26
Genohaani na baasiŋ wa
1 Ini kaɗ ŋ Genohaani, fu hey wa haɓɗe na haf-piis ndaŋkiyaah, ca teɗohsan ooy leeŋ eɗfiɗ ndengiɗ ambsohuuɗ na ooy bulo, na ooy ruumind eɗfiɗ na ruumind coy ; piis ci moɗsinohsan ɓi nataal seruben.
2 Piis ceem ceɗ hendan, waa nu nga ɗah, hutiiniŋ wa nikaat saangal ndaŋkiyaah na nikiis (14), angiini nik suung nikiis.
3 Yatuus nga ca hey ambsohse suptu yino, yatuus ci tas nam tumu ɗaa.
4-5 Piis ci yatuus ci ambsohuuɗ ceem, fu hey ca suptiɗe ɓi yaah koroha ŋ ɓaki winoori ŋ sereendiŋ angiini, ca haɓɗohsan ooy bulo. Yatuus ci ambsohuuɗ ci tas nam suptiɗu mand ɗaa. Yaah ci korohaaci ŋ piis ci ambsohuuɗ ci nikan ndaŋkiyaah-yatuus (50). Ciŋ piis ci ambsohuuɗ ci tas naman nik ndaŋkiyaah-yatuus (50). Korohaaceem, waa nu nga ɗah korɗohu na morom wa ŋ piis ci cinooci ambsohuuɗ ci.
6 Fu haɓiɗ korɗoha ndaŋkiyaah-yatuus (50) ne fu ambsoh piis ceem po baasiŋ Genohaani nik yino. Korɗohaaceem nikan urus.
Baasi haɓɗohsan find pe'
7 Ƴut ɗah, fu hey name haɓɗis haf-piis ndaŋkiyaah na yino (11). Haɓɗohaa ca find pe' ; wa nik uloha baasiŋ Genohaani.
8 Haf-piis ceem ceɗ hendaat, waa nu nga ɗah hutiiniŋ wa nikan saangal ndaŋkiyaah na yatuus (15), angiini nik suung nikiis.
9 Fu hey ambsohe piis ci yatuus ci, ca nik yino, fu nam ambsoh yasna-yinooci kiik ca, ca nik yino ; wi yasna-yino'ɗoh nga ca, fu lema kanak ŋ ɓakiŋ aasohaaniŋ ɗiipi.
10 Fu haɓiɗ yaah koroha ndaŋkiyaah-yatuus (50) ŋ sereendiŋ piisi yatuusɗoh ŋ piis ci yatuus ci ambsohuuɗ ci, fu nam haɓiɗ yaah koroha ndaŋkiyaah-yatuus (50) ŋ sereendiŋ piisi koc ŋ piis ci yasna-yinooci ambsohuuɗ ci.
11 Fu hey ca haɓɗiɗe korɗoha ndaŋkiyaah-yatuus (50), ca nikan moos ruumind, fu taambiɗ ca ŋ yaah ci korohaaci suptu ŋ piis ci, korɗohaaci korɗoh ca, po baasi nik yino.
12 Baaseem hey uupe wiŋ Genohaani saangal yino ŋ hutiini, ini uup hey ɗah wa gaat ŋ finhoori.
13 Baasi hey name uup wiŋ Genohaani saangal yino ŋ angiiniŋ wa, wa hey wa uupe camban saangal ŋ ɓakii, wa nama uupis camban saangal ŋ ɓaki tas jaar wa ul wiŋ Genohaani jen.
Baas ci haɓɗohsan und
14 Fu hey waake und kuy mbaal suupuuɗ ruumind, fu haɓɗis baas, wa nik ulohaaniŋ baasi kanakɗohiini ; fu nam waakis und inoh cookom, fu haɓɗis baas wiiriis fu raɗisa ŋ ɗafuk baasi kaahayɗoh weem, wa nama ul.
Kaadar ci na laat ci
15 Fu hey haɓɗe ɓi kaadar, fu na hee ca haɓɗohe hang kassiya, ca na hee hey tufke ne ca amb Genohaani.
16 Kaadar ci jen hendan hend ; waa nu nga ɗah, hutiiniŋ wa nikan saangal yatuus, angiini nik suung yino na camban.
17 Findi ca hend jen, kaadar nu nga ɗah, hey pulɗe ndooɗ kanak findi kot, ca na hee hey hunɗohse te ca laaltiɗohanɗi.
18 Kaadar ceem fu na hee haɓɗe nga ca ndaŋkiyaah-kanak (20) ŋ ɓak yaah-sing ne fu eɗ pulohaaɗ-noh finho, fu aasee ɗah.
19 Kaadar ceem hey haɓɗiɗasse tufkoha ŋ ooɓi, ca nikan tufkoha ndaŋkiyaah-nikiis (40), ca haɓɗohsan haalis ; kaadar nu nga ɗah hey raake tufkoha kanak, kot ci kanak ciŋ kaadari ɓeksan ŋ tufkohaaceem.
