24
Kilookaŋ Isaahha
1 Ibrahiima yaɓko'een lool, te Nikiɗi barke'ɗeen ɗe ŋ in nu nik ɗah.
2 Wa raakka mbeh, Ibrahiima woosa ñaama yakka ŋ ñaam caŋ ɗe, ya meeɗ taambkoh raak-raakaŋ ɗe jen ne : « Ooɓa yaahiŋ ɗa ŋ rambiŋ ngo,
3 fu giñiɗ to ŋ Nikiɗi, Kooh yi Heɗ ɗafki na kehƴi, ne fu heyɗi waakɗe kuɓkiŋ ngo ɓitiɓ ŋ cafaƴ ciŋ Kanaan, kur ki ŋ genoh wii,
4 waaye fu na hee kaɗe po ŋ kur ɓoo, ŋ ɓooɓaŋ ngo, fu waakiɗ kuɓkiŋ ngo Isaahha ɓitiɓ nga. »
5 Ñaama loffa ɗe ne : « Wa miniɗ nik ne ɓitɓeem teyɗukanɗi hay na so ŋ kur kii, andi maa hee hey ɓayndohe kuɓkiŋ ɗa po ŋ kur ka fu puloh ? »
6 Ibrahiima woosa ɗe ne : « Muk, kana moos ɓay kuɓkiŋ ngo ŋ ndaam.
7 Laam Nikiɗi, Kooh yiŋ ɗafki, yi pulɗoh ho kahan baab na kur ɓoo, woyiɗ na so, a giñiɗta so ne a hey one ɓi rimkohan nga so kur kii jen ; a yi na hee woose malaakaaniŋ ɗe, yeem yooɓɗiɗ ɗa waasiŋ ɗa po, fu ɓayohiɗ kuɓkiŋ ngo ɓitiɓ ŋ ndaam.
8 Nik ne ɓitɓeem teyɗukanɗi hay na ɗa ɗah, giñi fu na hee giñe wii, wa hey ɗa ruhse, waaye findi wa min mand ɗah, kana ɓay kuɓkiŋ ngo ndaam. »
9 Ñaama ooɓpa yaahaŋ ɗe ŋ rambaŋ Ibrahiima kilifaanaŋ ɗe, a giñiɗta ɗe ineem.
10 Wa a ƴut, ñaama ɓayya ngeelemb ndaŋkiyaah ŋ caŋ kilifaanaŋ ɗe na ina uup baah ŋ raak-raakaŋ kilifaanaŋ ɗe, a yurahha kur ka Nahor genohe, ŋ ɓak Mesopotami.
11 A na huntoh caŋ ɗe, ɓa kaɗoh kaɗoh po ɓa reesa ŋ woong ne fu aasee ŋ kur ka ɗah, a ƴekiɗta ngeelemb ca ; wa nikee ŋ noh niiniɗ, wahtuuni ɓitiɓ ca na pulohe ne ɓa kaɗ neya.
12 A woosa ne : « Mi yii kiim ɗa Nikiɗi, Koohiŋ kilifaaniŋ ngo Ibrahiima, teyɗukiɗ to waasiŋ ngo wii, fu baahoha kilifaaniŋ ngo Ibrahiima.
13 Ñam yii tufukka ŋ woongiŋ masmi, te cafaƴ ciŋ kur ki hey haye neye.
14 Ŋ waaɗ ne cafƴi mi na hee kiime masuɓ, a naar meemeeniŋ ɗe a on ndo ŋ an, a nam woo ne, a hey yo anɗiɗe ngeelemb ci ; yeem a yi nikaat yi fu ambiɗ ñaamiŋ ɗa Isaahha. Ineem hey yo inhiɗe ne fu teeɓohiɗ baah kiŋ ɗa ŋ kilifaaniŋ ngo. »
15 A reehiɗɗi kiim ndoom, cafaƴ pulla na meeme ŋ yuugaŋ ɗe ; a nikka Rebeka, kuɓu Betuwel ; Betuwel yi baab ɓi kuɓki, a Milka yaayiŋ ɗe, Nahor yi taambɗoh Ibrahiima, nikka baabiŋ ɗe.
