22
In ci Kooh nakoh ŋ rok
1 Rokoh nu telu daji'e ne a rok, a laɓu po a kaan, raak wa na wek ɗah, yi ap ɗe ambsanɗi findi ɓoyi ap ɓo'.
2 Waaye wa raak nohi puliɗ ɗah, yi ap ɗe hey ambse findi ɓoyi ap ɓo'. Rokoh nu ambu ɗah, a wirndan wirind ini a rok ; a raakɗi ali in ɗah, a hey toonse findi ñaam ne ini a rok wirndu.
3 Nik ne ini a rok, findi inoh, mbaam, mbaal wala pe', ris na ɗe kaanaaɗi ɗah, a hey ɗe wike, te a wirind heɗ ce in hend na ɗoopteem.
In ci Kooh nakoh ŋ yahɗoh
4 Ɓo' nu niiɗee ŋ yohon wala nguuk, a faɗ ɗoopaat ciŋ ɗe ca pul po ca ñamiɗ yohon jaambur ɗah, a hey wirndohe ñamɗeem ini uup baah ŋ in ca a kooɗoh ŋ yohon ce wala ŋ nguukiŋ ɗe, a yi yi ñamɗoh.
5 Ɓo' nu dohke po wa ɓoƴsuk koraaɓ, wa doh koleer jaambur wala yohon nguɗsaaɗi wala wi na hane paar ɗah, a wirndan wirind ini wa doh jen.
6 Ɓo' nu dengkohu ŋ kahan ce kopor wala in wiiriis, ca roku nga po rokohi ambu ɗah, rokoheem hey wirnde waas kanak ini a roke.
7 Waaye rokohi ambuuɗi ɗah, heɗ kahneem hey kaɗe ŋ fiki kilifaaci ne ɓa atte andi yaah ce kaɗɗi nga.
8 Nookoh nu raak ŋ harmban ɓi ɓo' ŋ ini kaɗ ŋ inoh, mbaam, mbaal wala pe', mbaa kulɓa wala in nu min muuƴ, po ɓo' min woo ne weɗɗi ɗah, ɓa hey kaɗe ŋ kilifaaci, yi eɗsanɗi keeh hey wirnde hend na ineem waas kanak.
9 Ɓo' nu nakoh niiɗ mbaam, inoh, mbaal, pe' wala ɗoopaat nu a min nik ɗah, ɗoopteem kaan, a weer wala a roku te ɓo' maasɗi ɗah,
10 ɓoyi naksee niiɗ hey giñe ŋ fiki Nikiɗi ne yaah ce kaɗɗi nga. Heɗ ɗoopteem hey teyɗuke giñeem te niiɗohi wirndanɗi ali in.
11 Waaye wa woor ne ɗoopti rokohu ŋ yaah ce ɗah, a hey wirnde heɗ ce.
12 Nik ne wa wooriɗ ne a ɗoopaat-nduuf ap ɗe ɗah, niiɗohi hey haye na ini tas ŋ ɗoopti, wa teeɓoh ineem ; ndeem a wirndanɗi.
13 Ɓo' nu ɓanduk ɗoopaat, ɗoopteem weer wala a kaan te heɗ ce maasɗi ɗah, a wirndan ɗe wirind.
14 Waaye heɗi maasoh ɗah, yi ɓanduk heyɗi wirnde. Nik ne ɓa woytiɗkohee wirind ne a panguk na ɗoopti ɗah, a na hee eɗohe ini ɓa woytiɗkohee dong.
15 Ƴaar nu woo na cafaƴ inhaaɗi ƴaar yi nguɗɗuuɗi cakiim po a faanuk ɗe ɗah, a eɗohan eɗoh cakiim kiŋ cafƴeem, a tum ɗe ɓitiice.
16 Baabiŋ cafƴi teyɗukɗi ɗe on ƴaari ɗah, ƴaareem hey wirnde kopor hend na cakiim cafaƴ inhaaɗi ƴaar.
In ci sangohu
17 Kinaat faɗ ɓitɓi na luhuse a pese.
18 Ɓo' rapkoh na ɗoopaat ɗah, a apsan apu.
19 Ɓo' nu seeƴuk, te a seeƴukɗi wuu so mi yi Nikiɗi dong ɗah, a ɗumbsan ɗumbu.
20 Ali ɓo' nga ɗu kinaat torhiɗ jaambri genohaah ŋ kur ki, laam ɗu namee nik jaambur ŋ Misra.
21 Ɓitiɓ nu ƴaar ce kaan ɗah, kinaat ɗe torhiɗ. Yaɗuuni baab ɓa kaan, kinaat ɗe nam torhiɗ.
22 Wa raak, a leehuk rek ne ŋ naaf ɗe ɗah, wa wooraat yi ɓaahan ɓi tumana ne ŋ hey kerhe nga.
23 Te ŋ jaaran ayruk lool, ŋ apɗuk ɗu na ndang po ɓitiɓ ciŋ ɗu nik raakaaɗi ƴaar, kuɓuuciŋ ɗu nik raakaaɗi baab.
24 Ɓo' nga ɗu ɓand ñakiɗ, yi nam ɓaah ŋ cuuɓiŋ ngo, kopor ɗah, wa kinaat mand na findi ɓinooɓi na tumohe ; kinaat meeksoh ini deggan ŋ kombot ki.
25 Ɓo' nga ɗu tayle'u palto ɗah, a wikaat heɗ wa wa ŋ noha mbaɗi.
26 Laam weɗ dong a raak ulkoha. Wa ɓayu ɗah, a taskohan ye findi uuf ? Te a leehuk ne ŋ naaf ɗe ɗah, ŋ hey kerhe nga, ŋ Heɗ yirmande.
27 Ali ɓo' nga ɗu kinaat woo in moɗaaɗi ŋ kilifaaci te ali ɓo' nga ɗu kinaat yonj ɓoyi adgoh cuuɓiŋ ɗu.
In ci Kooh nakoh ŋ in ci a waɗsan
28 Ali ɓo' nga ɗu kinaat to yiih eɗ ɓakiŋ ngo ngaŋ in ci a nguɗan jen na ɓakiŋ ngo ngaŋ reseñi na oliiwi.
Yaa nu nga ɗu hey yo waɗe kuɓkiŋ ɗe saawi ƴaari,
29 te yaa nu nga ɗu na hee name tum ɗaa na inoh ciŋ ɗe na mbaal ciŋ ɗe wala pe' ciŋ ɗe. Saaw ciŋ ca raakan na ndaamuuciŋ ca neeh yasna-kanak, wa yasna-kaahayɗoh, ɗu eɗ to ca.
30 Ɗu na hee nike ɓo' hooliɗ wuu so. Ɗu ñamanɗi septiŋ ɗoopti ɗoopaat-nduuf ap, ɗu njafɗan ɗe ɓuu ci.