50
Ruyaŋ Yaŋhooɓa
1 Weɗi Yuusufa morgiɗkoh baab ɓa, a fuɗeeɗa fuɗ miskiɗ.
2 A woosa paƴoh caŋ ɗe ne ɓa haɓɗaat ɗe ; ɓa haɓiɗta fiɗaafaŋ Israayel na diw eeñiɗ.
3 Ŋ findi ɓa meeɗ tumoh, ɓa raakka neeh ndaŋkiyaah-nikiis (40) na haɓɗaŋ wa. Ɓi Misra rooyya ɗe ini ree neeh ndaŋkiyaah-yasna-kanak (70).
4 Wa neeh caŋ rooy ca coot, Yuusufa woosa dag caŋ Firawnaana ne : « Nik ne ɗu kerhiɗiɗ to ɗah, kaɗaat ŋ Firawnaani ɗu woyiɗ to ɗe ne :
5 Wi baab ɓoo hee kaane, a giñɗukoheen ndo ne a kuruk nga ɗah, ŋ uumbaat ɗe ŋ kur kaŋ Kanaan, ŋ ruy-ruya a haɓɗiɗ haf ce. Weɗi tah ŋ waaɗ ne, a on ndo ŋ kaɗ tuma ineem, ŋ hay. »
6 Wa Firawnaana kerah woo keem, a woosa Yuusufa ne : « Fu miniɗ kaɗ uumba baab ɗu findi fu giñɗohee ɗe wa. »
7 Yuusufa hunnda na dag caŋ Firawnaana jen, na yakak caŋ Misra,
8 na ɓi kahan ce, na taambɗoh ciŋ ɗe, na ɓi kahan baab ɓa ; ali ɓo' taseeɗi ŋ Gosen ɗal komaakca ƴin ca na ɗoopaat ca ɗah, a kaɗta uumba baab ɓa ;
9 ɓi wotiir na ɓi panis rapuuɗ darra ɓa, wa nikka mboolo yakoh na yakoh, ɓa kaɗeeɗa.
10 Ɓeɗ kaɗoh kaɗoh po, ɓa reesa Goren-Ataat, ŋ ɓak Yurdan, ɓa rooyya Yaŋhooɓa ndaam, rooy keeh-keeh. Yuusufa ruyiɗta baab ɓa neeh yasna-kanak.
11 Wa ɓi Kanaan hot mboolndaŋ ruya, ŋ Goren-Ataat, ɓa woosa ne : « Ruyiŋ ɓi Misra wii deey, wa yakiɗ lool ! » Weɗ tah ndaam ŋ sero Yurdan, ferɗuusa Abel-Misrayim (ruyiŋ ɓi Misra).
12 Ŋ ineem, kuɓuuciŋ Yaŋhooɓa tumiɗta baab ɓa ina a nakee ɓa :
13 Ɓa ɓayya fiɗaafaŋ ɗe kur kaŋ Kanaan, ndaam, ɓa uummba ɗe ŋ huraŋ atoh fa ŋ yohna nik ŋ Makpela, ŋ sero Mamre. Yohneem weɗi Ibrahiima romee ŋ Efron yi ɓaahee ŋ cuuɓiŋ Hit ci ; a tummbaa ruy-ruyiŋ ɗe.
Yuusufa ɗaasiɗ taambɗoh ciŋ ɗe.
14 Wa Yuusufa ɗaak baab ɓa po ƴutta, a dokukka Misra, a yi na taambɗoh ciŋ ɗe, na ɓooɓa ɓendee ɗe jen.
15 Taambɗoh ciŋ ɗe hotta ne baab ɓa kurkiɗ nga, ɓa woosa ne : « Wa miniɗ nik ne Yuusufa ɗaakɗiɗ ɓoo aay-keeñ, ne a wirind ɓoo in ci moɗaaɗiici ɓoo tum ɗe jen. »
16 Ɓa woosohha nga ɗe ne bala baab ɓa kaanan ɗah, a woyeen ne :
17 « Woyɗaat to Yuusufa ne a ɗaasɗaat to taambɗoh ciŋ ɗe, ŋ in ci moɗaaɗiici ɓa tum ɗe jen, laam ɓa tooñiɗ ɗe keeh-keeh. Mbaa mi yii kiim ɗe ne a ɗaas ɓa, laam ɓa ñaam ciŋ Koohiŋ baab ɓa. » Wa woo keem ree ŋ Yuusufa, a fuɗeeɗa.
18 Ŋ ineem taambɗoh ciŋ ɗe hayootta nga ɗe, ɓa raɗukka ŋ fikiice, ɓa woosa ɗe ne : « Ɓoo ñaam ciŋ ɗa. »
19 Waaye Yuusufa woosa ɓa ne : « Kanaat neƴƴoh, ɗu liiɓ ne e mi Kooh e ?
20 Wa keeh ne ɗu waaɗee so tum in moɗaaɗi, waaye Kooh ɓoƴsiɗa baahiɗ. Laam, a waaɗee muciɗ kiñin laayiɗ ŋ findi ɗu hotoha an.
21 Mbaa kanaat neƴƴoh, ŋ hey ɗu taambkohe, ɗu na komaakciŋ ɗu. » Yuusufa giifɗoh taambɗoh ciŋ ɗe ɗaa, a ñaahha ɓa ne ɓa ndengɗuk.
Mirndaaniŋ kipes kiŋ Yuusufa
22 Yuusufa na ɓi kahan baab ɓa genee Misra. Ini a pes jen wa kiis teemet na kiis ndaŋkiyaah (110).
23 A maasohiɗ kuɓuuci na set ciŋ Efrayim ; kuɓuuciŋ setiŋ ɗe Makir yi kuɓkiŋ Manasse, a yi koɗ ɓa.
24 Bala a kaanan ɗah, Yuusufa woyeen taambɗoh ciŋ ɗe ne : « Ŋ mand na kurkiɗ nga, waaye wa hooliɗ to ne Kooh hey ɗu ambohe ; te a hey ɗu dokne ŋ kur ka a gapee Ibrahiima, Isaahha na Yaŋhooɓa.
25 Waaye Kooh tum, ɗu kaɗee ɗah, giñɗaat to ne, ɗu hey ɓayndohe ƴoh ciŋ ngo. »
26 Yuusufa kaanoh Misra wa a raak kiis teemet na kiis ndaŋkiyaah (110). Ɓa haɓiɗta fiɗaafaŋ ɗe na diw eeñiɗ, ɓa ɓekkaa ŋ jaat.