Fiisi Pool koc kaɓɗoh ɓi Tessalonik
Rangsohaani
Pool ɓaahee ŋ Israayel ci, ŋ cuuɓiŋ Benyaamin. A nikee Farisen. Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci. Waaye wa raakka mbeh, a cohha na Yeesu, a kossa po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13.
Kaɗaŋ Pool koc ŋ kur kaŋ Tessalonik, wa nikee ŋ ɗooƴ ɓaaɓaŋ ɗe yakka kanakɗoh. A yegɗohha Yegɗohiŋ Muci nga, te wa raakka ɓi kos, waaye a arra aañu ne a pul kur ka. Wa jaahiɗta ɗe lool, findi ɓooɓa han kos na hee moocohe. Weɗ tah, wa a nik ŋ Ateen, a woossa Timoote ne a kaɗ marka findi ɓa nikoh. Ƴutta, a yi Pool, a taalndiɗta Korenta. Timoote hunnda na Silweng a kaɗta marka ɓi Tessalonik, te a wiirukka na yegɗoh neɓiɗ. Ɓa raakka Pool ŋ Korenta. Weɗ Pool fiisoh ɓi Tessalonik kaɓɗohii.
Ŋ fiisi a kaɓɗoh wii, Pool corkiɗiɗ Kooh nga, a teeɓohha sumi a sum ŋ risi ɓi Tessalonik ris pes ŋ Kiristaani, na maɗi a maɗ ɓa hotis. A nammba ɓa ñaah na ɓi woo, a teeɓohha in ci kaɗ ŋ wiirkiŋ Kiristaani. Wa degga ɓi caɓin, a fiisissa ɓa kaɓɗoh, wa nikka 2 Tessalonik.
Fiisi Pool koc kaɓɗoh ɓi Tessalonik kaɗtiɗoh an :
- Pool kañɗiɗ ɓi Tessalonik, a kiimiɗta ɓa Kooh 1:1-10
- Pool naandsukiɗ jamanoona a nikoh ŋ Tessalonik 2:1-16
- Pool mariɗ hot ɓi Tessalonik, a rahsiɗ kerahne neɓiɗ nga ɓa 2:17–3:11
- Kiim Kooh wuu ɓi Tessalonik 3:12-13
- Pes findi Kooh waaɗoh 4:1-12
- Ini kaɗ ŋ wiirkiŋ Kiristaani 4:13–5:11
- Nakoh ci mirndoh na askohi 5:12-28
1
Kañɗohi
1 Mi yii kañiɗ ɗu, ɗu ɓi Janguuniŋ Tessalonik. Mi, Pool, na Silweng na Timoote, ɓoo ɓii kañiɗ ɗu, ɗu ɓi nik ŋ Kooh Baabi na Yeesu Kiristaa Heɗi. Baahohsaat, ɗu onu jam !
Kipes ki na kosiŋ ɓi Tessalonik
2 Ɓoo na gene corkiɗ Kooh ŋ ini kaɗ nga ɗu jen ne ɓoo ɓaahndohha ɗu ŋ kiim ciŋ ɓoo ɗah.
3 Ŋ ineem, ɓoo na gene naandsuk ŋ fiki Kooh Baabi tumohaaɗ ciŋ ɗu sagu kosi ɗu kos Heɗ ɓoo Yeesu Kiristaa, na pangkiŋ ɗu miskiɗi sagu waaɗi ɗu waaɗ ɗe na mini ɗu min muñ sagu oolki ɗu ooluk in ci a gapoh.
4 Ɓaah ciŋ ɓoo, Kooh waaɗiɗ ɗu te ɓoo inhiɗ ne, a taniɗ ɗu, a tummba ɗu wuu ce.
5 Ɓoo inhiɗa, laam, wa ɓoo kom ɗu Yegɗohiŋ Muci, wa nikeeɗi woo dong, waaye wa namee hun na ɓaatɗohi na hatiliŋ Fuuɗsi Hoolohngaani, te ineem wooreen ɓoo keeh-keeh. Te ɗu inhiɗ findi ɓoo mandee ŋ harmban ɗu, wa nikee ini baah nga ɗu.
6 Ini kaɗ nga ɗu, ɗu taambɗiɗ kot ciŋ ɓoo na ciŋ Heɗi, ŋ teyɗuki ɗu teyɗuk woo kiŋ Kooh ŋ ɗooƴ miskiɗ laayiɗ ; Fuuɗsi Hoolohngaani sumɗukohha ɗu.
7 Ini ɗu tum weem, kosiɗ ciŋ Maseduwaan na Akaay jen miniɗ marak nga ɗu, ɓa taambiɗ ɗu.
8 Laam woo kiŋ Heɗi puloh nga ɗu kaɗta kur caŋ Maseduwaan na caŋ Akaay jen, waaye wa topɗi ndeem, kosiŋ ɗu Kooh reyiɗ ɗisik nu ɗisik. Wa kaɗiɗ po wa etohɗi sah ɓoo woyee ŋ ini kaɗ nga,
9 laam ɓooɓi jen ɓa ɗii laamtoh findi ɗu taambɗukoh ɓoo wi ɓoo hay nga ɗu, na findi ɗu faɗoh kooh ci nikaaɗiici, ɗu hayya ŋ Kooh, ne ɗu ñaamuk ɗe. A yi Koohi na pese, yi keeh-keehi.
10 Ɓa ɗi nam woo findi ɗu na sekohe Kuɓkiŋ ɗe pulohan Eel ci, yi a hultiɗ, Yeesu yi na mucɗe ɓoo ŋ ayruki na haye.