5
Sek mbehiŋ Heɗi
1 Ɓaah ci, ini kaɗ ŋ jamanooni wala mbehi, wa etohɗi ɗu fiisu ŋ ini kaɗ nga ca.
2 Ɗu ŋ haf ɗu, ɗu inhiɗ baahiɗ ne mbehiŋ Heɗi hayan findi rokoh na wek.
3 Ɓooɓi hey woye ne : « Ɓoo ɓii ŋ jam te ɗiski ɓoo nik, wa wooriɗ ! » Jaar naamo hay nga ɓa, tel ɓa findi miskiɗ ciŋ ɓitɓi na ɓasle, te ɓa fusanɗi nga muk.
4 Waaye ɗu, ɓaah ci, ɗu nikɗi ŋ ñuus, po mbeheem kee ɗu tela findi rokoh.
5 Ɗu jen, ɗu ɓo' siñaar, ɗu ɓo' noh. Ɓoo ɓaahɗi ŋ wek, ɓoo ɓaahɗi ŋ ñuus.
6 Ɓoo kinaat neeh findi ɓinooɓi, ɓoo yunkaat, ɓoo hun na sagoociŋ ɓoo.
7 Ɓi na neehe, na neehe na wek, te ɓi na laare na laare na wek.
8 Waaye ɓoo ɓi ɓaah ŋ nohi, ɓoo hunaat na sagoociŋ ɓoo ; ɓoo ɓekuk waaɗoh na kos findi kulɓa hiñohoha, te kong ci ɓoo ɓekuk nik oolki ɓoo ooluk ne ɓoo hey mucɗasse.
9 Ini Kooh waaɗiɗ ɓoo, wa ayrukiŋ ɗe haa, waaye a waaɗ ne ɓoo rahas muci taamboh ŋ Heɗ ɓoo Yeesu Kiristaa.
10 Yeesu, a yi kaan wuu ɓoo, ne a hay ɗah, ɓoo ɓaah na ɗe kipes ki, wa raak ɓoo pesee, wa raak ɓoo kaaniɗ, wa ɗaa.
11 Ineem weɗ tah, ñaahtiɗohaat, yaa nu nga amboh morom ce ne a kaɗ fiki, findi ɗu na tumohee wa an.
Nakoh ci mirndoh na askohi
12 Ɓoo ɓii kiim ɗu ɓaah ci, ne ɗu eɗ cir ɓi na ndengɗuke ŋ ɗooƴ ɗu, ɓi adgoh ɗu ŋ Heɗi te ɓa woytohee ɗu.
13 Eɗaat ɓa cir keeh-keeh, ɗu waaɗ ɓa sagu ini ɓa na haɓɗe, pesaat ŋ jam ŋ harmban ɗu.
14 Ɓoo ɓii ñaah ɗu ɓaah ci : Woytohaat ɓi waaɗɗi yaaɓ, ɓaatɗohaat ɓi hot ne ɓa minɗi raak ini ɓa etoh, ɗu amboh ɓi raakɗi hatil, ɗu muñɗee ɓooɓi jen.
15 Wortukaat po ali ɓo' nga ɗu kinaat wirndoh miskiɗ in miskiɗ ; genaat ndengɗuk ŋ tum in baahiɗ ŋ harmban ɗu na ini kaɗ ŋ ɓooɓi jen.
16 Genaat ŋ sum.
17 Genaat ŋ kiim Kooh.
18 Corkiɗaat Kooh ŋ in nu nik, in ceem ceɗ a waaɗ nga ɗu ŋ niki ɗu nik ŋ Kiristaani Yeesu.
19 Kinaat hondoh Fuuɗsi Hoolohngaani panguk.
20 Kinaat heef in ci Kooh na woye taamboh ŋ ɓo',
21 waaye markisaat in ci jen, ɗu amb ci baah nga.
22 Wortukaat in moɗaaɗi na findi wa min mand ɗah.
23 Kooh yi na onohe jam hoolɗaat ɗu wuu ce jameet ; a niiɗaat kiɓo' kiŋ ɗu jen, liiɓohaaci na ruuh ci na faan ci, ca nik raakaaɗi sikka ŋ hayiŋ Heɗ ɓoo Yeesu Kiristaa.
24 Kooh yi na ɓeeɗkee ɗu cariɗ oolku, a hey tume ineem.
25 Ɓaah ci, kiimɗaat ɓoo Kooh.
26 Kañɗaat ɓaah ci jen na morgiɗkoh huniɗ na keeñ hooliɗ.
27 Mi yii nak ɗu ŋ tiikiŋ Heɗi ne fiisi ɓoo kaɓɗoh ɗu wii, wa jangsaat ŋ fiki ɓaah ci jen !
28 Heɗ ɓoo Yeesu Kiristaa baahohaat ɗu !