗ woytoh ɓi Janguuni ne ɓa taalndiɗ ɓa pesee ŋ keeh, na kerhiɗ Kooh, na waaɗoh. A waaɗɗi ne ɓa teyɗuk jangɗohoh ci baahaaɗiiceem findi ɓa meeɗ tumoh na jangɗohoh ci Apootar ci tuuƴe.
Fiisi Saaŋ kanakɗoh kaɓɗoh kaɗtiɗoh an :
- Kañɗoh 1:1-3
- Pes ŋ keeh na waaɗoh na kerhiɗ 1:4-6
- Wortuk ɓi na ñaañohe 1:7-11
- Askohi 1:12-13
1
Kañɗohi
1 Mi, yakkiŋ Janguuni, mi yii fiis ɗa, fu yi Ɓitɓi Kooh tan na kuɓuuciŋ ɗa. Ŋ keeñkohiɗ ɗu keeh-keeh. A mi dong waaɗ ɗu haa, waaye na ɓi inah jen keeh ki kaɗ ŋ Kooh.
2 Ɓoo waaɗiɗ ɗu sagu keeh ki ɓoo jen ɓaah te wa nikan nik ngaŋ keeñ ciŋ ɓoo po faw.
3 Kooh Baabi hey ɓoo baahohe, ɓoo misik ɗe, a on ɓoo jam. Yeesu Kiristaa kuɓkiŋ Baabi hey ɓoo baahohe, ɓoo misik ɗe, a on ɓoo jam. Ŋ ineem ɓoo pesee ŋ keeh na waaɗoh.
Nakohi rahsohu ŋ Baabi
4 Ŋ sumiɗ lool ŋ hotiɗ ɓum ngaŋ kuɓuuciŋ ɗa ɓii pes ŋ keeh ki findi nakohi ɓoo jen rahas ŋ Baabi.
5 Te ɗiski wa nik, mi yii kiim ɗa fu yi Ɓitɓi ne ɓoo jen waaɗtiɗohaat. Ini ŋ fiis ɗa wii, wa nakoh as haa, waaye wa nakohi ɓoo rahas ŋ cambohaana.
6 Te waaɗoh weɗ ne ɓoo pesee ŋ nakoh ciŋ Kooh. Wii weɗ nakohi, findi ɗu kerhoha ŋ cambohaana poyi : Ɓoo pesaat ŋ waaɗtiɗoh.
Wortukaat ɓi na ñaañohe
7 Ɓo' laayiɗ pasarkohiɗ ŋ adinaani te ɓa na ñaañohe ñaañoh ɓo', ɓa teyɗukɗi ne Yeesu Kiristaa hayiɗ ŋ Adina na faan, findi ɓo'. Ɓoyi na taase ineem, a ñaañohoh ɓo', a sangiɗiŋ Kiristaani.
8 Tufkaat ŋ haf ɗu, ne ɗu ñakuu ini pangkiŋ ɓoo rim, waaye ɗu rahas aaf mitiɗ.
9 Ɓo' nu kaɗ ini uup us ndeem te a topɗi ŋ jangɗohi ŋ ini kaɗ ŋ Kiristaani ɗah, a raakɗi Kooh ; ɓo' nu top ŋ jangɗoheem ɗah, a raakiɗ Baabi na Kuɓki.
10 Kim ɓo' hey ɗu marke a kom ɗu jangɗoh wiiriis wi ɗaloh na jangɗoheem ɗah, kinaat ɗe daliɗ ŋ kahan ciŋ ɗu, kinaat sah tahas kañɗohiŋ ɗe.
11 Laam ɓo' nu tahas ɗe ŋ kañɗohiŋ ɗe ɗah, a hun hun na ɗe ŋ tumohaaɗ ciŋ ɗe baahaaɗiici.
Askohi
12 Raakiɗ in laayiɗ ci ŋ joy ɗu woo waaye ŋ waaɗɗi ca fiis ŋ kayit findi an ; ŋ oolkiɗ ne ŋ hey ɗu hee marke, ŋ woo na ɗu ɓo' na ɓo' ne ɓoo uup sum.
13 Kuɓuuciŋ taambɗoh fu ɓitiɓ yi Kooh nam tan, ɓii kañiɗ ɗa.