3
Kidga ƴina gile
1 Musaa nikka nga, a niiɗeeɗa pe' ca na mbaal caŋ payum ce ƴaar, Yetoro, seeƴkiɗohaŋ Majaan. Raakka mbeh, a ɓayya ca ŋ finho kehƴa hulanga ngaŋ Horeb, ŋ tangooraŋ Kooh.
2 Ndaam, malaakaaniŋ Nikiɗi teeɓukka ɗe ŋ ɗooƴ jaal yongkaah, ŋ ɗooƴ kidig ƴin. Musaa hotta kidga ƴina gileeɗa waaye wa dohɗi.
3 A woosa ne : « Faɗa ŋ wel, ŋ kaɗ marka ina feyohɗeen po ŋ inah ini tah kidga ƴineen jaalee te wa dohɗi. »
4 Wa Nikiɗi hot ne Musaa weliɗ ne a kaɗa marka, a ɓeeɗkohha ɗe ŋ ɗooƴ kidga ƴina an : « Musaa ! Musaa ! » Musaa loffa ɗe ne : « Yoo. »
5 A woosa ɗe ne : « Kina reɓ ndii, wolsa ñafaɗ ciŋ ɗa, ɗiski fu tufuk wa keheƴ hooliɗ. »
6 A degga nga ne : « Ñam Koohiŋ baab ɗu, Koohiŋ Ibrahiima na Isaahha na Yaŋhooɓa. » Musaa ɗasiɗta fikiiriŋ ɗe sagu kaañaaɗiina a kaañeeɗi marak Kooh.
7 Nikiɗi woosa ɗe ne : « Ŋ hotiɗ miskiɗi cuuɓi nik wiŋ ngo raak ŋ Misra, ŋ kerhiɗ leehkiŋ ɓa sagu laɓ ciŋ ɓooɓi na torhiɗee ɓa. Ee, ŋ inhiɗ miskiɗiŋ ɓa.
8 Ŋ ruhsiɗ ne ŋ pulɗoh ɓa ngaŋ yaah ciŋ ɓi Misra, ŋ ɓay ɓa kur baahiɗ, angiɗ, wi fu inah ne wa riifɗiɗ na miis na kuum. Wa nikka kur kaŋ ɓi Kanaan, na Hit ci, Amoor ci, Peris ci, Hiw ci na Yebuus ci.
9 Marka ! Leehuk ciŋ Israayel ci hayiɗ po nga so, te ŋ hotiɗ findi ɓi Misra na torhiɗohee ɓa.
10 Mbaa kaɗa ŋ Firawna ! Pulɗa Israayel ci, cuuɓiŋ ngo ŋ ndaam. »
11 Musaa loffa Kooh ne : « Ñam ɓa, ne ŋ kaɗ ŋ Firawna, ne ŋ puliɗ Israayel ci Misra ? »
12 Kooh woosa ɗe ne : « Ŋ hey nike na ɗa, te ini na hee wa teeɓohe weɗ ne, fu puliɗ Israayel ci Misra ɗah, ɗu na hee so ñaamke ŋ tangoorii. »
Kooh teeɓohiɗ tiikiŋ ɗe
13 Musaa woosa ɗe ne : « Marka ! Ŋ kaɗ ŋ Israayel ca, ŋ woo ɓa ne a Koohiŋ caacuuciŋ ɓa a yi woos so nga ɓa, ɓa woo so ne : “ A teeku na ? ” ɗah, ŋ woyan ɓa na ? »
14 Kooh woosa ɗe ne : « Ñam yi nik. » A degga nga ne : « Woyaa ɓa ne : “ Yi Nik, a yi woos so nga ɗu. ” »
15 A woyissa Musaa ne : « Woyaa ɓa ne : “ A Nikiɗi, Koohiŋ caacuuciŋ ɗu Ibrahiima, Isaahha na Yaŋhooɓa, a yi woos so nga ɗu. ” Weem weɗ tiikiŋ ngo po faw, wi mi na hee ɓeeɗkohse jamano nu nik.
16 Kaɗa fu cohɗoha yakak caŋ Israayel, fu woo ɓa ne : “ Nikiɗi, Koohiŋ caacuuciŋ ɗu Ibrahiima, Isaahha na Yaŋhooɓa, teeɓkiɗ to. A woo ne, a hotiɗ ɗu te a inhiɗ baahiɗ ini rahas ɗu ŋ Misra.
17 Weɗ tah a hey ɗu pulɗohe ŋ miskiɗi ɗu raak nga, a yurhiɗ ɗu ɗiska ɓi Kanaan gen, na Hit ci, Amoor ci, Peris ci, Hiw ci na Yebuus ci ; kur ka fu inah ne wa riifɗoh na riifɗoh na miis na kuum. ”
18 Israayel ci hey ɗa kerhiɗe, fu hey hune na yakak ci, ɗu kaɗ ŋ buuraŋ Misra, ɗu woo ɗe ne : “ Nikiɗi, Koohiŋ Heber ci teeɓkiɗ ɓoo, weɗ tah ona ɓoo, ɓoo kaɗ ɗiski ree tiindu neeh kaahay ŋ bilaf fa, ɓoo seeƴuk nga wuu Nikiɗi, Koohiŋ ɓoo. ”
19 Waaye ŋ inhiɗ ne buuriŋ Misra teyɗukanɗi ɗu faɗis ne ɗu coot, hanaa a degu yaahi uup ɓit wiŋ ɗe.
20 Weɗ tah, ŋ hey raɗse yaahiŋ ngo, ŋ ruhsiɗ ngaŋ Misra ini uup doole ŋ in ciŋ ngo feyohiɗ ci, ŋ ineem, a hey ɗu faɗe ne ɗu coot.
21 Ŋ hey tume po ɓi Misra naw ɗu te ɗu kaɗee ɗah, ɗu cootanɗi yaah ɓarang.
22 Ɓitiɓ nu nik nga ɗu ɗah, a hey meekse gentohiŋ ɗe ɓitiɓ, yi gen na ɗe ŋ kahni na yi genɗi na ɗe ŋ kahni, in haɓɗohuuɗ haalis na urus na ɓi kulɓa, ɗu ɓekiɗ kuɓuuciŋ ɗu ca, ƴaar na ɓitiɓ. Ɗu naafohan raak-raakiŋ ɓi Misra ɗaa. »