16 A nikee komaaki cafaƴ moɗiɗ, inhaaɗi ƴaar. A aassa ŋ woonga, a neyya meemeena po a pulla.
17 Weɗ ñaamaŋ Ibrahiima aroh kaɗ coha na ɗe, a woosa ɗe ne : « Kaambsuka, fu on ndo ŋ an ƴissuut ne wa neɓ ɗa ɗah. »
18 Rebeka loffa ɗe ne : « Ee, ana kilifaani. » A arra kaambsuk, a naariɗta ɗe meemeena, a aneeɗa.
19 Wa Rebeka ƴut, a woosa ɗe ne : « Faɗa ŋ nam aniɗ ngeelemb ci po ca hiƴ. »
20 A artukka, a yiiffa ina tasee ŋ hongla na anɗohse ; a dokkissa ŋ woonga. A yi neyoh neyoh po a aniɗta ngeelemb ca jen.
21 Ƴaara ɗekka teɗ, markeeɗa ɗe ne a inah, andi Nikiɗi teyɗukɗiɗ ɗe waasiŋ ɗe wala.
22 Wa a aniɗ ngeelemb ca po a ƴutta, ƴaara ɓayya tokkaah ŋ kiñin tiɓuuɗ na garam yasna-yino ngaŋ urus, na kiñi kanak urus ɓekaah ŋ yaah, waa nu nga ɗah, tiɓohu ini uup garam teemet (100).
23 A meekissa ɗe ne : « Woo so, fu kuɓu ɓa ? Ɓoo raakiɗ ɗiski ɓoo min neeh ngaŋ kahan baab ɗu e ? »
24 Rebeka loffa ɗe ne : « Ŋ kuɓu Betuwel, ŋ setiŋ Milka na Nahor.
25 Ee, kahan baab ɓoo raakiɗ mbaang ne ngeelemb ci raak ɗiski ca na hee neehe na ñamaah laayiɗ, te wa raakiɗ ɗiski ɗu joy min neeh. »
26 Ƴaara ƴekka po pukaŋ ɗe reesa kehƴi ne a ñaamuk Nikiɗi.
27 A woosa ne : « Corka Nikiɗi, Koohiŋ kilifaaniŋ ngo Ibrahiima ; fu teeɓohiɗ baah kiŋ ɗa nga ɗe te fu moosɗi ɗe faɗoh ! Ini kaɗ nga so, fu yurhiɗiɗ to po ŋ ɓaah ciŋ kilifaaniŋ ngo. »
28 Wa kuɓka cafƴa puloh ndaam, a arra kaɗ, a naandsukka ɓi kahan yaay ɓa ina raak jen.
29 Rebeka raakeen taambɗoh ƴaar na woyse Laban, Laban kaɗta raaka ƴaara ŋ sero woonga.
30 Weem, raak ɗe hoteen tokkaahaŋ kiñin ka na kiñiica taambɗoh ce ɓekɗasse, a nameen kerah wi Rebeka na naandsuke ina ƴaara woyee na ɗe. A raakka ƴaara na ngeelemb caŋ ɗe ŋ sero woonga.
31 A woosa ɗe ne : « Fu yi Nikiɗi barke'iɗ, fu ɓoof ye ŋ bilaf fii ? Haya ɓoo kaɗ kahna, ŋ haɓɗiɗiɗ ɗu daloha na ɗiski ngeelemb ci nikan. »
32 Wa ƴaara ree kahna, ɓa nihissa unung caŋ ngeelemb ca, ca ɓekuusa ŋ ɗisik baahiɗ, ca onuusa mbaang na ñamaah. Ƴaara na ɓa hunee na ɗe, onuusa masuɓ, ɓa naawissa kot.
