3
Bakaaɗi koc na findi Kooh tumoh naa
1 Waam, e iiñ uupee ñaañ ŋ ɗoopaat ciŋ nduufi Nikiɗi Kooh fere ; iiña woosa ɓitɓa ne : « Andi wa keeh ne, e Kooh woo ne, ɗu joyɗi ñam ali rim kidig, ŋ kidig ci ŋ ɗooƴ nguuki ? »
2 Ɓitɓa loffa ɗe ne : « Ɓoo miniɗ ñam rim ciŋ kidig ci ŋ nguuki.
3 Waaye ini kaɗ ŋ rim ciŋ kidgi ŋ leerniŋ nguuki, Kooh woo ne ɓoo kanaat ca ñam, ɓoo kanaat ca sah reɓ wala ɓoo hey kaane fut. »
4 Iiña loffa ɗe ne : « Muk, ɗu heyɗi kaane.
5 Kooh inah inah ne, ɗu ñama ɗah, liiɓohaaciŋ ɗu hey rangsuke, ɗu hey inhisohe baahiɗ na baahaaɗi findiice. »
6 Ɓitɓa marakka rim caŋ kidga, a hotta ne ca moɗiɗ ŋ has, ca mandiɗ na ini neɓ, te ca maɗaah ñamu ne ca rangis liiɓoha. A ɓeennda nga, a ñammba, a nammba eɗ ƴaar ce raak ɗe nga, yeem ñammba.
7 Ŋ ɗiska ɗiska liiɓohaacaŋ ɓa rangsukka, weɗ ɓa inhiskoh kotii ne ɓa tas ɓarang ; ɓa ɓayya ɓi saaf mbaɗet, ɓa tokɗohha ca, ɓa kenukka ca.
8 Wa noha soos po puuɗsa ef-efɗeeɗa, ɓoya na ɓitiice kerahha Nikiɗi Kooh wileeɗa ŋ nguuka, ɓa ɗembeeɗa ɗe ŋ kidig ca.
9 Nikiɗi Kooh ɓeeɗukka ɓo', a woosa ɗe ne : « Fu ŋ nde ? »
10 A loffa ɗe ne : « Ŋ kerah ɗa kerah ŋ ɗooƴ nguuki, ŋ tiitta, weɗi ŋ ɗasɗukoh ɗa laam ŋ tas ɓarang. »
11 Nikiɗi Kooh woosa ɗe ne : « Moo, ya ɓa woo ɗa ne fu tas ɓarang ? Fu ñam ŋ kidgi ŋ sangohee ɗa e ? »
12 Ɓoya woosa ɗe ne : « E ɓitɓi fu ambsoh ho na ɗe, a yi eɗ to ŋ rim ciŋ kidgi, ŋ ñammba. »
13 Nikiɗi Kooh woosa ɓitɓa ne : « Wee ɓek ɗa ŋ ineem ? » Ɓitɓa woosa ɗe ne : « E iiñi ñaañoh ho po ŋ ñammbaa. »
14 Nikiɗi Kooh woosa iiña ne :
« Ŋ ini fu tum weem,
ŋ alkiɗ ɗa
ngaŋ ɗoopaat ciŋ kahan ci
na ciŋ bilaf fi jen,
fu na hee hey faske
te fu genan melemsuk
ŋ muniŋ merhey mi
ngaŋ kipes kiŋ ɗa jen.
15 Ŋ hey ɓeke sangtiɗoh
ŋ harmban fu na ɓitɓi
na harmban ɓi na hee rimkohe nga ɗa
na ɓiŋ ɗe.
Ɓi rimkohan nga ɗe
hey pooke hafiŋ ɗa
te fu ɗoɓan ɓa ŋ patang kot. »
16 A nammba woo ɓitɓa ne :
« Ŋ hey tume po,
fu nik rook ɗah, fu laay miskiɗ,
te fu ɓaslan ngaŋ miskiɗ.
Fu hey ɗiiɗke ŋ ƴaar fu,
waaye a yi yilfan ɗa. »
17 A hannda woo ƴaara ne :
« Fu kerhiɗ woo kiŋ ɓitiifu
po fu ñamiɗ ŋ kidgi
ŋ sangohee ɗa,
fu tahiɗ po merhey mi alkuuɗ,
ŋ kipes kiŋ ɗa jen fu hey yaaɓe
ne fu han raak pesoha ŋ kehƴi.
18 Wa hey paare ñapir
na paangi raakiɗ rup
te fu na hee hey guure kotii
ne fu ñam.
19 Fu pesohan opiŋ ɗa
po mbaɗna fu dokkan
ŋ kehƴi fu puloh.
Laam fu haɓɗohu merhey
te fu dokkan ŋ merhey mi. »
20 Ŋ ineem ƴaara teekka ɓitiice Aawa (pesohi). Laam a yi yaayiŋ ɓooɓi na pese jen.
21 Nikiɗi Kooh haɓɗiɗta Aadama na ɓitiice kulɓa und, a ɓekiɗta ɓa ca.
22 A woosa ne : « Ŋ ɗiski wa nik ndii, ɓo' inhisohiɗ baahiɗ na baahaaɗi findi ɓoo ; a joyɗi ɓeen kotii ŋ rim ciŋ kidgi na onohe kipes, a joyɗi ca ñam po kipes kiŋ ɗe kee nika po faw. »
23 Nikiɗi Kooh puliɗta ɗe ŋ nguuka ŋ Eden ne a guur merhey mi a mahohu.
24 Wa a aañ ɓo', a ɗaakka ŋ pulohaaɗ-nohaŋ nguuka, niiɗoh ci na woyse seruben na ndang yongkaah wi na mbiliirke ɓak nu ɓak ne ɓa sangoh waasa kaɗ ŋ kidga na onohe kipes.