5
1 Seeƴkiɗoh yakak nu tanu ŋ ɓooɓi ɗah, a tufkiɗu ne a nikiɗ ɓa ŋ fiki Kooh ; a wikee onoh ci, a seeƴkee sagu bakaaɗ ci.
2 A yi ŋ haf ce a mitɗi, weɗ tah a miniɗ nik na inhaaɗiici na muuƴiɗ ci, a muñɗee ɓa.
3 A mitaaɗiikiŋ ɗe tah po a joyya seeƴuk sagu bakaaɗ ciŋ ɗe haf ce, findi a na seeƴkohe sagu ciŋ ɓooɓi.
4 Ali ɓo' minɗi eɗ haf ce cir seeƴkiɗoh yakak. A Kooh na ɓeeɗke ɓo' nga, findi a ɓeeɗkoh Aaruna nga.
5 Mucɗohi Gapohse sah eɗkootɗi cir Seeƴkiɗoh yakak. A rahsoha ŋ Kooh yi woo ne :
« Woti, ñam Baab ɗu,
a fu Kuɓkiŋ ngo. »
6 A woyissa ŋ ɗisik wiiriis ŋ Fiis ci ne :
« Fu tufkiɗuuɗ Seeƴkiɗoh po faw,
Seeƴkiɗoh findi Melkisedek. »
7 Mucɗohi Gapohse, ngaŋ kipes kiŋ ɗe ŋ kehƴi, a kiimiɗ Kooh yi minee ɗe muciɗ ŋ kakaan. A kiimiɗ keeh-keeh ŋ ɗafka-ɗafka na muhun. Kiimiŋ ɗe teyɗukuusa sagu nupi a nup Kooh.
8 Ini a nikee Kuɓu jen, a jangiɗ kerhiɗ Kooh ŋ miskiɗ ci a raak.
9 Wa Kooh reyiɗ ɗe ɗiski a joyee ree ngaŋ mit, a nikka yi na eɗe ɓooɓi kerhiɗ ɗe jen muci reehanɗi.
10 Ee, a Kooh tufkiɗ ɗe Seeƴkiɗoh yakak findi Melkisedek.
Kañam ndengiɗ
11 Ini kaɗ ŋ ineem, ɓoo waaɗiɗ woo in laayiɗ nga, waaye kerhohaaɗiŋ ɗu yiih yiih kotii, tahha po wa yooɓɗi ne ɗu teeɓu ini ca tokis.
12 Ina ɗu kosoh poyi, wii joyee ɗu raak jangɗohe, waaye ɗu ris etohiɗ jangɗu in ci na kockohse ŋ in ci Kooh woo. Ɗu etohisiɗ ɓap, ɗu hatilɗi kañam ndengiɗ.
13 Te yaa nu na ɓape ɗah, a gooy ; a meeɗɗi woo ci yurhiɗ ci paaɗ, a minɗi ca inhisoh.
14 Waaye kañam ndengiɗ, wa wuu yakak ci fu inah ne ɓa meeɗɗiɗ haf ɓa inhisoh baahiɗ na baahaaɗi po ƴutiɗ.