33 Ɓa nammba deƴƴu kañam, waaye, ƴaara woosa ne : « Bala ŋ ñaman ɗah, ŋ woo kot ci ŋ tiind. » Laban woosa ɗe ne : « Ee, woya. »
34 A woosa ne : « Mi deey, ŋ ñaamiŋ Ibrahiima.
35 Nikiɗi barke'ɗiɗ kilifaaniŋ ngo lool, a tumiɗ ɗe ɓo' raakiɗ. A oniɗ ɗe ɓi pe', mbaal, na inoh, urus na haalis na ɓi ñaam ƴaar na ɓitiɓ na ngeelemb na mbaam.
36 Ɓitiice Saarata, a kaɗeen po a ɓitiffa, a hannda raak na ɗe kuɓu. Kuɓkeem, a yi Ibrahiima kilifaaniŋ ngo eɗ raak-raak kiŋ ɗe jen.
37 Kilifaaniŋ ngo giñɗukohha so ne : “ Fu heyɗi waakɗe kuɓkiŋ ngo ƴaari ɓitiɓ ŋ cafaƴ ciŋ Kanaan, kur ki ŋ genoh wii ;
38 waaye, fu na hee kaɗe po ŋ ɓooɓaŋ ngo ŋ kahan baab, fu ɓayiɗ ɗe ɓitiɓ nga. ”
39 Ŋ woosa kilifaaniŋ ngo ne : “ Nik ne ɓitɓeem teyɗukanɗi hay na so ɗah ? ”
40 A loffa so ne : “ Nikiɗi, yi ŋ moos taamboh ŋ ini a waaɗ, hey woose malaakaaniŋ ɗe, a yooɓɗiɗ ɗa waasiŋ ɗa. Fu hey ɓayɗe kuɓkiŋ ngo ɓitiɓ ŋ cuuɓiŋ ngo, ŋ kahan baab ɓoo.
41 Ali ɓa teyɗukɗi, giñi fu na hee giñe, wa hey ɗa ruhse nik ne fu kaɗiɗ po ŋ ndaam ɗah. ”
42 Woti, wi ŋ hay po ŋ reesa ŋ woongi, ŋ kiimmba an : “ Nikiɗi, Koohiŋ kilifaaniŋ ngo Ibrahiima, nik ne fu hey yooɓɗe waasiŋ ngo ɗah,
43 ñam yii ŋ sero woongi. Ŋ waaɗ ne cafƴi na hee neye, ŋ kiim ɗe masuɓ ƴissuut ŋ meemeeniŋ ɗe,
44 a on ndo ŋ an, a nam woo ne, a hey yo anɗiɗe ngeelemb ci ; yeem a yi nikaat yi fu ambiɗ kuɓkiŋ kilifaaniŋ ngo. ”
45 Ŋ ƴutɗi woo ŋ haf fo ndoom, Rebeka pulla na meemeeni ŋ yuugiŋ ɗe. A ruhussa ŋ woongi, a neyya masuɓ. Ŋ woosa ɗe ne : “ On ndo ŋ an. ”
46 A arra kaambsuk, a naariɗta so meemeeni. A woosa so ne : “ Ana, fu ƴut ɗah, ŋ aniɗ ngeelemb ci. ” Ŋ annda, a aniɗta ngeelemb ci.
47 Weɗ ŋ meeksoh ɗe ne : “ Fu kuɓu ɓa ? ” A woosa so ne : “ Ŋ kuɓu Betuwel, yiŋ Milka na Nahor. ” Ŋ ɓekiɗta ɗe tokkaahi ŋ kiñin kiŋ ɗe na kiñiici ŋ yaah ciŋ ɗe.
48 Ƴutta, ŋ ƴekka ŋ kehƴi ne ŋ ñaamuk Nikiɗi Koohiŋ kilifaaniŋ ngo Ibrahiima, a yi amboh ho po ŋ miniɗ ɓayiɗ kuɓkiŋ ɗe Isaahha ɓitiɓ, setiŋ taambɗoh ce Nahor.