20 Fu hey name haɓɗis kaadar ndaŋkiyaah-kanak (20) ŋ ɓaki winooriŋ Genohaani, wi lahoh na yaah-ñaahum.
21 Ca nam raak tufkoha ndaŋkiyaah-nikiis (40), ci haɓɗohsan haalis, kaadar nu nga ɗah raak tufkoha kanak ŋ ooɓi.
22 Fu nam tufkiɗ kaadar yasna-yino ŋ ɓaki mirndoh ŋ Genohaani, ŋ ɓak muyohaaɗ-noh.
23 Fu haɓɗis kanak, ceɗ na hee nike ŋ koñ ci nik ŋ fikiira, ŋ ɗooƴ Genohaani.
24 Hang ciŋ kaadar ceem, ca na hee hey nike kanak ini kooɗoh ŋ kehƴi po ca ree ɗafki ɗah, ca tokɗohu baahiɗ na inaa haa kiñi ; kaadar ci kanak ci nik ŋ koñ ci kanak ceem tumsan ɗaa.
25 Jaar fikiiri raak kaadar yasna-kaahay na tufkoha ndaŋkiyaah na yasna-yino (16) haɓɗohu haalis. Kaadar nu nga raak tufkoha kanak.
26 Fu hey haɓɗe laat kassiya yatuus, ca galanduk kaadar ci ŋ ɓak yaah-sing,
27 fu nam haɓɗis laat yatuus wuu kaadar ciŋ ɓak yaah-ñaahum, na yatuus wuu fikiira, ŋ ɓak muyohaaɗ-noh.
28 Wiŋ leerni na hee taambe ŋ leerniŋ kaadar ci jen, wa ambohan ɓak po ɓak.
29 Kaadar ci, fu na hee ca hey ule na urus, in ci haa kiñi, ci laat ci taambohan, nikan urus, fu ul laat ci na urus.
30 Ƴut ɗah, fu yip Genohaani findi wa fu teeɓsee ŋ ɗafuk tangoora.
Ridooni ɗasiɗ Ɗiski Hoolohngaani
31 Fu hey haɓɗe rido, wa haɓɗohsan leeŋ eɗfiɗ ndengiɗ na ooy bulo, na ruumind eɗfiɗ na ruumind coy ; feroh keeh-keeh moɗsina na ɓi nataal seruben.
32 Fu na hee wa kore ŋ kumbin kassiya nikiis yipuuɗ ŋ tufkoha haɓɗohuuɗ haalis, kumbin ceem na hee ulse jen na urus, ca raak koroha haɓɗohu urus.
33 Ridooneem taamban ŋ ooɓ ɗiski piis ciŋ Genohaani korɗohu ; wa saɓsoh Ɗiski Hooliɗi na Ɗiski Hoolohngaani. Wahndeeni ɗaak in ci na teeɓohe Ambtiɗohi aasɗu ŋ Ɗiski Hoolohngaani.
34 Ƴut ɗah fu deg kunohaani, ɗiski na romkohse ŋ ɗafuk Wahndeeniŋ Ambtiɗohi, ŋ Ɗiski Hoolohngaani.
Taaɓli na degohaaniŋ laampaaci
35 Fu aasee Genohaani, ŋ ɓak pulohaaɗ-noh ɗah, dega taaɓli ŋ yaah-ñaahum, fu deg degohaaniŋ laampaaci ŋ yaah-sing, ca yurhiɗkoh. Ca nikaat bala fu reyan ridooni saɓsohaani ɗah.
Ridooniŋ aasohaani
36 Fu hey haɓɗiɗe aasohaaniŋ ɗiipi rido, wa na hee nike leeŋ eɗfiɗ ndengiɗ, fu moɗsina na ooy bulo, na ruumind eɗfiɗ, na ruumind coy.
37 Fu hey waakɗe ridooni kumbin kassiya yatuus, fu ul ca na urus jen. Ca na hee hey yipse ŋ tufkoha haɓɗohuuɗ moos ruumind, ca raak koroha haɓɗohu urus. Tufkohaaci, ca na hee muulohse moos ruumind naayɗuuɗ.