4
Raak-raaki tumu ŋ tumoha mahuuɗ
1 In ceem tah po, ɓoo misikka Kooh, a dengkohha ɓoo pangkii, weɗ tah po ɓoo faɗsukanɗi.
2 Ɓoo kay, ɓoo sangiɗ in ci ɗasɗukiɗ ci na kaci'ɗohe ; ɓoo ñaañohɗi ɓo' te ɓoo ɓoƴsohɗi woo kiŋ Kooh. Ɓoo na teeɓohe keeh ki, ne yaa nu nga min teyɗuk ŋ fiki Kooh ne ɓoo ɓo' yurhiɗ.
3 Nik ne yegɗohiŋ muci ɓoo na yegɗohe muuruk muuruk ɗah, wa muuruk ŋ ɓi nik ŋ waas sooƴ.
4 Seytaani, yi min ŋ adinaanii, a yi fuuliɗ ñaañiŋ kosaaɗiici po ɓa minɗi hot siñaariŋ Yegɗohiŋ Muci, weɗ ne siñaariŋ yaki Kiristaani yak, yi ñaamaariŋ Kooh.
5 Ɓoo yegɗohɗi haf ɓoo, ɓoo na yegɗohe ne Yeesu Kiristaa a yi Heɗi, te ɓoo sah, ɓoo ñaam ciŋ ɗu saguuce.
6 Laam Kooh yi woo ne : « Ŋ ɗooƴ ñuusi, ñiin siñaarɗaat nga, » a yi siñaariɗ ŋ keeñ ciŋ ɓoo, ne ɓoo inah yaki a yak wi na siñaarɗe ŋ fikiiriŋ Kiristaani.
7 Ɓoo nak, raak-raakeem tumu nga ɓoo, waaye ɓoo tumoha mahuuɗ, ne wa teeɓoh ne hatili yakohngaaneem, wa wiŋ ɓoo haa, wa wiŋ Kooh.
8 Ɓoo na degse miskiɗ nu nik, waaye ɓoo na pule nga, ɓoo jaahɗiɗ waaye ɓoo ñakɗi yaakaar.
9 Ɓoo ɓii tolfiɗu waaye Kooh faɗɗi ɓoo, ɓoo ɓii folu waaye ɓoo ɗumbuuɗi.
10 Kakaan kiŋ Yeesu weɗi ŋ faan ciŋ ɓoo ŋ ɗisik nu ɗisik, ne kipes kiŋ ɗe nam hotuk ŋ faan ciŋ ɓoo.
11 Laam ɓoo ɓii pes waaye ɓoo gen yurhiɗkoh na kakaan sagu Yeesu, ne kipes kiŋ ɗe nam hotuk ŋ faan ciŋ ɓoo, ci kaanan.
12 Ŋ ineem a kakaan na pangke nga ɓoo, waaye a kipes na pangke nga ɗu.
13 Ɓo' woyiɗ ŋ Fiis ci hooliɗ ci ne : « Ŋ kos kos weɗ tah ŋ woyiɗ ! » Ɓoo nam raak Fuuɗsi ɓoyeem raak, Fuuɗsi na onohe kos, tahha po ɓoo namiɗ kos, weɗ tah ɓoo namee woo.
14 Ɓoo inhiɗ ne Yi hultiɗ Heɗi Yeesu, hey ɓoo name hultiɗ ne ɓoo nik na ɗe, a tufkiɗ ɓoo na ɗu jen ŋ fikiice.
15 In ceem jen, ca ɗii rahas ɓoo saguuɗu, ne baahohiŋ Kooh pasarkoh te wa ree ŋ ɓo' laayiɗ ; ɓi corkiɗan ɗe uupee nga laay, ɓa hun, ɓa yakɗee ɗe.
16 Ineem weɗ tah ɓoo na faɗsukeeɗi. Ali nik ne faan ciŋ ɓoo ca ɗii yahkeeɗa, keeñ ciŋ ɓoo na uupe as Kooh-nu-wiis.
17 Laam miskiɗ ciŋ ɓoo woti ɓoo hendtiɗkoh ca na yaki genan gen ɓoo yakan ɗah, ca in eɗfiɗ te ca maañɗi, ca na kooɗkiɗe ɓoo yakeem.
18 Te ɓoo na markeeɗi ŋ in ci na hotse, waaye ŋ ci minɗi hotu. Laam ci na hotse ca na maañeeɗi, waaye ci minɗi hotu genan gen.