45
Yuusufa teeɓkiɗ taambɗoh ciŋ ɗe
1 Wa Yuusufa kerah woo ceem, a minisɗi amb haf ce ŋ fiki ɓooɓa nikee ŋ ɗiska. A woosa ñaam caŋ ɗe ne ɓa pulaat, a tassa nga na taambɗoh ciŋ ɗe dong, a hannda ɓa woo ne a yi Yuusufa.
2 A fuɗeeɗa ŋ ɗafka, ɓi Misra kerheeɗa ɗe po ɓi kahan Firawnaana sah inahha ini raak.
3 Yuusufa woosa taambɗoh ciŋ ɗe ne : « Ñam Yuusufa, ndah baab ɓoo ris pes ? » Waaye ali ɓo' minɗi ɗe lof nga ɓa sagu tiit.
4 Yuusufa woosa ɓa ne : « Reɓaat nga so. » Ɓa reɓpa. A woosa ɓa ne : « Ñam Yuusufa taambɗoh ɗu, ya ɗu toonee ne a haytohu Misra.
5 Tooni ɗu toon ndo kanaat ɗu misik laam, a Kooh tuuƴ co, ŋ adugka ɗu ndii ne ɗu min muc.
6 Kiis kanak ceɗɗi kur ki weɗi ŋ aɗ, te kiis yatuus ŋ fikiiri guur raakanɗi nga, nguɗ raakanɗi.
7 Kooh a yi tuuƴ co ndii, ŋ adugka ɗu ne ɗu min raak muc yakiɗ ne cuuɓiŋ ɗu sooƴuu.
8 E ɗu ɓay yo ndii haa, a Kooh. A yi tum mbo kilifaani uup reɓ Firawnaani, ŋ adgohha kahan ce na Misra jen.
9 Ɗiski wa nik ndii, araat kaɗ ŋ baab ɓoo ɗu woo ɗe ne, kuɓkiŋ ɗe Yuusufa woo ne, Kooh tumiɗ ɗe kilifaaniŋ Misra jen, a hayaat findi wa uup gaawoh,
10 a hey gene ŋ kur ki na woyse Gosen, a yi na kuɓuuciŋ ɗe, na set ciŋ ɗe, na ɗoopaat ciŋ ɗe, na ini a raak jen ; a nik ŋ serooso.
11 Ŋ hey ɗe eɗe in ci a etoh jen ne a pes, a yi na ɓooɓiŋ ɗe, na gat ciŋ ɗe ; ɗu ñakanɗi ali in. Kiis ci yatuus ci na haye, ca na hee name nik kiis aɗ. »
12 A woyissa ne : « E ɗu hotoot, na ɗa Benyaamin, ñam na wee na ɗu, mi yi Yuusufa ;
13 naandsukaat baab kiyak ki ŋ raak ŋ Misra na ini ɗu hot jen, te ɗu hay na ɗe ndii findi wa uup gaawoh. »
14 A morgiɗukka taambɗoh ce Benyaamin, yeem morgiɗukka ɗe, ɓa fuɗeeɗa.
15 A nammba morgiɗkoh na taambɗoh ciŋ ɗe ɓinooɓi, ɓa ambsohhaa na fuɗ, ɓa hannda min woo na ɗe.
16 Wa Firawnaana kerah ŋ kahan ce ne taambɗoh ciŋ Yuusufa hayiɗ Misra, a neɓuusa nga, a yi na dag caŋ ɗe.
17 A woosa Yuusufa ne : « Woya taambɗoh ciŋ ɗa, ɓa sif mbaam ciŋ ɓa, ɓa dokuk Kanaan
18 ne ɓa hay na baab ɓa na ɓooɓaŋ ɓa nik ndaam. Ŋ hey ɓa eɗe merhey mi uup baah ŋ kur ki, ɓa gen nga te ɓa pesohan kañam baahiɗ nga.
19 Nama woo taambɗoh ciŋ ɗa, ɓa ɓay sareet yakak ndii, haytohoha ɓitiɓ ciŋ ɓa na kuɓuuciŋ ɓa na baab ɗu.
20 Te in ca ɓaa hee faɗe ndaam kanaat ɓa misik laam, ɓaa hee gene na in ci uup baah ŋ Misra. »
21 Kuɓuuciŋ Israayel tumohha ɗaa. Yuusufa eɗta ɓa sareet ca yakak ca findi Firawnaana nakoh ɗe wa, na ñamaah ŋ waas.
22 A onnda yaa nu nga ɗah kulɓa, waaye a eɗta Benyaamin ƴel haalis teemet-kaahay (300) na kulɓa yatuus.
23 A nammba woosoh baab ɓa hayoha, mbaam naar ndaŋkiyaah, sifuuɗ yaa nu nga ɗah, ŋ in ca uup baah ŋ Misra, na mbaam riɓ ndaŋkiyaah, sifuuɗ bele, mbuuru na pesoha wiiriis.
24 A woosa taambɗoh ciŋ ɗe ne ɓa kanaat ñaɗoh ŋ waas, ƴutta a faɗta ɓa, ɓa kaɗeeɗa.
25 Ɓeɗ pul Misra kotii, ɓa aassa Kanaan. Wa ɓa ree ŋ baab ɓa Yaŋhooɓa,
26 ɓa woosa ɗe ne : « Baab, Yuusufa ris pes ! A yi sah adgoh kur kaŋ Misra jen. » Waaye ineem yoondiɗɗi Yaŋhooɓa, laam a koseeɗi ɓa.
27 Ɓa naandsukka ɗe in ca Yuusufa woo ɓa jen, a nammba hot sareet ca Yuusufa eɗoh ne ca ɓay ɗe, a hannda raak jam.
28 A woosa ne : « Woo ki reehiɗ. Kuɓkiŋ ngo Yuusufa ris pes. Ŋ hey ɗe kee hota bala ŋ kaanan ɗah. »