6
Inwaasoona ambee Kooh ŋ ɓooɓa a fere
1 Wa ɓo' ci camb ñimin ŋ adinaani, te ɓa raakka ɓi komaaki cafaƴ,
2 safaal ca hotta ne cafaƴ caŋ ɓo' ca moɗiɗ, ɓa ɓayya ɓitiɓ ngaŋ ɓi neɓ ɓa nga ɓa.
3 Ŋ ineem, Nikiɗi woosa ne : « Ŋ heyɗi faɗisse ɓo' a maañ na iiki ŋ tum nga ɗe, laam a huf dong. Hutiiniŋ kipes kiŋ ɗe hey nike kiis teemet na kiis ndaŋkiyaah-kanak (120). »
4 Ŋ jamanoocaam, wa raakeen ɓi puŋkal ŋ kehƴi, te ɓa raakisseen. Ɓeem ɓeɗ nikee jalmbaaca ɗeɓgaan te tiik ciŋ ɓa kerhuuɗ. Ɓa rimkohee ngaŋ safaal ca na cafaƴ ca.
5 Nikiɗi hotta ne ɓooɓa nikee ŋ kehƴi uupee nga uup añaand, te keeñ caŋ ɓa genee ɓa yurhiɗ ngaŋ in moɗaaɗi.
6 A raakka aay-keeñ nga, inwaaso ammba ɗe ŋ feri a fer ɓo' ŋ kehƴi.
7 A woosa ŋ haf ce ne : « Ŋ hey ɗumbe ɓooɓi ŋ fer, ŋ hooliɗ ɓa ŋ kehƴi, ŋ faɗanɗi sah ɗoopaat ci, yakak na ƴin, po sel ci ; laam inwaaso ambiɗ to ŋ feri ŋ fer ca. »
8 Waaye Nikiɗi baahoheen Noohin.
Gaalaŋ Noohin
9 Inii weɗ naandsuku ŋ Noohin. Noohin a nikee ɓo' yurhiɗ ngaŋ ɓooɓaŋ jamanoonaŋ ɗe, te a hunee na Kooh.
10 Noohin raakeen kuɓu ƴaar kaahay, Sem, Haam, na Yaafet.
11 Ɓooɓa genee ŋ kehƴi nikee yahrukohiɗ, te wa muuƴeeɗi Kooh, te ɗisik nu ɗisik raakeen tumohaaɗ moɗaaɗi.
12 Kooh marakka, a hotta ne kehƴi yahrukohiɗ laam, e pesiɗ ci hotkang jen nikee tumoh in moɗaaɗi.
13 Ineem tahha po Kooh woosa Noohin ne : « Ŋ ambiɗ ne ŋ hey ɗumbe ɓooɓi jen sagu riifɗi ɓa riifiɗ Adina na tumohaaɗ moɗaaɗi. Ŋ hey ɓa ɗumbe na kehƴi.
14 Waaka kidig ndengiɗ, fu haɓɗiɗ haf fu in mand na wahnde yakak, wa min teembeer findi gaal. Wa raakaat ɓi tuuƴ, fu reefa godirong ŋ ɗooƴi na finhoori.
15 Fu na hee wa haɓɗohe an : Hutiiniŋ wa nikaat saangal teemet na saangal ndaŋkiyaah-yatuus (150), angiini nik saangal ndaŋkiyaah-kanak na saangal yatuus (25) te njooliini nik saangal ndaŋkiyaah na saangal yatuus (15).
16 Fu heya waakɗe kunoha, harmban wa na gaali nikaat suung yino. Fu heya haɓɗiɗe yahndeer ŋ hambuusiŋ wa, gaali raak nikoha kaahay, ŋ yoorɗi, ŋ leerni na ɗafki.
17 Ini kaɗ nga so, ŋ hey bembe kehƴi na masuɓ ne ŋ ap in nu na iike nga ɗah ; in nu nik ngaŋ kehƴi ɗah, a hey kaane.
18 Waaye ŋ hey ambtiɗohe na ɗa. Fu hey aase ŋ ɗooƴ gaali na ɓitiifu na kuɓuuciŋ ɗa kaahay ci na ɓitiɓ ciŋ ɓa.
19 Fu hey name ɓek ŋ gaali heet ɗoopaat nu nik ngaŋ kehƴi ɗah, naar yino na riɓ yino ne ca min muc na ɗa.
20 Heet ciŋ ɗoopaat ci hey haye kanak kanak, sel ci na ɗoopaat ciŋ kehƴi, yakak na ƴin jen hey haye, ne ca min muc.
21 Fu nak, ɓayndoha kañam nu nik, fu ɓek nga, fu raak pesoha, fu na ca. »
22 Noohin haɓɗohha in ceem jen ɗaa, findi Kooh nakohee ɗe wa.