2
Ini adgan hayiŋ Heɗi
1 Ini kaɗ ŋ hayiŋ Heɗ ɓoo Yeesu Kiristaa, na nangɗukohiŋ ɓoo ŋ serooce, ɓoo na kiimee ɗu inii, ɓaah ci :
2 Ɓo' hay nga ɗu, woyee ɗu ne mbehiŋ Heɗi hayiɗ po cootiɗ ɗah, kinaat gaaw jaahiɗ, kinaat mbet fit ciŋ ɗu. Ali ɓa woo ne wa puloh ŋ Fuuɗsiŋ Kooh, wala nga ɓoo, wala ŋ fiis ci ɓoo kaɓɗoh sah,
3 ɓa kinaat ɗu muuƴiɗ ŋ in nu wa min nikoh ɗah.
Mbeheem hayanɗi muk feeh laayiɗ faɗɗi kos Kooh ɗah ; na feeh Ɓoyi Baahaaɗiini, hotukɗi ɗah. Ɓoyeem mirndohan ɗumbu.
4 A hey sange Kooh na in ci na woyse kooh jen na in nu na ñaamkasse ɗah, a hey dege haf ce ŋ ɗafuk in ceem jen, a hey kee po a yi ŋ haf ce, a ɓoof ŋ kahnaŋ Kooh, a woo ne a yi Kooh.
5 Naandsukaat ŋ woyeen ɗu ineem wa ŋ nik na ɗu !
6 Ɗu inhiɗ ini amb ɗe ɗiski wa nik po a minanɗi teeɓohuk feeh jamanooniŋ ɗe reeɗi ɗah.
7 Ɗiski wa nik, kibaahaaɗi wa ɗii panguk ŋ kumpa. Sekaat po yi amb Ɓoyi Baahaaɗiini coot rek !
8 Teemb ndeem, Ɓoyi Baahaaɗiini hey hotke, ŋ mirndaani Yeesu Heɗi hey ɗe fuuɗse, a kaan. Siñaarɗiŋ hayiŋ ɗe dong weɗ na hee ɗumbe ɓoyeem.
9 Ɓoyi Baahaaɗiineem hayee ɗah, wa hunan na hatiliŋ Seytaani, wa hunan na keemaan nu nik, na firnde na in feyohiɗ ne a ñaañoh ɓooɓi.
10 A hey haɓɗe in moɗaaɗi nu nik ne a ñaañoh ɓi nik ŋ kot muuƴ sagu teyɗukaaɗi waaɗ keeh ki joyee ɓa muciɗ.
11 Weɗ tah, Kooh woosoh ɓa ini muuƴɗan ɓa, ne ɓa kos lee,
12 ŋ ineem, ɓi kosɗi keeh ki jen te ɓa neɓuusa ŋ ini lahɗi waas, ɓa hey atte'se.
Ndeng ngaŋ kosi
13 Waaye, ɓaah ci, ɗu ɓii Heɗi keeñkoh, ɓoo joyiɗ gen corkiɗ Kooh ŋ ini kaɗ nga ɗu. Ɓoo joyiɗ ɗe corkiɗ ŋ kooɗi a kooɗ ɗu findi nguɗiŋ tohri koc ne ɗu mucɗu taamboh ŋ hoolɗi Fuuɗsi Hoolohngaani hooliɗ ɗu wuu Kooh na kosi ɗu kos keeh ki.
14 A waaɗee ne ɗu rahas ineem, weɗ tah a ɓeeɗukka ɗu taamboh ŋ Yegɗohiŋ Muci ɓoo woyee ɗu, ne ɗu min ɓaah ŋ yaki Heɗ ɓoo Yeesu Kiristaa yak.
15 Kon, ɓaah ci, ndengaat, te ɗu amb baahiɗ in ci ɗu jangɗu, te ɗu rahassa ca, wa nik ci ɓoo woo wala ci ɓoo fiis, kaɓɗohha ca.
16 Heɗ ɓoo Yeesu Kiristaa ŋ haf ce na Kooh Baabiŋ ɓoo, yi waaɗ ɓoo po a baahohha ɓoo ñaahi a na ñaahe ɓoo ne ɓoo ndengɗuk te wa gen gen, na oolki baahiɗi ɓoo raak ŋ in ci na haye,
17 a ñaahaat ɗu, a ndengiɗ ɗu ŋ tumohaaɗ baahiɗ nu nik na woo baahiɗ nu nik !