38
Yudaa na Tamaar
1 Ŋ jamanoonaam, Yudaa faɗta taambɗoh ciŋ ɗe, a kaɗta nika na Hiraa, ya gen kur ka na woyse Adulaam.
2 A hotta cafaƴ nga, kuɓu Suwa ya genee Kanaan, a ɓayya ɗe ɓitiɓ, a hunnda na ɗe.
3 Yeem ammba rook, a raakka kuɓu ƴaar, Yudaa teekka ɗe Eer.
4 Ɓitɓa ambissa rook, a raakissa kuɓu ƴaar, a teekka ɗe Onaan.
5 A raakissa kuɓu ƴaar, a teekka ɗe Seela. Wa Seela na raakse, raak Yudaa ŋ Kesiib.
6 Wa saawiŋ ɗe Eer kaɗ po reesa ɗaak ɓitiɓ, Yudaa kilookiɗta ɗe cafƴa na woyse Tamaar ;
7 Nikiɗi hotta ne Eer yi saawiŋ Yudaa yurahɗi, a appa ɗe.
8 Yudaa woosa Onaan taambɗoh Eer ne : « Fu inhiɗ ini fu joy haɓiɗ, lama ɓitɓii, fu waakiɗ yakak fu kuɓu. »
9 Onaan inheen ne kuɓki a na hee raake na ɓiti taambɗoh ce, a nikanɗi yiŋ ɗe ; weɗ tah a hunnda na ɗe poo, a heesa keenɗe ɗah, a keeniɗ ŋ bilaf fi ne a sang raakiɗ taambɗoh ce kuɓu.
10 Nikiɗi neɓaaɗi'uusa ŋ ini Onaan na tume weem, a nammba ɗe ap.
11 Yudaa woosa payum ce Tamaar ne : « Haada kahan baab ɗu, fu muurka ƴaar fu nga. Fu ɓoof nga po Seela kuɓkiŋ ngo yak. » A neƴƴohee ne Seela nam kaan findi yakak ciŋ ɗe. Tamaar haadda kahan baab ɓa.
12 Wa tummba in maañiɗ, ɓiti Yudaa kaannda, kuɓkiŋ Suwa.
Wa ruya coot Yudaa hunnda na nawleece Hiraa, ƴaaraŋ Adulaam ca, a kaɗta marka ɓooɓa nguɗɗee ɗe find caŋ mbaal caŋ ɗe ŋ Timnaa.
13 Tamaar woyuusa ne : « Payum fu yaa kaɗ hufɗuka find caŋ mbaal caŋ ɗe ŋ Timnaa. »
14 A inheen ne Seela yakiɗ, te a tokɗuuɗi ɗe, tahha po a ɓekukka kulɓa wiiriis kotii, a muurukka findi toonkoh, a kaɗta, a ɓooffa ŋ waas Timnaa ne fu aasee Enayim ɗah.
15 Wa Yudaa hot ɗe, a liiɓpa ne a toonkoh laam a muurkee muuruk.
16 A reɓpa nga ɗe, a woosa ɗe ne a waaɗ hun na ɗe. Raak ɗe inhisɗi payum ce. Tamaar loffa ɗe ne : « Fu na hee so ye eɗe ŋ ineem ? »
17 A woosa ɗe ne : « Ŋ hey ɓaye koteng ŋ gataŋ ngo, ŋ woosoh ɗe nga ɗa. » A loffa ɗe ne : « Ee. Waaye fu na hee wa tayle'ohe ye ? »
18 Yudaa loffa ɗe ne : « Fu waaɗ ne ŋ tayle'oha ye ? » Tamaar woosa ɗe ne « Eɗ to jaarndi inhisohaaniŋ ɗa fu tokuk ŋ mbooh na ndooɗiŋ yaah fu. » Yudaa eɗta ɗe ca, a hunnda na ɗe, yeem taambohha nga, ammba rook.
19 A haadda, a nihissa muura, a ɓekkissa kulɓaaca a muurkohe.
20 Ŋ ini kaɗ ŋ Yudaa, a woos nawleece ƴaaraŋ Adulaam ca ne a kaɗ ɗe wikɗa koteng ka, a haytoh in ca tayle'ohse. Yeem reesa, a hotɗi ɓitɓa.
21 A meekissa ɓooɓa genee Enayim ne : « A nde toonkohi na nike ŋ waasi ? » Ɓa loffa ɗe ne : « Toonkoh moosɗi raakoh ndii. »
22 A dokukka ŋ Yudaa, a woosa ɗe ne : « Ŋ kaɗiɗ po nga, ŋ hotɗi ɗe te ɓi kur ka woo ne, toonkoh moosɗi raakoh ŋ ndaam. »
23 Yudaa loffa ne : « A tasaat na in caam, ɓoo kanaat ƴenɗuk haf ɓoo, ŋ woosiɗ ɗa, fu kaɗiɗ na koteng ki po ndaam, fu hotɗi ɗe. »
24 Wa deg caɓin kaahay, Yudaa woyuusa ne : « Payum fu Tamaar deey, a toonkee toonuk po, a waliɗ amb rook nga. » Yudaa woosa ne : « A pulɗassaat, a dohu kaanaaɗi. »
25 Wa Tamaar ɓayse, a woosohha ŋ payum ce Yudaa ne a markaat baahiɗ jaarndi inhisohaani hun na niyiŋ wa, na ndooɗi, andi a hey inhise ɓoyi raak ca ? Laam heɗ ca a yi rookiɗ ɗe.
26 Yudaa inhissa ca, a woosa ne : « A yi uup po nik ŋ keeh laam, ñam joyee ɗe on kuɓkiŋ ngo Seela, waaye ŋ tumɗaa. » Ŋ ineem a faankisɗi na ɗe.
27 Wa noha Tamaar joyee ɓasloh ree, wa nikka ne a hee siise.
28 A ɓasleeɗa, yino ŋ siis ca puliɗta yaah, dooñoha ammbaa, a tokkaa ooy ruumind ; a woosa ne : « Yii, a yi adug raaku. »
29 Waaye kuɓka dokinnda yaahaŋ ɗe, taambɗoh ce kocca ɗe pul. Dooñoha woosa ɗe ne : « Waaw, fu mbolit nde ? » Ɓa teekka ɗe Peeres (mbolit).
30 Ƴutta, taambɗoh ce hannda raaku na ooya ruumnda ŋ yaahaŋ ɗe, ɓa teekka ɗe Seerah.