3
1 Markaat findi Baabi waaɗoh ɓoo po ɓoo ɓeeɗkohsee kuɓu Kooh te weɗ ɓoo nik ! Adina inahɗi Kooh, weɗ tah wa inahɗi ɓoo.
2 Ɓaah ciŋ ngo ŋ keeñkoh, ɗiski wa nik ndii ɓoo kuɓu Kooh, te ini ɓoo nikan kim teeɓohuuɗi paaɗ. Waaye, ɓoo inhiɗ ne mbaɗna wa teeɓohsan, ɓoo mandan na ɗe, laam ɓoo hey ɗe hote findi a mand keeh-keeh.
3 Ɓo' nu raak yaakaareem ŋ Yeesu Kiristaa ɗah, a na hoolɗe hooliɗ haf ce findi yeem hooloh.
4 Ɓo' nu nik tumoh bakaaɗ ɗah, a na tume ini hunɗi na waasiŋ Kooh, laam bakaaɗ, weɗ sang teyɗuk waasi.
5 Moona, ɗu inhiɗa : Ini tah Yeesu hay weɗ ne a nihis bakaaɗ ci. Te a yi, a raakɗi bakaaɗ.
6 Ɓo' nu gen nga ɗe ɗah, na bakaaɗeeɗi ; ɓo' nu na bakaaɗe ɗah, hotohɗi ɗe, inahɗi ɗe.
7 Kuɓuuciŋ ngo, ali ɓo' kinaat ɗu muuƴiɗ. Ɓo' nu na tume in yurhiɗ ɗah, a yurhiɗ findi Kiristaani yurhoh.
8 Ɓo' nu gen ŋ bakaaɗ ɗah, a ɓaah ŋ Seytaani, laam Seytaani bakaaɗ ŋ camba poyi. Ini tah Kuɓkiŋ Kooh hay weɗ ne a yahroh in ci Seytaani haɓiɗ.
9 Ɓo' nu rimuk ŋ Kooh ɗah, a na tumeeɗi bakaaɗ, laam ini Kooh sok nga ɗe findi tisoh, genan nga ɗe ; a minɗi bakaaɗ laam a kuɓu Kooh kotii.
10 Ini ɗalohiɗ kuɓuuciŋ Kooh na kuɓuuciŋ Seytaani weɗi wii : Ɓo' nu na tumeeɗi yurhiɗ wala a waaɗɗi ɓaah ce ɗah, a wuu Kooh haa.
Waaɗtiɗoh
11 Inii weɗ yegɗohi ɗu kerah ŋ camba poyi an : Ɓoo waaɗtiɗohaat ;
12 ɓoo kinaat tum findi Kayin, yi ɓaahee ŋ Seytaani, a boommba taambɗoh ce. A boomoh ɗe ye ? E tumohaaɗ caŋ ɗe haf ce ceɗ sepƴe, caŋ taambɗoh ce nikka yurhiɗ, weɗ tah a boommba ɗe.
13 Kon ɓaah ciŋ ngo, ɓi Adina sang ɗu ɗah, kinaat feyu.
14 Ɓoo inhiɗ ne ɓoo puloh ŋ kakaan, ɓoo hayiɗ ŋ kipes, te waaɗi ɓoo waaɗ ɓaah ciŋ ɓoo, weɗ teeɓoha. Ɓo' nu waaɗɗi ɓooɓi ɗah, a ris ŋ kakaan.
15 Yaa nu sang ɓaah ce ɗah, a apoh ɓo'. Te ɗu inhiɗ ne ali apoh ɓo' raakɗi kipes ki heyɗi reehe ŋ ɗooƴ ce.
16 Inii weɗ inhiɗ ɓoo waaɗoh : Yeesu eɗohiɗ kipes kiŋ ɗe wuu ɓoo. Mbaa ɓoo joyiɗ nam eɗoh kipes ciŋ ɓoo wuu ɓaah ciŋ ɓoo.
17 Waaye ɓo' raak, a hot ne ɓaah ce raakiɗ etoh, a rang keeñiŋ ɗe nga ɗe ɗah, waaɗohi puloh ŋ Kooh genoh na nga ɗe ?
18 Kuɓuuciŋ ngo, waaɗohiŋ ɓoo kinaat top ŋ nguɓ ci dong, waaye wa hunaat na tumohaaɗ na keeh.
19 Ŋ ineem, ɓoo hey inhe ne ɓoo ɓaah ŋ keeh ki, te ɓoo hey raake jam ŋ keeñ ciŋ ɓoo ŋ fiki Kooh.
20 Ali ɓoo atte haf ɓoo sah, ɓoo inhiɗ ne Kooh a yi uup yak liiɓ ciŋ ɓoo te a inhiɗ in ci jen.
21 Ɓaah ciŋ ngo ŋ keeñkoh, liiɓ ciŋ ɓoo ambɗi ɓoo findi yurhaaɗi ɗah, ɓoo raakiɗ ooluk ŋ fiki Kooh.
22 Te in nu ɓoo kiim ɗe ɗah, ɓoo rahasa nga ɗe, laam ɓoo ɓii taambiɗ nakoh ciŋ ɗe te ɓoo na tume ini neɓ ɗe.
23 Inii weɗ nakohiŋ ɗe : Weɗ ne ɓoo kos ŋ Kuɓkiŋ ɗe Yeesu Kiristaa, te ɓoo waaɗoh ŋ harmban ɓoo findi a nakoh ɓoo wa.
24 Ɓo' nu taambiɗ nakoh ciŋ Kooh ɗah, a gen ngaŋ Kooh, te Kooh gen nga ɗe ; ŋ inii, ɓoo inhiɗ ne a gen nga ɓoo : sagu Fuuɗsi Hoolohngaani a eɗ ɓoo.