49 Mbaa ɗiski wa nik ndii, e ɗu na hee so woye andi ɗu ris amb kilifaaniŋ ngo ne ɗu teeɓoh baah kiŋ ɗu nga ɗe ; wa nikɗi ɗah, ŋ inah findi ŋ tuman. »
50 Laban na Betuwel loffa ɗe ne : « Inii deey, wa puloh ŋ Nikiɗi ; ɓoo raakɗi woyaah nga.
51 Rebeka a yeem ŋ fikiifu, ɓayaa ɗe, a nik ɓiti kuɓkiŋ kilifaaniŋ ɗa findi Nikiɗi waaɗoh. »
52 Wa ñaamiŋ Ibrahiima kerah woo ceem, a ƴekiɗta Nikiɗi po pukiŋ ɗe reesa kehƴi.
53 Ƴutta, a puliɗta ɓi in tiɓuuɗ ŋ haalis na urus, na ɓi ndima, a eɗta Rebeka. A nammba ɓay alal keeh-keeh, a onnda yaaya na Laban, taambɗoh kuɓka cafƴa.
54 Ɓa hannda ñam kotii, ɓa annda, a yi na huntoh caŋ ɗe ; ɓa neehha nga po na ɓaaɓa.
Wa ɓa kuruk, ñaamaŋ Ibrahiima woosa ne : « Onaat to ŋ haad ŋ kilifaaniŋ ngo. »
55 Taambɗoh Rebeka na yaayiŋ ɗe woosa ɗe ne : « Ona ɓoo, kuɓki cafƴi nik na ɓoo ƴissuut, ini ree neeh ndaŋkiyaah dong ; ƴut ɗah, fu kaɗ na ɗe. »
56 A loffa ɓa ne : « Kanaat to ɗaak, laam Nikiɗi yooɓɗiɗiɗ to waasiŋ ngo po ƴutiɗ ; onaat to ŋ gurid ŋ kilifaaniŋ ngo. »
57 Ɓa woosa ɗe ne : « Po woti. Mbaa ɗah, ɓoo ɓeeɗkaat cafƴi a woo ini a liiɓ nga. »
58 Ɓa ɓeeɗukka Rebeka, ɓa meekissa ɗe ne : « Andi fu waaɗiɗ kaɗ na ƴaarii woti ? » A woosa ɓa ne : « Ee. »
59 Ɓa ambsohha ɗe na ɓoya meeɗ ɗe ɓapiɗ na ñaamaŋ Ibrahiima na ɓa hunee na ɗe, ɓa askohha na ɓa.
60 Ɓa kiimiɗta ɗe an : « Kooh barke'ɗaat ɗa, gooyiŋ ɓoo, a tum ɗa ɓasil, te ɓi rimkohan nga ɗa degaat ɓi sang ɓa yaah. »
61 Rebeka hunnda na ñaam caŋ ɗe ɓitiɓ ca, ɓa rappa ngeelemb ca, ɓa kaɗeeɗa na ñaamaŋ Ibrahiima.
62 Waam, raak Isaahha pulohiɗ Lahay-Roy, a gennda Negef.
63 Wa raakka niin, a tiindsukeeɗa ŋ nduuf-nduufa ; a jaɗtuk jaɗtuk, a ƴokka ɓi ngeelemb hayeeɗa.
64 Ŋ ɗafuk ngeelmba a rape, Rebeka nammba hot Isaahha, a ruhussa.
65 A meekissa ñaama ne : « Moo, ƴaara na hee cohe na ɓoo ŋ nduuf-nduufa yen, e ɓa ? » Ñaama woosa ɗe ne : « A kilifaaniŋ ngo. » Rebeka muurukka.
66 Wa ɓa coh, ñaama naandsukka Isaahha findi wa kaɗoh jen.
67 Isaahha ɓayya Rebeka ɓitiɓ, a waaɗta ɗe lool. A ɓekka ɗe ŋ ɗiipaŋ yaay ɓa, Saarata. Ineem weɗ giifiɗ Isaahha ŋ kakaan kaŋ yaay ɓa.